自從九年幾前移居歐洲之後，每年由十一月中開始，一直到聖誕，都係我最喜歡嘅季節、最開心嘅日子。

一切由天氣開始。話說，我係好怕熱嘅人。我最唔鍾意香港嘅其中一樣，就係每年十個月嘅夏天 — 係呀，十個月。對於我嚟講，任何攝氏二十度以上嘅天氣，都係夏天，我都唔鍾意。係德國，夏天大約維持到八月尾至九月初，冬天一直維持到五月。（當然，以香港人二十度著羽毧嘅標準，德國冬天應該有十一個月。）

天氣唔再熱，係開心嘅原因之一、唔係全部。踏入十一月，住喺歐洲就會開始感受到節慶嘅氣氛。首先登場嘅，係美國感恩節 — 冇錯，感恩節的確唔關我事，德國感恩節係十月初，仲係冇乜人理會嘅節日。但係美國感恩節之後接住嚟嘅，就係世界聞名嘅「Black Friday」。

唔知Black Friday係乜嘅，可以去google一下。歐美嘅「傳統」，Black Friday係聖誕銷售旺季嘅開始，亦都係好多零售業紅色嘅balance sheet「轉黑」嘅起步點，故名「Black Friday」。一般嚟講，除咗New York Macy’s迫爆玻璃或者打交呢啲咁significant嘅場面之外，其實絕大部分嘅網店，都會提供Black Friday Discount。所以，唔一定要去同三百磅嘅肥佬肥婆爭頭位。

今年我Black Friday嘅焦點，就係Dyson V8吸塵機（我唔想喺呢度爭論Dyson好唔好用值唔值呢啲問題。你話唔好、我話好，最重要嘅係：我俾錢，唔係你）。老老實實，唔係Black Friday嘅七五折，我真係唔捨得買 — 講開又講，各位女士如果想你老公幫手做家務吸塵，唔使迫唔使兇，買架Dyson吸塵機就得。我買咗個幾星期，差唔多日日都吸塵，仲上癮到搵塵嚟吸！唔止我係咁，我有朋友都係咁。一件吸引嘅產品，真係可以吸引到唔做家務嘅人去做家務！呢啲錢唔慳得。

Black Friday之後，就係Cyber Monday — 我發覺呢兩個日子，同Martin Margiela或者Nohant嘅主線同副線品牌一樣，你開始分唔到邊個打邊個。Black Friday又有得網購、Cyber Monday又有得網購，你開始會話之佢，總之有得買就得。今年Cyber Monday嘅收獲，係Amazon一部工業用嘅重型電鑽、同埋Hadoro平時貴到唔捨得買（手機價錢）嘅手機殼。

好明顯，我唔係斷捨離嘅人，亦冇打算去做。

Cyber Monday嘅同時，亦都係德國著名嘅聖誕市集（Weihnachtsmarkt）嘅開始。為期四個星期、一直開到十二月廿三日晚上嘅聖誕市集，係你聖誕留喺德國嘅主要原因。雖然，喺聖誕市集，除咗飲飲食食之外，其他嘢你都唔會點幫襯（唔等使係主因，其他地方亦會比佢平）。不過，呢個地方係聖誕氣氛嘅主要來原。去聖誕市集趁吓墟、飲杯Glühwein（熱香料酒）、食隻半米長嘅德國熱狗、聽下聖誕歌嘅演奏；其實，同香港嘅年宵差唔多。

呢種歡樂嘅聖誕氣氛一直會延續到十二月卅一日大除夕，當凌晨十二點嘅煙花過後，你就會開始感覺到節日過後嘅失落，因為我哋冇農曆年。其實真正失落，係一月六日「三王來朝」之後，因為一般嚟講，呢日係德國人（包括我老婆）正式過完年、放完假嘅日子。下個再有得玩嘅節日，係Fasching（狂歡節），即係聖誕之後嘅六個星期，規模當然唔可以與聖誕相比。

本週文章：

中環遊戲（45）你與我其實熟得很

……如果你哋仲記得第33集《台北晚9朝5》嘅內容的話，你哋都可能會有種感覺，覺得我同Cindy嘅關係，唔止朋友咁簡單；其實，你哋冇感覺錯誤。我同佢的確曾經互有好感。如果唔係礙於我哋同Chloe嘅關係，我諗我哋喺好多年前、當Cindy被派嚟香港工作嗰陣，我哋已經可能成為一對……

中環遊戲（46）不成功、便成仁

……我檢視緊Cindy前臂上嘅傷勢。佢前臂有一撻巨型嘅瘀傷，應該係俾鈍器擊中所造成。憑肉眼觀察，佢應該冇骨折，但咁大型嘅鈍器瘀傷，佢有骨裂亦都唔出奇。我佩服嘅係，佢受咗咁嘅傷，竟然仲可以拎得到咁重嘅行李；女人嘅忍痛能力果然非凡……

隨想（2019/KW49）通往民主之路嘅獨裁陣痛

……喺目前未有任何突變或者新嘅有利因素出現嘅情況下，我對明年立會選舉嘅預計係悲觀嘅。唔係驚而家嘅民氣到時已經耗盡（雖然機會唔細）、唔係擔心到時選到出嚟嘅又俾人DQ晒、更加唔係擔心冇合適嘅人出嚟選。我擔心嘅，係遊戲規則嘅設計，基本就係為咗要「民主派」輸而設……

《中環遊戲》係我第一輯完全放喺Medium收費牆之外嘅小說，供讀者文友免費閱讀。作為一個全職作者，我喺寫作上面嘅收入，就只靠LikeCoin嚟支持。所以，希望各位「讚賞公民」能夠喺上面嘅LikeCoin widget拍滿五拍，等我可以維持收入。未加入成為「讚賞公民」嘅朋友，可以喺呢度加入：https://liker.land/Civic?from=herrfung 。

另外，如果你加入得夠早夠快的話，我仲會私人回返第一個月嘅月費、港幣卅八蚊俾你。只要你喺加入之後，去呢度：https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限，先到先得，送完即止。

P.S.: 最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。