四时有风物，冇人

7点落订朴朴，7点半摞完。

训唔着，感冒未清，头晕身庆，周身湿立立，不如去堑口兜下。

落街先知听日中秋，世风日下，宜家微信公众号年年话“入冬失败”，每到九月十月，秋老虎咗廿几年，未到十一月冷气都未收山。

往日中秋，未喺好多嘢食嗰时，过节唔兴食蟹，就算有，都喺水蟹河蟹，大闸蟹得叔父话过；肉蟹得铺头见过；蟛蜞食得多，不过中秋炸蟛蜞有啲“兜踎“”（潦倒，不体面）市场买无谓，落江捉辛苦，不如第日先食。

细时跟阿妈去市场，一去市场经过单车铺，就记得整车阿叔抽大头钉（手卷烟），着棍仔鞋，依起排烟屎牙，成手油屎日日拧下凿下，喺威喺势。嗰时工人阶级最光荣，知识分子阴声细气，戴对眼镜仲被人叫“四哥”，宜家周街四哥，整车师傅都戴埋。

落雨水滴滴，一地泥，细个细粒，去到市场周围都喺箩友（屁股），周围都喺脚，。节前有贵嘢嘅铺头就零舍鸠屎（拽，牛气），你问点卖，好声气就话几钱；老閪啲就应你，“乜点卖啊，摞钱就卖咯！”嗰时唔同宜家，个体户巴闭，日日摞银纸；老师穷，要等月底出粮；过节犀飞利，平日唔舍得食嗰日都买；带细路买菜，用今日话来讲就喺“弱势群体”，睇见好嘢食，大人忍得，细路忍唔到。有好嘢卖嘅铺头实呃称（短斤缺两），毕竟有嘢卖就威；唔呃称嘅铺头……你都唔想买啦。

俗话话“秋风起，食腊味”，开头得把口讲；过多10年经济改善，电台听到“秋风起，三蛇肥”；今日网上话“消费主义陷阱”，当年亦一样，话嗰样就肯定靓过你食嗰样，毕竟广告都系“编织美好生活”啊嘛。不过中秋冇人食腊味亦冇人食蛇，以前市场最兴摆菱角，黑古勒倔似一只只牛头，有啲对称有啲边大边细，细路睇落有啲新奇，未食过估估吓有乜味；田螺又喺主角，仲威过菱角，大只有细灯胆（灯泡）咁大，成盆摆响度，以嗰时工资，买埋数落冇几只；石螺就唔同，细细粒，蒜头豆豉落镬爆香，兜多几下，啦啦声，听埋就觉得多，对住部电视，嘬成晚嘬到脷（舌头）都损埋，仲想嘬。八九十年代时，炒田螺冇人落紫苏，皆因嗰时做父母嘅，做过知青落过田，边有几多紫苏食；食过此等搭配嘅父母，唔喺华侨就喺出身唔好，嗰十年七斗八斗，食过都唔记得，冇人食，就冇人卖。

今日睇手机，提醒国庆前夕小心三波车流，以前边使惊？赶时间就踩车，唔赶时间就行，搭车都得，等咯，迫（挤）咯。嗰时过节真喺有仪式感，毕竟冇电话，冇手机，写信慢，冇仪式感做人有乜意义？仲记得85年左右，大伯三伯家姐森哥一家，叫埋我地，中秋登高上白云山，以今时今日通讯手段唔出奇，宜家捻翻转头，我都唔知佢地点约得埋，仲冇人迟到，仲准时过今日啲“搭子”聚会。

当时冇话乜citywalk，广州老城区就咁大，今日环市路之所以叫环市路，皆因已经喺当时城市边缘。去到白云山周围，印象仲远过拜山，好似冇咩水泥路，我细细个，石仔路就跟住佢地一路卬住脚去，脚痛到顶唔顺就叫阿爸抱一阵，到佢冇力就话叫我“锻炼一下”落地行，阿岳哥哥大我一岁，我叫脚痛次数多过佢，大人就赞佢生性，我唔服都冇计，用今日讲法，佢就喺“别人家的孩子”。一路人唔少，又唔算迫，到某个平坦地方坐落，烧鸡月饼油纸打开，我心早郁郁贡（蠢蠢欲动），又唔敢出声，老规矩，食饭之前，晚辈逐个叫长辈“食饭”，好似拜神咁，想食就叫快啲好过。

大伯好好人，好似唔识嫐（发脾气），我想食田螺冇牙签搞唔掂，佢就用菱角尖撩螺肉比我，话呢个方法喺“家庭百事通”睇来嘅，家庭百事通喺当时电视台一个类似生活小百科嘅节目，教大家点整嘢，洗嘢，唔似宜家有小红书，有乜唔明打开抄下就有，当时睇到要记，电视节目单又要留低，戏院有乜睇又喺睇报纸中缝，乜都要报纸电视先睇到，人又信电视，又信报纸，又信解放军，引用权威观点第一句就喺“报纸话”，唔知乜喺公信力嘅时代，传统媒体就有咁嘅公信力，本来应该乜都唔信嘅人，嗰时接触到突然咁丰富嘅资讯，又信好过唔信，唔知幸福定不幸。

我细个唔知，大伯好似从来唔识嫐，但喺大伯娘日日闹人，冇人顶得顺。知佢地家事，已经喺十年后，我已经就来高中毕业，只能讲有啲嘢就喺整定（定中注定），好人撞到好人，再撞到衰嘅年头，乜都迫到变。大伯仙去已经廿年，热血一生，含冤一世，可能喺还大伯娘前世嘅债。

菱角睇落硬，咬落又唔难咬，卜一声都几过瘾，姐夫（家姐前夫）阿荣睇我咬得咁得意，话要同我斗快，我傻更更连续咬咗十几个放埋一排，阿荣笑到见牙唔见眼，话我认输啦。三伯母睇到笑，笑完望住我阿妈唔出声，我阿妈执紧嘢，见到我成排有牙齿印嘅菱角放一排，话哎呀，个个食你口水尾啦！三伯母又笑，唔知点解，嗰时嘅每一个中秋，我都觉得好冻，三伯母永远着住件花纹复杂嘅冷衫，下下笑得好阴湿，对佢印象麻麻。

阿荣嗰时喺领导司机，周围去，好多嘢拎翻屋企，饮料多到饮过世都饮唔晒，仲有一箱箱香港公仔面，话乜佢都食过，话去边度都去过，家姐当时白霍，80年代就话“冇成千银嘅西装边见得人？”阿荣矮矮地，把声好厚，手起晒茧，开完车翻到物企，对住张报纸坐成晚，大伯嫌佢唔上进，阿荣话我日日开车咁辛苦，翻来你叫我点上进？你放心，我虽然唔上进，你老咗肯定帮你倒屎倒尿。后来先知佢喺烂赌，又人人话佢喺好人，好人都可能会烂赌，烂赌都可以喺好人，呢个世界就喺咁矛盾。

家姐同阿荣结婚嗰阵，个个亲戚都唔开心，离咗婚又个个亲戚都唔开心，毕竟相处先知阿荣好人又大方，对娘家亲戚仲大方过家姐。后来阿荣独居心脏病发，一个人响屋企臭埋，成个星期隔离邻舍先知，再话比家姐知，当时已经喺2000年以后，手机都有埋，通知快几步又点？人救唔到就喺救唔到，呢样嘢喺唔会变。后来家姐讲到阿荣同阿荣屋企人，赞一句又闹一句，话阿荣老豆成六十几岁人，仲染黄头发，日日唔喺打麻将就喺出去蒲，唔正唔经，一出街冇乜好嘢，周围细路就话“巡城马一号”又出来啦，巡城马听到笑，翻来打牌赢咗就打赏细路几蚊，输咗就周围屌人。阿荣人咁好，生埋个咁嘅家庭，有前世都要有胎教先得。

中秋冇灯笼就好喺冇咗啲咩，初时都喺靠明火蜡烛折埋嘅纸灯笼，后尾先有电池。嗰时气候唔同今日，白云山到深秋，凉风习习就冇，月黑风高就真，纸扎灯笼惹火，细路揸住走得快，唔小心扑落地，唔知顾条裤好定顾个灯笼好，条裤扑穿了比人闹，灯笼点着唔单止比闹仲冇得玩，好在我地屋企从来冇为呢件事闹过我，但一年烧一只，总喺有啲失落，好似灯笼从来未属于过自己咁。年年有人烧灯笼放烟花搞到火烛，宜家会上新闻，嗰时人命贱，发生咗就发生咗，人好化学（无常）话冇就冇，睇边个该煨。

睇咗下手机天气通app，今日气温25-33，仲落雷阵雨，秋唔高气唔爽。，今日我都四张几，同嗰时嘅阿荣、三伯母年龄差唔多，细大伯少少，佢地人已经唔响度，我条命好少少，仲落得街买餸，冇穿冇烂食饱吹水，望下呢个乜都唔似嘅广州秋天，念起过年过节最中意提嘅“四时风物”，可能风物唔包括人挂。