彩虹邨重建｜愛群快餐　漫畫世界　陳記報社　華麗理髮　老牌小店　何去何從？

11 月 13 日

愛群快餐店、陳記報社、華麗理髮公司、漫畫世界⋯⋯走進彩虹邨，恍如時光倒流，邨內地下，盡是買少見少的老舊商舖將會消失。政府近日公布彩虹邨將分三期重建，金碧樓等最快於 2028 年清拆。

文｜集誌社記者

愛群快餐店、陳記報社、華麗理髮公司、漫畫世界⋯⋯走進彩虹邨，恍如時光倒流，邨內地下，盡是買少見少的老舊商舖將會消失。政府近日公布彩虹邨將分三期重建，金碧樓等最快於 2028 年清拆。《集誌社》記者走訪受第一期重建影響的商戶，金碧酒家說「做到拆為止」，望他日在新彩虹邨重置；但更多老商戶說勞碌半生，是時候休息，將與相伴多年的街坊告別。

愛群快餐店　同系五店變剩最後一間

黃底紅字收銀處、不鏽鋼水吧、膠托盤、墊枱紙，自 1984 年開業的「愛群快餐店」，是所餘無幾的港式快餐店，仍封存住 40 年前的舊式裝潢。 75 歲的老闆蔡文強，原做藥房生意，70 年代香港快餐文化盛行，他開始涉足飲食業，在梨木樹邨、順利邨、順天邨快餐店。生意上軌道，看到房署登報為彩虹邨快餐店招標，便入表申請，結果一擊即中，在五、六個投標者中脫穎而出。取名「愛群」，他笑言「亂咁改」，因做屋邨生意，有「服務人民」、「愛護人群」之意。

與 60 年代尾、70 年代初創立的大家樂、大快活一樣，愛群採用自助形式，先到收銀處落單，再到水吧取餐。快餐店主打生炸雞脾、沙律薯條、牛扒等西餐，大受那些年的後生仔歡迎，後來為迎合港人口味，亦加設了中式飯餐，大多食物至今仍為自家工場製造。全盛時期，公司有五間分店，但不少隨領展（前名領匯）收購，敵不過昂貴租金相繼結業、頂手，現時只餘彩虹邨一間。

取名「愛群」，蔡文強笑言「亂咁改」，因做屋邨生意，有「服務人民」、「愛護人群」之意。

昔日人龍店　曾日日逾百人店外排隊

蔡文強記得，以往生意最好時，很多學生幫襯，「日日都要排隊」，百多人的人龍排到店外，「做都做唔切」；但現在學生人數少了、附近又多了選擇，生意只餘下一半。在其他屋邨也開過分店，他說彩虹邨特別團結，當年金碧酒家的阮老先生，常號召參與東華三院籌款，一班商戶二話不說響應，又會每年宴請邨內老人吃飯；其他店的老闆亦常來愛群幫襯，老商戶們感情深厚，「佢唔捨得我，我又唔捨得佢。」

蔡文強也難忘彩虹邨的人情，「啲人好少搬來搬去，好多住開就住幾十年」，即使搬走甚至移民外國，也會特意返來探望，驚訝「你哋仲喺度嘅」。彩虹邨治安亦相當好，以前別的分店，「有時朝頭早送面包嚟（放門外），啲人會攞走咗」，要另行鎖住，但彩虹邨從來也不需要。

彩虹邨第一期重建涵蓋金碧樓、碧海樓、丹鳳樓，邨內食肆、超市、診所不少集中在金碧樓地下，蔡文強自言「初初我都以為佢唔會拆呢度先」，憂街坊日後生活或相當麻煩。他說房署曾問他重建完成後，會否繼續在邨內經營，但他坦言「我年紀大梗係唔做啦，我哋都係打算退休嘅時間」，視乎已移民外國的兒子會否接手；重建期間也不打算搬舖，「出面啲租金好貴」，「停吓先，休息吓先」。

「一碟飯、做一碟麵，都係好辛苦做出嚟」

要離開彩虹邨，蔡文強固然「唔捨得啲街坊、唔捨得啲舊伙記」，皆因現時快餐店十多個員工，大部分做了十年甚至 20 年以上；一班街坊亦見慣見熟，隨時也可聊上幾句。清拆巨輪無法阻止，蔡文強說也是平常心照常經營，「搞好啲食品畀人哋」。正如當年涉足飲食界，與老師傅花不少工夫試味、研製出配方，汁水亦堅持用大廠出品、「攞啲靚嘢」，

蔡文強說，每個做食物的老闆，也希望得到顧客認可，「做一碟飯、做一碟麵，都係好辛苦做出嚟，經過好多層次」。他常到店坐坐，總愛看顧客的食桌，「見到佢哋樣樣食清晒咪最開心」，說到這句，他瞇起眼睛、露出牙齒笑了。

漫畫世界 　400呎空間七萬藏書

400 多呎的店面，擺滿多個高至天花的書櫃，共存放七萬本小說和漫畫，是香港現存少數可租借漫畫的店舖「漫畫世界」。現年六旬的老闆張氏夫婦，九十年代初原在九龍城經營動畫帶出租店，但隨漫畫行業蓬勃，在 1993 年轉型為漫畫店，最高峰時在各區公屋商場擁有十間分店，是當時全港四、五百間租書店的一員。張太憶述，當年半夜三更要上出版社拿書，確保讀者當日有新書可看；店舖開門前已有人排隊，到了放學時間更是「成屋都係學生」，三四台電腦同時租借，熱門漫畫如《男兒當入樽》，「開兩套都係唔夠」。

不過，自房署 2005 年將多個公屋商場出售予領展，漫畫世界的帝國崩裂。「佢一封信畀你，幾年幾月幾日，我哋唔續約畀你，麻煩你清空間舖」，沒有原因，店舖就無得留低。「你租書依個行業係唔合佢個商場個 level」，張先生說，領匯租金比房署貴一倍，還要額外付管理費和分成租金，根本難以負擔，漫畫店亦「無一間少一間」。

2007 年，黃大仙龍翔中心（現黃大仙中心北館）的分店不獲續租，張先生剛好接兒子上學時，看到彩虹邨有吉舖，最終投標成功，落戶金碧樓。張先生坦言，千禧年後，漫畫租借行業已經走下坡——初時搬來彩虹邨，尚有不少學生會來幫襯，但後來的小朋友「幾乎唔識（租書）」，「入都唔入（店舖）」。現時漫畫店生意只剩兩三成，有時收入也抵不上租金。

近年主力租借小說　變陣流動書車

時代變遷令行業式微，當娛樂五花八門、網絡資源唾手可得，租借漫畫不再是許多人的選項。近年，漫畫店主力租借小說，客人也改以成年人為主，不少人山長水遠從上水、天水圍、筲箕灣而來，專程尋覓舊書，「啲客講畀我聽，『我上網睇過，全香港得你依間有租書咋』」。張先生亦會每周兩次駕流動書車到以往有分店的將軍澳，讓熟客能繼續租書。

重建消息一出，不少熟客都擔心自此「無書睇」。自言以往「想咗好耐」不再做下去，卻一直沒有實際行動，這次張先生張太終有了決定——若租金維持不變，預計漫畫店便將於明年三月租約屆滿時結束。

熟客推動撐落去　藏書大概變廢紙

「最唔捨得就係佢哋咋嘛我」，張太望着正在選書、隔幾日見一次的熟客，有點感觸。「我唔做，佢哋就冇地方咁舒服可以隨便揀書嚟睇⋯⋯最唔捨得就係佢哋嗰班客，係佢哋推動到我哋繼續撐落去。」不過，想到當年搬舖花了一個半月，弄到手腳受傷，雙手至今仍感痛楚，張太說已不想再經歷多一次。「冇辦法啦，有一日書就睇一日囉，我哋有一日咪做一日囉」，張太苦笑。至於店內六七萬本書，若果賣不出，大概便要送往廢紙回收了。

現年六旬的老闆張氏夫婦，九十年代初原在九龍城經營動畫帶出租店，但隨漫畫行業蓬勃，在 1993 年轉型為漫畫店。

報檔夕陽　陳記報社 在彩虹邨由樓梯底開始

步入夕陽的，還有報紙檔。老舊木頭車上一排馬經，牆身煙架放滿香煙，是彩虹邨現時唯一報檔「陳記報社」。現年 70 歲的陳耀民是第二代負責人，父親早在牛池灣村已經營報檔，至 60 年代搬到金碧酒家對開樓梯底，一個 30 多呎的樓梯舖，後來因輪椅無法出入，搬來現時舖位，由陳耀民於 90 年代接手至今。

陳耀民記得，六、七歲便會從牛池灣村跟着父親出來看舖，凌晨五點幫忙疊報紙、收錢，回家吃過飯，就去牛池灣的三山國王廟讀書。小時候從不覺悶，反而覺「好得意」、「好好玩」，有時更會提早起床，凌晨兩、三點跟父親搭「嘩啦嘩啦」出中環拿報紙。後來牛池灣村因興建地鐵站而收地，一家人搬到彩虹邨金漢樓，他難忘家家戶戶「打開門」，「夜晚食完飯個個坐喺冷巷度傾偈」，「有時煲糖水又會𢳂罐過嚟，煲湯又會𢳂罐過去。」

報業盛世　日賣三千報紙馬經

陳耀民說，在報紙行業最興盛時期，一天可以賣近二千份報紙、一千份馬經，下午三點顧客便大排長龍，等買《星島晚報》。 80 年代彩虹邨也很興旺，有多檔生果檔、燒臘檔，一到五點鐘附近寫字樓收工，「個個好似賽跑咁推晒出去馬路（擺檔），車都行唔到」，人潮水泄不通。

「而家無嗰個歌仔唱喇。」當電視 24 小時也有新聞、又有智能手機、社交媒體打殘傳統傳媒，賣報已成夕陽行業。現在報社一日下來，只賣出百多份報紙，也要靠賣飲品甚至「通鼻棒」來幫補生意。記者訪問期間，只有數人來買馬經，附近商戶亦大多落閘，顯得寧靜冷清。陳耀民猶記得，當年「老豆教落千祈唔好放棄，呢個爛棉衲（賣報紙），梗搵到食」，「點知𠵱家搞到真係搵唔到食」，他苦笑。

面對重建，陳耀民不違言：「望佢嗱嗱聲拆，越早越好」，「我哋喺度做咗幾十年，想退休，不過有間舖喺度，叫做消磨吓時間啫」。他仍會「做到拆為止」，但坦言老街坊「唔係走咗就搬晒」，邨內又多了許多新移民和少數族裔，他對彩虹邨已沒有不捨：「你件衫爛就要換，唔通住到做古蹟咩」。這些年來，陳耀民習慣晚上九點睡，凌晨兩點半起身，「就算幾夜瞓都係嗰個時間起身」，他期待清拆後，可以過過「老人生活」，「瞓到自然醒」。

華麗理髮公司　 經典黑色飛髮椅

在清拆那刻結業，是不少邨內老舖的想法。步入擁有 60 年歷史的上海理髮店華麗理髮公司，眼前是綠白色格仔地磚、一排黑色飛髮椅，還有印有公司名稱的毛巾和鐵皮風筒，不少均自開店之初沿用至今。現年 77 歲的老闆徐先生，對重建坦言「冇咩好講」：「見步行步啫」，「你睇我年紀幾大，我依家日落西山，都唔需要講其他嗰啲大計啦」，「維持到就維持，維持唔到就 over」。多年做街坊生意，見證熟客遷出、移民，「唔捨得係唔捨得，但係歷史嘅演變，唔到你唔捨得，歷史個演變嘅過程係咁。」

熱巾敷面　修眉剃鬚

與徐老闆同歲的劉師傅，自 11 歲學師，17 歲成為師傅，開過自己的上海理髮舖，六年前過來華麗理髮幫徐老闆手，專責服務男賓。「依啲刀而家冇人識揸㗎喇」，上海理髮師傅會先用熱毛巾替客人敷面，再用剃鬚刀為客人修眉、剃鬚，客人需傾前洗頭。劉師傅說，雖然也想和徐老闆一起做下去，但年紀大了也是時候休息：「等四年（清拆開始）都 81（歲），仲做咩啫」，「唔做喇，做鬼咩，唔通真係做到死呀？」

發興茂昌雜貨　散裝白米　大米桶變小膠兜

發興茂昌雜貨同是 60 年老店，現時負責的彭先生，原在秀茂坪邨經營雜貨舖 30 年，當年因該邨清拆無處落腳，便來彩虹邨的親戚店舖「做住先」，怎知一做就是 20 多年。店內貨品以手寫價錢標示，售賣各式調味料、飲料、罐頭食品，亦存有盛載散裝白米和豆類等的膠箱。彭生說，隨超市出現、消費模式轉變，雜貨舖亦改變了不少，以往店內有十一、二個傳統大米桶，現時亦只餘一個小膠兜，來幫襯的多是中老年人，「後生好多都唔太鍾意嚟呢啲地方買嘢」。彭生嘆，在北上消費和淘寶下，生意平淡，大機會明年年尾便不再經營：「唔做喇，68 歲喇依家都，出年 69 喇。」

金碧酒家　再戰江湖

重建下，當大部分老店打算就此結業，有店舖則表明望繼續經營。主打港式懷舊小菜的金碧酒家，負責人貞姐說，尚未知何時確實清拆、安置賠償方案如何，需待政府說明才能有確實的答覆。「你而家問我呢，我都係做到拆為止囉，但係點知點樣呀，你唔知㗎嘛。」不過，貞姐說着補充，「其實我梗係希望佢重建真係⋯⋯喂彩虹邨第日十幾廿年後都有金碧酒家都得㗎嘛」。即是想新彩虹邨有金碧？「梗係啦，有仔、有女、有細佬㗎嘛」，至於重建期間，可能「休息先囉，再戰江湖」。