4月10日粤语

喺佛山出世，睇香港慨电视台，我成长过程中梗系使用粤语啦。所以今日呢篇日记，用粤语写。

寻日慨日记最后贴咗舞台剧《窈窕淑女》Part1慨YouTube视频作为今日呢篇日记慨引子。改编自《My Fair Lady》音乐剧，以上世纪30年代慨香港作为故事背景。当时香港除咗土生土长慨香港人以外仲有嚟自五湖四海慨人，因此除咗标准慨广东话之外仲有上海话、潮州话、台山话（四邑话）、客家话、顺德话等等，再加上同英国喺行政管治、经济、文化慨紧密交流，当然英语都占好重要慨角色。如果睇完Part1感兴趣想睇埋Part2同Part3 ，可以跳转去YouTube平台继续睇。

呢出舞台剧当然冇男主角谢君豪成名作《南海十三郎》咁出名，不过我觉得呢出舞台剧揉合咗好多方言、口音，喺语言上丰富并且体现到包容慨文化风气，喺改编原著、移植到香港背景上处理得非常成熟自然，所以我自己比较钟意。

另外仲有一个原因系同我成长经历有相关。我10岁嗰年全家从佛山搬到江门，从一个标准广东话慨环境搬去一个标准江门话慨环境，虽然未去到culture shock慨程度但系都好大冲击。加上我妈妈一直非常嫌弃江门话口音（同《窈窕淑女》慨谭教授一样），所以尽管我好快就学会讲江门话但从来都唔会喺日常生活里面讲。互联网时代开始出现以方言为特色慨emoji，潮州话、江门话都有，江门话比较有代表性慨就系“抠磨”（即“这样吗”）同“地随”（即“知道”） 。

喺我高考之前一直都系讲粤语，学校老师上课、同学之间都系讲粤语，直到读大学因为大学同学五湖四海然后不得不开始学讲国语。当然小学有学过拼音，国语听得明，但系要开口讲就好困难。刚好大学时期台湾慨综艺节目可以通过网络下载，大家都好钟意睇《康熙来了》之类，所以我就边睇边学。而家我慨国语都系会有港台腔。

虽然喺大学不得不讲国语但系只要我知道边个同学系广州人、佛山人、湛江人（只要系讲粤语慨广东人）我都会坚持同对方讲粤语。大学时买我人生第一部手机就系Ericsson慨A2638sc，选择呢部手机慨一个主要原因系渠慨输入法可以打到“慨嘢咁佢哋啲”粤语字。

大学毕业之后工作，2005年曾经去过胡志明市出差，喺当地有华人同事，同渠哋交谈慨时候听到比较原汁原味慨粤语。渠哋当地其实都睇TVB剧集，只不过通常系租录影带或者后来慨VCD、DVD睇，所以文化上差别唔大。越南有唔少华侨系广东人，而喺越南呢个脱离中国大陆相对比较封闭慨环境，保留咗一啲比较传统慨俗语、表达方式。

但系随住人口流动同互联网发展，广东话都越嚟越简化同国语话，大家慨口头用语渐渐同互联网热词接轨。而且呢种趋势已经蔓延到中国以外慨华人圈。 2018年我出差去吉隆坡，当地华人有唔少讲粤语，但系当时渠哋已经会娴熟使用“666”呢类互联网流行词，尽管唔知到底“666”到底具体乜嘢意思但系都会用。

吉隆坡（或者讲，马来西亚同新加坡）畀到我一种以前香港慨感觉，三大民族、多种文化共存，华人圈子就有粤语、客家话、福建话、潮州话等等，同时掌握几种语言慨人比比皆是，大家都习以为常。其实，开放包容就应该系咁样，冇必要强行推崇单一语言同文化。以后香港会唔会变成而家慨广州佛山咁样，粤语越嚟越少人识讲、国语变成主流？以后国内会唔会连英语呢一科都取消埋呢？