助慶

 Photo by Stephen H on Unsplash

王小二過年，大家都知下一句係乜，不過，年年難過年年過，祝願大家平安。

自從復常以來，基本上，遊行已經不存在，每次有人申請，通常未批准，申請方已經自動取消，即使係被認定為愛國愛港的親正苦組織，一樣係咁。唯一一次，係將軍澳居民發起抗議填海的遊行，但限人數，好似一百人以下，全部登記姓名，全程要戴號碼牌，全隊人要在顏色帶劃出的範圍內，沒有人可以中途加入，當時已經好多批評，唔行好過行。之後，冇再有遊行出現。

而今次週末，聽講有人想攪汽車巡遊，據說有多部內地右軚車申請來港，一起參與活動。最後，活動完全取消。人哋嚟贈興都唔得，驚多人聚集，俾人騎劫！咁大時大節，佢哋都想做啲嘢，與民同樂咁啦。不過，佢哋真係冇乜計仔，思維只有蛇齋餅糭嘅模式，一唔係照抄人哋做過嗰啲，所以一聽到免費搭天星小輪，免費搭電車呢啲，試問有幾多人覺得興奮莫名？一年到晚都有人攪呢樣嘢，住九龍新界嘅人，唔通為咗呢啲免費就過嚟港島同人逼咩？

咪住先，佢地唔係想試吓可唔可以吸引到一百萬人，甚至乎二百萬人去逼爆港島呀嗎？佢哋嘅警覺性會唔會低咗啲呢？定係佢哋想引蛇出洞，怪唔知得佢哋部重兵响港島，重話有啲人如果响維園嗰頭出現可能即拉。但係電車一定經過維園噃，咁唔俾人落車呀？重有人响維園攪嘉年華會㗎，咁出邊就大批人員戒備，重出埋裝甲車，然後話俾全世界知，我哋與民同樂啫！

啱啱有單侮辱國旗案報導出嚟，個被告話見到成街紅旗令佢好煩。轉個頭，有正苦官員表示，見到咁多國旗區旗令佢好興奮。我絕對冇懷疑，個人喜好因人而異，好正常。好似有人鍾意食榴槤，有人一聞到就掉頭走，冇話邊個啱邊個唔啱。而呢啲大時大節，有啲地區就特別多，鋪天蓋地，其實有所謂嘅「Too much good can be as too much bad」，唔係多就一定好，不過，有啲人嘅概念就係越多越好，所以一啲設計呀，佈置呀，佢哋係唔會信奉留白留空嘅，有咩嘢空位，就完全填滿佢。而最大原因，可能就係做大條數，做一個設計，用五百支旗，同用一千支旗，價錢已經差一倍，明未？所以，點解越多越好！

另外佢哋一定諗到食！一年四季都話美食展，又咪來來去去都係嗰啲嘢。今次要搵人做啲乜嘢優惠，乜嘢七一折之類，但係個個牙痛咁聲，咁高優惠冇錢賺，最後有幾間連鎖快餐店響應下，指定某啲產品有大優惠。不嬲過時過節，大家會做節，買魚買雞斬叉燒加餸，如果唔係，出去食個應節餐，聖誕餐之類，總之，個前提係比平日食好啲。今日，佢哋只係鼓勵人去快餐店，貪圖佢嗰七折八折食炸雞漢堡包，唔係化？當人哋十歲以下細路仔，去麥當勞開生日會已經要感激流涕呀！

有已完提議香港嘅保安員可以配備長叉作自衛，令人噴飯之餘，不免黑人問號，點解係長叉？呢個乜嘢時代？而且佢知唔知香港啲大廈保安的工作環境，有啲真係得個電話亭咁大，點樣舞起支長叉？而佢哋巡樓嗰陣，係咪要叉不離手？再係咁落去，可能人人都要帶備佩刀佩劍，出入自保。嘩，再配合埋個個改穿華服，你就係郭大俠，佢係小龍女，呢班又自認竹園七賢，重有丐幫幫主，紅花會總舵主，一下子倒退千年，大唐盛世再現，振興中華，武林盟主，指日可待。唉，可惜江湖從此多事！

「你咁高，我又叫阿超，加埋就係高超。」呢句唔係周星馳嘅無厘頭對白，係出現响現實生活之中，重要係响電視轉播時，全國（唔敢話全世界）都聽到睇到。大家倒抽一口涼氣之餘，笑到假牙都跌咗出嚟。似乎Nancy多數有個特點，佢哋嘅幽默感好與別不同嘅。所以佢哋好少會講笑話，但偶一為之，都令人打哂突。唔知大家重記唔記得，之前有位，平時西口西面，但有一次對住班小朋友，突然講句：「明瘡易擋，暗瘡難防。」大家拗晒頭，唔知佢做乜無端白事講句咁嘢。

突然想到，好可能根本唔係佢自己諗出嚟，或者唔知响邊度聽到，覺得好笑，又簡單易記，咪响某個場合拋吓書包，等人覺得佢有輕鬆嘅一面囉。不過，幽默感係講Timing，講對象嘅，有乜差池，可能會有反效果，甚至令自己成為被恥笑嘅對象添。不過，能夠令大眾開懷大笑，今時今日，都算係好事一宗囉。

We laughed until we had to cry.