讀地理？點解唔去做天文台？

由作者入大學嘅時候，執意要主修地理開始，已經畀身邊嘅人問過無數次：「究竟讀緊啲乜？」即使去到畢業之後，多次嘗試投入職場搵工，好多時入到interview room HR都會鄒鄒眉頭咁問：「讀地理唔係應該去做天文台或者漁農署咩？」然後就一如既往地無「工」而還了。喺無數次嘅質疑之下，都不得不令我重新整理同思考自己到底學咗啲乜嘢。

在於大部份人嘅認知，我諗地理都係關乎山、水同自然，好多時卻忘記咗人類喺自然界中嘅行為同活動，都屬於地理學嘅研究範圍。而事實上，呢種多維度、跨領域而且研究內容同其他科目有相當高嘅關聯性嘅特點，亦都令地理學喺發展過程當中，面對過其係咪一門獨立學科嘅激烈討論同爭辯，美國哈佛大學甚至因而喺1948年結束地理系，而中國各大學內嘅地理系亦喺八、九十年代有過一輪更名熱潮。

經過歲月變遷，雖然地理呢個學科最後都得以存活至今，但相信人文地理，亦即係其作為社會科學嘅一面都係較少人認識...... 而講咁多，其實都係想講地理嘅內容真係相對零散，但佢嘅研究範圍真係好好好好好闊，除咗自然地貌，同埋大家所熟悉嘅城市規模、經濟結構、人口流動研究外，地理學之下仲包括研究風俗、語言、宗教喺空間中傳播規律嘅文化地理、研究選民特徵與投票結果關係嘅選舉地理、研究交通模式同物質流動嘅運輸地理、透過研究唔同地區消費者嘅特徵以輔助營銷方式設計嘅營銷地理等等。

去到呢到，可能你真係會覺得讀過地理就好似通通都識咁，但當然冇咁簡單，如果唔係地理一早就變咗社會大眾口中所講嘅「神科」啦。要知道，喺香港，地理系嘅大學部課程同其他主修科目一樣都係讀4年，變相每一個領域都只能夠濃縮喺一個sem入面教完，每個sem上完之後，好多時都只能夠了解一啲好表面嘅背景同理論，而實務嘅技巧同深入嘅內容就真係sorry，要靠你自己嘅好奇心或者揀返相應領域嘅master/phd一路讀上去，當中最受歡迎而又算係professional嘅master，相信就係城市規劃。（不過咁樣好處係，如果你真係唔鍾意嗰個領域嘅話，你最多都係要對佢一個sem啫...... 所以都幾適合好似作者呢啲咩想知，但又唔想學太深嘅廢青）

講到底，都係希望釐清一下大家對地理呢個學科嘅認識，等以後唔洗再不厭其煩咁同身邊嘅人解釋我讀嘅嘢啫（如果真係可以嘅話就好了）。

喺我嘅Matters入面，之後會講下日常生活喺社區或者城市空間中所發現嘅有趣嘅事，希望得到你嘅小小支持啦！