【廣東話長篇小說】陪朋友去自修室追女神，點知女神鍾意咗我【自修室】#05

#05

心裡定下策略之後，我便湊近她說︰

「係呢，呀華同學，我哋咁耐都未知你究竟叫咩名？」

「我？我……你叫我華同學咪得囉 : ) 」

她頭也不抬地拒絕，意思當然是我們從此不會再見，所以並不需要知道彼此名字。

我冷笑一下，開始翻手上的數學MC 題，馬上就在第一集看到她寫得工整的名字，然後朗聲讀出︰

「Wah Chi Yan！哦，原來你叫華子欣！幾好聽呀，點解唔肯講啫？阿堅你話係咪？」

華小姐霍地轉過頭來瞪著我，白皙的臉頰瞬間變成粉紅色，伸出右手想搶走那本MC題︰

「俾……俾返我！」

「哎哎哎～點解呀？你又話借俾我嘅？我啱啱先開始做咋喎～」

我把MC題放去阿堅的桌上，華小姐長得不高，手也不長，伸了幾下發現拿不到，便站起來去阿堅那邊拿。

中計了！

我趁著這個空檔，馬上拿起她桌面上的練習簿，終於看到她的中文名字︰

「哦！原來係華子昕！哇，呢個昕字我真係唔識，係咩意思架？」

她這才發現自己中計，驚呼了一聲又跑回來搶練習簿。我坐到書桌上，把練習簿高高舉在頭頂，她跳起來想搶，但怎麼跳都只能碰到我的手臂。

「其實叫子昕咪幾好，點解要改個網名叫asd34567嘅？唔想俾人知嗰個係你？點解呀？ : ) 」

「關你咩事喎！快啲俾返我，我要溫書啦！」

她滿臉通紅、努力瞄準我的手卻怎麼跳都碰不到的樣子，令我忍不住發笑。

可能我們動靜太大，自修室裡開始響起了「shhhhhhh——」的環迴警示音。

阿堅覺得尷尬，連忙拍拍我︰

「阿翔，唔好玩啦，呢度自修室嚟架。」

「呀係喎……太少嚟自修室，唔記得規矩，sorry sorry。」

我直迎著她的怒視，把她的練習簿還給她，然後跟阿堅說︰

「我諗而家華子昕同學都唔係好想坐我隔離，不如你同我調位啦。」

她分明聽到我們的話，卻忙著用手帕輕印通紅的臉，理都不想理我們。

阿堅望了她一眼， 正猶豫不決，自修室的職員突然走過來說︰

「幾位同學，我已經收到幾單投訴話你哋騷擾到其他人。其實自修室外邊仲有好多人等緊位，不如你哋食個飯先，一陣再返嚟排過隊啦。」

在職員不容分說的高壓下，我們一行三行被趕出自修室。我跟阿堅你眼望我眼，完全沒想過事情會變成這樣。

華小姐氣沖沖地奪過我拿在手上的數學MC題，用力在我手臂上一拍︰

「最衰都係你！我咁大個女都未試過俾自修室趕出嚟架！瘀死人啦！」

「咁凡事都有第一次嘛……」

她狠狠地鄙視我，然後轉身就走。

我連忙向阿堅狂使眼色，他醒目地追上去︰

「華、華同學，唔好意思呀，阿翔佢好少嚟自修室……都係我唔好，死都要拉埋佢嚟。對唔住呀，真係唔好意思……」

她沒有停步。

「我……我知道嗰邊仲有另一間自修室，平時都比較少人……如果你唔介意嘅話，不如我哋去碰下運氣……」

她停下腳步望了望阿堅，抱著大布袋的胸口不斷起伏，似乎在等自己消氣。

我見她態度軟化，厚著臉皮走過去說︰

「係我衰，我請你食麥當當呀，你唔好嬲啦。」

她的杏眼在我臉上骨溜溜地打轉，良久才吐出一句︰

「……要加大再加蘋果批！」

我失笑︰

「買埋開心樂園餐俾你又點話？」

「唔該，我要個開心樂園餐，要栗米再加個蘋果批，後面呢位先生俾錢。」

asd34567小姐，真名華子昕——重度MSN使用者，喜歡寫多元宇宙和平衡世界之類的blog，A.Maths高手——而且到了十六、七歲還喜歡開心樂園餐。

我們坐在自修室附近一家麥當當的四人桌，她一邊吃薯條，一邊組合那個無聊玩具。仔細一看那個玩具，跟她的孖辮造型相當配，我忍不住笑︰

「我話請你食啫，你唔使真係拎個玩具出嚟玩架？咁低能。」

她用杏眼瞄了瞄我︰

「夠啲人改自己網名做flying far咁低能？」

「喂，咁我個名係咁……」

阿堅連忙在旁邊打圓場︰

「兩、兩位……食完呢餐和頭酒，大家不如努力溫書啦？其實我覺得呢個位置都OK，唔算嘈，如果留喺度溫書你哋覺得點？」

「我無所謂，反正我本來就無諗住要溫書。」

她白了我一眼，彷彿在怪我自己不溫書還破壞她︰

「我都係覺得自修室好啲。」

「咁樣……陣間食完嘢，就去我頭先講果間自修室睇下有無位啦……好唔好？」

我連連擺手︰

「你哋兩個去啦！去自修室嘢又唔講得，動作大啲都唔得，慘過坐監，我寧願留級呀！」

她瞪大杏眼望著我，那表情彷彿看到地底爬出來的怪物。我乾脆擰過頭，一於少理。

我做了這麼多事，本來就為了給阿堅製造機會。所以他們兩個去讀書，我回家睡覺，怎麼看都是最佳選擇！

吃完這餐和頭酒，阿堅跟她兩人並肩離開麥當當，我只覺得功德完圓。

我邊聽IPod邊站起來，放低了肩上重擔，現在只想快快樂樂回家繼續打機。沒想到走到麥當當門口，一條人影突然衝過來把我抓住︰

「我諗清楚啦！我哋都係一齊溫書啦～ : ) 」

阿堅追在她身後，喘著氣說︰

「華……華同學話、擔心你會考成績，所以想同我一齊督促你溫習……」

「吓？」

「佢、佢聽到你話留級，想幫你，所以……所以我哋搞一個三人溫習小組，每日一齊溫習直到考完試為止，目標係要你拎到18分咁……」

「痴線！我有話過想考18分咩？」

「放心啦，我哋又點會漏低你喎！一齊升中六啦～ : )」

她示威似地看著我，臉上又再浮現那個純真的惡魔式笑容。

by又曦

新作連載速度由Facebook反應決定，睇最新一集&追稿請到︰http://bit.ly/2U90wzw

===

想聯絡作者？

FB︰@又曦

方格子︰@又曦

matters︰@又曦

IG、medium︰@morning_rays

紙言︰@又曦