（粵語寫作）點樣先至有真正滿足？讀《像哲學家一樣生活》

今日想同大家介紹一本書，叫做《像哲學家一樣生活》。書名雖然好似好空泛，不過呢其實作者係想介紹斯多葛主義嘅思想，同埋佢點樣用喺我哋日常生活裏面。

斯多葛主義係咩嚟？其實佢係一個興起於古希臘，然後喺古羅馬好盛行嘅一個哲學思想。古羅馬既環境，同而家差唔多；大家都係好追求名利地位財產，男士就可能會追逐權勢，女士就會爭妍鬥麗。但係斯多葛主義嘅哲學家呢就發現，其實就算你得到名譽地位或者財富都好，呢啲都唔會帶來真正嘅滿足。

點解呢？其實同人嘅本性有關。因為人呢天生就係好容易適應現況，變咗就算你當初有新嘅渴求，當你真正得到嗰樣嘢嘅時候，你會開心一陣，但係好快就會適應咗，然後又有新嘅渴望出現。咁變咗，人就慢慢好似進入咗一個慾望之輪裏面；你喺裏面行得越快，個慾望之輪就轉得越快，結果永無休止。慾望圈裏面既人係永遠唔會得到真正滿足嘅。咁點樣去解決呢個問題呢？斯多葛主義嘅學者就提供左三個辦法。

第一個方法叫消極想象，就係與其去渴望你未得到嘅嘢，不如去渴望你已經得到嘅嘢。咩意思呢？其實如果你諗返，每一個人就算佢好窮好潦倒，其實佢仍然擁有好多野-- 可能係健康既身體，可能係關心佢既屋企人，可能係未來既時間。但係好多時候我地都對呢啲野習以為常，唔覺得有咩特別。

所以消極想象既重點，就係透過想象我地終有一日會失去而家擁有既事物，從而珍惜當下，好好利用自己已經有既野。例如每朝起身，我地可以同自己講，今日可能係我人生既最後一日，或者我又同死亡近左一步；或者夜晚見到家人，我地亦都可以同自己講，今日可能係我最後一日見到佢地。除咗想象，我地都可以實際做出嚟；’例如每個月抽一啲時間去捱餓受凍，去忍受恥辱；當我地發現自己原來可以忍受到呢啲痛苦，自然會對人生既挑戰更加寬容平靜。

第二個技巧叫控制三分法，就係要將我地遇到既事物分為可控制、不可控制同埋一半一半三種。我哋好多時候，好多既擔憂其實都係擔心緊啲我哋唔係完全可以控制到嘅嘢，例如自己會唔會發達，個女仔鐘唔鐘意我之類。所以斯多葛主義既哲學家就將天下間既事物分成三種，第一種就係我哋完全冇得控制嘅，包括太陽幾時升起，或者今日會唔會落雨之類；第二種係我哋可以完全控制嘅，例如我哋嘅品格，我哋嘅態度；第三樣呢就係嗰啲控制到一啲嘅，即係未完全控制到嘅嘢，例如之前講嗰啲。

斯多葛主義既哲學家提醒我地，要將注意力放喺控制到既部分，例如與其擔心個女仔唔鐘意自己，不如實實在在去做一個會令人鐘意既人；與其擔心自己發唔發到達，不如專心去研究投資賺錢，提升自己既理財知識。透過咁樣去轉移自己目標，唔單止我哋可以更加專注，我哋都會少咗好多擔憂；因為我哋會擔心少好多一啲我哋根本控制唔到嘅嘢。

第三個技巧呢叫宿命論，就係話我哋成日都會對於已經發生左既事覺得後悔；但係透過宿命論我地會知道過去根本無從控制（除非你有天能啦）。咁既然無從控制，根據三分法我地根本唔需要感到擔心或者懊悔，反而相信每一件事無論好壞都係有原因既。最緊要係活在當下，好好把握自己控制到既未來。

斯多葛主義已經有二千幾年歷史，點解到而家仍然有用呢？因為人既本性千百年來其實都冇乜點變過。基於進化既原因，人天生就係會好著重眼前嘅利益，好鐘意比較，好著重自己係群體裡面既地位，好容易記住一啲唔開心既野。本來呢啲特徵的確可能令到我地更加容易爭取到資源，更加容易生存同繁衍；但係佢地既副作用，就係令我地唔開心。

所以斯多葛主義既重點，就係用我地既理性，透過不斷既練習，去減少呢啲人類本性帶嚟既負面情緒同習慣。呢啲技巧同心態，喺古羅馬有用，喺現代呢個更加密集緊張既社會可能更加有用，所以有機會就試下啦。