人生第一份大伏工

大學畢業後，誤打誤撞咁入左間細公司做文職。間公司計埋我得五個人。第一日入去就覺得伏伏地，例如我個位係背住走廓通道，上司同事出出入入都會行過，我個位放咩同埋做緊咩都會比人睇到。雖然我唔會蛇王同埋份人算光明正大，但係好似有一種比人監視既感覺，點都有少少壓力。同埋茶水間只有雪櫃同水機，冇微波燼用，意味住午餐只能夠出街食，加上同事暗示老闆唔鍾意我地係辦公室食飯，所以冇得帶飯盒。呢兩樣都未係重點，以下既先係真正既伏位。

1. 合約放工時間形同虚設

合約個放工時間寫明係放五點半，但我除左頭兩日同最後一日，冇一日係準時五點半行出門口，而且OT係冇補水。當時我負責做採購工作，同我同一個部門既同事到五點半個陣係唔識起身走人，因為一黎係細公司做要一腳踢， 包裝、落訂、打一大堆文件比廠房、供應商同客等等，二黎個客係歐洲個開工時間係貼近我個放工時間，我未放工而個客一出電郵，就自然有野跟，一跟就唔知幾時放到工。仲有，老闆同老闆娘係唔會理員工個放工時間，過左放工時間仲見到我既話，是但叫我跟下文件，咁我就順理成章咁OT。

2. 奇怪規矩多籮籮

同老闆傾公事個陣要係老闆坐係房到唔係太忙個陣，如果唔係就會比老闆娘同阿姐鬧。更係一件小事如客人覆電郵寫幾隻字之前都要向老闆報告。工作程序簡單複雜化，唔跟程序做就比人「提醒」我係話唔到事。結果做咩都事倍功半，本來五分鐘可以做完既野要用半個鐘做。

3. 同事英文嚇親人

由於要對歐洲客，文件野自然離唔開英文。開頭出個英文電郵要先比阿姐改，再比老闆娘改，最後先出街。無奈阿姐個英文文法跟本亂來，而老闆娘有時又冇

睇到錯係邊。有時我串岩字都比佢屈串錯。到我同阿姐提議點樣寫會比較好個陣，佢應該因為嫌我煩而叫我之後直接比老闆娘改，之後情況先好少少。

4. 老闆啲字勁難睇

老闆啲字勁難睇，要同事讀比我聽先知寫咩。為左方便之後再睇返，我會將老闆寫既野重新寫一次比自己睇。之後每次睇佢寫既野個陣，我會拎埋佢之前寫既野一齊睇，花時間估下佢寫咩，好似研究緊古希臘文字咁。

結果，做唔夠三個月就頂唔順辭職走人。