港難當前，宜多讀書少轉發訊息

港難當前，唔少朋友反映自己長期心情低落。自六月起，惡耗連連不絕，固然係導致情緒惡化既主因，但依本人愚見，資訊碎片化 (fragmentation of information) 亦係導致我城患上集體抑鬱既一大推手。

1. 少轉發訊息

相信大家都有經歷過，發夢前後打開telegram，成個人都會好繃緊。每日平均要keep住清過百，甚至過千條訊息。打開facebook睇，又會睇到唔同朋友share既嘢，或者見到唔同網民喺各大專頁洗板既行動（尤其開live嗰陣）。睇返whatsapp，唔同朋友又會send出咩〈手動轉〉既訊息。

〈手動轉〉、Gif圖、留言洗板呢類資訊傳播模式，其實形同病毒擴散。佢地喺短時間內，以極度重覆既出現頻率，以及極具入侵性(intrusive)既曝光率，一波波入侵我地日常接觸既每一個媒介。每日只要花15–30分鐘接觸呢類資訊，已經好容易受資訊入面既情緒蠶食。呢類訊息，淺則令人魂不守舍，深則蠶食一個人正常既理性判斷。

自六月起，依類病毒式訊息轉播，成日俾人濫用黎發放梗大量流言同恐慌式資訊。咩《區議員dq手動轉》同content farm fake news，正正係睇中「人遇到未知事物就會驚左先」呢個心理特質，務求令全世界人心惶惶，自亂陣腳。「就快被人cut網」既呢種流言，其實已有IT人士表示純屬空穴來風，因為喺香港實行既難度系數極高，無咩可能發生到。唯每逢大型抗爭，呢個流言就會死灰復燃，每一次都嚇死唔少人。《區議員dq手動轉》更加係荒謬，大家連區議會有無宣誓都未睇清楚，求求其其就手動轉，結果就係嚇到好多人以為區議員咩都唔可以做，淨係可以匿喺辦公室過世。

小結一：

要令自己唔好長期處於恐慌狀態，甚至陷入anxiety，我跪求各方好友，少啲手動轉，唔好睇content farm。一啲你睇完會毛骨悚然，但又不能確認真偽既嘢，唔好forward俾人。喺呢個已經夠荒謬既世界，大家唔需要多一則流言去嚇自己。相反，我地需要既係面對荒謬既勇氣。

2. 多讀書

書同上述資訊最大既唔同，係佢係完整既，段落之間既承接亦係理性既。病毒式訊息之所以令人憂慮，好大原因係因為佢地成日訴諸恐慌，當中收到既資訊往往自相矛盾，令人無所適從，不知何從何去。但一本完整既書，會包含一種世界觀，內有前文後理，而文字向來其一作用，就係用因果有序既語言邏輯，梳理現實中既紊亂。

當你喺現實接收到一大堆混亂既訊息，睇完一本好書，你就會識分資訊既輕重，識得評價資訊既價值，本來混亂既訊息就會自動歸位，得出一個合符情理既結論。當你對一件事或者一個趨勢，有一定既價值判斷，行動自然有所依據，亦不易在亂世感到迷茫。

或者有人會話：我已經忙住抗爭啦，仲點得閒睇書？呢種諗法，就有所忽略喇。書，往往包含既係一種精神世界，佢可以提供既力量同啟示，並非大家嗌下口號做下retweet就會得到。如果作者同你臭味相投，則有助堅定抗爭意志；如果係跟本土思潮或者歷史政治有關既書，可能有助大家思考如何突破抗爭困局，推敲未來走向。就算係一本無關痛癢既小說或者漫畫，都可以重拾大家對於人世既盼望，從而不卑不亢咁生存落去。要知道，今時今日活下去，都係抗爭既一部份。

小結二：

要讀書啊！書自身既完整度(coherence)同埋理性(logicality)，正正係手刃現實荒謬既不二心法。要心靈強健，對香港未來有所憧憬，而非merely feed on our fear and fury，香港先可以獨立於悲憤以外而自強。

光復香港前，務必光復自身。