612中短期局勢分析：有三個黑洞，香港人一定要避

612至今已兩個星期。這短短兩個星期，體現港人社會運動的進化，科技所推動的「去中心」文化更把港人追求民主的歷程帶至另一里程碑。惟運動發展至今，有下列幾個黑洞一定要避，否則長遠而言會成為香港轉型自由民主社會之途上的絆腳石。

首先輕輕講今次運動中主要優勢：

1. 保衛法治出師有名，發揮香港國際地位優勢

香港貴為國際金融都會，雲集各國語言奇才。香港人出名辦事效率高（唔計政府），語言能力好，同埋有一定財力，其實打國際輿論戰真係最好不過。

以往，大家既口才就主要用喺同錄音機政府磨爛𥱊、同親共議員同藍絲辯政。呢啲文宣戰極為無效率，有如對牛彈琴。有時你唔洗行近敵人去打佢頭架。發現自己無法肉搏，就轉型智取，同敵人既敵人聯盟，課金俾盟友買實彈，遠程送敵人一槍應該仲好。

香港人無軍力，無子彈，玩唔到武取；但勝在有自由網絡，同埋荷包有實彈，仲有法治同道理。如果要對付政權，就要把握好戰場，玩多啲網絡、金融、國際制裁呢類在外既戰場，出招既力度明顯比將自己囚禁喺人大、立法會設定既殘缺規矩大好多。

2. 網絡自由體現民主精神，自發挖坑彰顯公民效率

在此就不冗述612同報紙眾籌如何利用網絡軟件了。因為網絡軟件無篩選，無前設，無門檻，所以任何popular同workable plan都可以輕易突圍而出。而一個多like既計劃，本身就指向公民意願。多人想做，就自然行動力大大提高。

連登普及化同埋Telegram崛起，兩者相結合，最顯而易見既就係行動效率大大提升。2014雨革，網民同落地既公民，感覺上仲係兩個切割既身份，鍵盤戰士多而落區少。

但Telegram簡單既加入方法，令到有志之士喺匿名既前提下，仍然可以跟同路人建立有效溝通渠道，自發挖坑並組成working group，將網絡上既proposal同critique轉化成在地既working plan。呢點對於長期建立公民社區大有裨益，有效一洗網民「齋講唔做」既負面形象之餘，亦一洗香港人利字當頭既刻板形象，進一步強化公民社會「公義當頭」既價值。

惟網絡自由本身是把雙面刃，下面將簡述其弊。

以下係個人認為不可取既戰線，長遠而言更會有害民主發展：

1. 拘泥藍絲慣用戰線，長期埋首長輩圖/流料，或荼毒公民思維

先講網上長輩圖。稍經觀察，發現facebook充斥大量專業深藍，長輩圖基本上對佢地無效。有人話呢啲係專攻淺藍，但問題你係攻梗佢邊忽呢？攻完，對你推進自己戰線又有幾大幫助？現時「長輩圖」主攻民建聯同埋「獨立調查」，但前者離真正既區議會戰太遠，後者又一早俾人拆穿左。要明白，廢老之所以為廢老，係因為有啲嘢佢已經根深蒂固，例如default覺得建制做實事、政府為市民好。「反對派」之所以一直無法攻陷廢老，係因為佢地擺好多資源係政治口號、網上論政方面，而無咩廢老最鍾意既「爭取」，同埋面對面交流。沉淪網絡舌戰，只會加強佢地認為「反對派」淨係吹水無實際既刻板印象。因此，個人認為網絡發佈長輩圖同埋回應五毛成本太高，收益太低，不應戀戰。啲長輩又善忘又淨係見到短利，與其浪費時間插民建聯辦事不力，不如落力啲幫非建制建立社區形象，效果應該會比較顯著。

再者，可能會有潛質中立，睇完大量曲直難分既長輩圖，可能會不知不覺認同政府，認為佢只係一時犯錯。長輩圖之所以為惡，原因係佢壓抑人既理性，訴諸一大堆情緒化又無意義既金句。

而「黑警扮鬼衝」論係近期比較嚴重既流料。如果我地繼續抱持抹黑對手既心態去打輿論戰，只會輸多勝少。建議大家以後收到對手低莊既傳聞，不妨加多幾分懷疑，質疑下真確性。如果為真，不妨大力宣傳；但如果係假但又被人傳到十足十，被對手拆穿既時候，我地會輸得更難睇。再者，如果我地因為對手用下三流手段聚攏民意，就覺得要全盤抄足，咁最後我地即使勝出呢場仗，都只係「換湯唔換藥」，由紅底可恥變成黃底可恥。打住公民精神旗號，行惡意抹黑和低智洗腦之不義。對手之所以可恥，係因為佢手段下流，仗人無知，散播不實，欠公民精神。公民精神係我地最大皇牌同核心價值，咩時候都不應棄之如雞肋。

長輩圖同流料本質上就係政權傳播「假大空」思想既洗腦工具，所以我地用上手，點都會輸一啲。對得多，可能會輸埋自己既理性，同埋自己重視既原則同公義。長遠而言，得不償失。建議慎用或棄用。

2. 沉淪單一議題光環，忽略政府問責失效主因

首先申明，追蹤開既KOL都能切中問題核心，知道612打後浮現既五大訴求，全部源於政制失衡。當政府無需為過錯問責，只為上頭維穩，連百萬民意都無法監察政府時，繼續狙擊四大訴求亦效用不大。開「政制失衡」戰線並不如某些網民所言，係模糊訴求焦點；相反，開呢條線更加暴露政權弱點，而且無咁易被對手用輿論和拖延戰打走。

可以咁講，反送中係導火線，612係火水；而四大訴求係一盆水，淋唔熄呢壇火。只要林鄭少左蒲頭，警察keep住打同情牌，律政司唔會出黎張揚，有部份人已經會覺得解除暫時既危機感，覺得香港人有階段性勝利。

惟有打「政制失衡」呢個旗號，我地先可以開長期戰線，開住大水喉淋熄呢場妖火。所以普選特首要講，普選立法會更加要講。目前我地將全部精力聚焦喺G20，呢個策略上完全正確；但我地都要諗，無論聽日國際社會開左張咩牌俾我地，香港都要自力更生，唔可以妄想有神助攻就可以一勞永逸，等個天跌個大蘋果俾我地。

講真，「政制失衡」真係出師有名。如果拉埋「官員貪腐，社區問題叢生」黎講，受眾先夠廣。「政制失衡」，代表唔洗為民意負責，行政低效都不受民意監察，高官同紀律部隊貪腐兼尸位素餐，薪酬同頁獻嚴重不成正比。文宣方面，真係要因材施教。邏輯好既、學歷高既，就要同佢繼續討論現行制度以中共為本位所帶來既管治缺陷；講情感既、關注日常衣食住行，就要搵大量弊政作證，務求勾起一般市民對當下管治班子既民怨。咩泥頭車亂倒垃圾啊，檢控違例泊車不力、製造極多交通黑點同意外啊，四千蚊等極都無啊，排醫院排期要排成年啊，就最適合拎出黎舞下，令啲淺藍覺得政府都唔係真係咁幫市民，咁就夠啦。某啲人，你同佢講太多道理太多制度太多政治太多歷史，搞到佢個腦load唔到，佢就會憎左你唔聽你講架啦。

3. 過份吹奏民意，欠論述基礎作領航

承上，民意唔係大曬。因為有好多人都唔識用理性思考，淨係會用個人喜惡去衡量一個行動成功與否。佢地唔參考歷史同埋縱觀全球各地政情，亦唔識兼聽，淨係識將自己既回音壁當成民意。如果根據民意行事，只會被民意牽住鼻走，最後咩都爭取唔到。當初Steve Jobs打天下，都唔會盲目參考民意，而係會用自己既理想說服民意。此為真領袖也。

當初梁天琦之所以跑出，係因為佢係當初芸芸政棍之中，難得有明確論述同價值觀既人。本土論述當時其實唔係主流，勇武亦唔係民意，但因為天琦真心相信佢講既嘢，有一個貫徹既論述，所以可以用真誠同信念打動人。呢點係香港大部份竇選票既政棍都無既。佢地每次只可以就單一議題發聲，無一個好明確既政治理念，香港人都唔期待佢地會為自己爭取到啲咩，亦唔特別期待佢地識開拓到啲咩新戰線。但求佢地唔好篤灰，同埋盡用佢地政黨光環，唔好蝕章就算。

如果要打持久戰，就要識分一時民意同實際既民情。民意係市民針對短期行動既觀感，民情係市民長遠既渴望。有打麻將都知，唔係下下有得食就食，大腦愉悅一下就夠；要真正贏牌，就要睇曬成個局面，知道自己想造咩牌，用意志同理念克服自己情緒波動，然後專注去做，而唔係上家打咩你就食咩。所以呢，如果大家濫用民意，阻礙一啲出師有名既抗爭，完全係罪大惡極，最後只會淪為食細糊、「階段勝利」、自我感覺良好既永續社運。

講到呢度，並唔係想叫大家造神捧神，追捧某人及其論述 。一個人有機會腐化；但佢曾經相信過既真理同論述，係唔會變既。

喺呢度，其實係呼籲大家：唔好見到論述，就覺得一定要拆佢大台，亦唔好因為民意波動，就同合情合理既論述失諸交臂。否則，香港即使擺脫到政權魔爪，亦會身陷民粹主義既泥沼。

一定一定要記住，香港人最大既皇牌，就係公民精神。我地面對極權，亦有「是其是，非其非」既勇氣。一個敢於獨立思考既靈魂，先係政權最畏懼亦無法控制既武器。

https://button.like.co/chromacity_mintleaf