鬼拍後尾枕！

Photo by Hennie Stander on Unsplash

正苦宣布新一輪的調整社交距離措施，正當人家已全面解禁，這裡依然小修小補的，在玩數字遊戲。例如上一輪的放寛，甚麼由四人限聚，擴展至十二人，意義何在？這個四人限聚足足維持了三年，終於肯改動，似乎正苦覺得是一大讓步，市民應該謝主隆恩，但三年來，對仍要每天逼地鐵上下班的人來說，有何分別？

部分場所不再「主動」查核「疫苗通行證」（真的特別多名目，點樣主動被動呀？駛唔駛出本字典解讀呢？），於是有記者詢問，既然不用主動做，好似冇乜大作用，會唔會取消「安心出行」？

但呢位醫衞局副局長冇正面回應，但佢咁講：「就好似帶身分證出街咁，你入商場或者你去街，你唔會主動拎張身分證出嚟俾人睇，但如果執法嘅人員查你身分證，你要出示到身分證。」

嗱，鬼拍後尾枕啦！將「安心出行」同身分證相提並論，你話點會有取消的一日？

好多人之前已經講過，香港正苦嘅防疫政策，從來都係四分政治任務，三分報復，二分維穩，一分抗疫！之前重可以話係戲言，講兩句諷刺一下，但幾年落嚟，乜嘢都現晒出嚟，都費事掩飾啲乜嘢。而且大權在手，想點就點，你司法覆核咩，我就行政修例，連上訴都嫌慢。

連突首都講埋紅碼黃碼不會取消，大家要習慣呢種全民監察只會成為常態，再配合埋之前提過的十八區「關愛隊」，George Orwell小說《1984》的情節，竟然在現實中出現，而且更全面更徹底，不禁令人心寒。

另外，城中某地產商大放厥詞，說廣東話已Out，錢途都在大灣區，大家要學好普通話，然後再加一句：再用廣東話就係「戇居」！先不說「戇居」是廣東話，他整篇講話都是用廣東話，整件事係相當有反差同衝突，如果佢係做棟篤笑，咁係有笑點。但係嚟真嘅，就變成示範乜嘢叫做「戇居」！

我覺得一個人能夠講多國語言係好事，唯一唔明嘅，係點解學普通話就要放棄廣東話？而且大多數香港人都係用咗廣東話成世，點可能放棄，就算唔俾你講都好難忍到口。而呢條蛋散重舉幾個例，話以前啲錢途响美國，所以大家去學英文，後來變成學日文，呢啲都係事實，佢已經講漏咗韓文，呢十幾年，真係有唔少人去學韓文，不過未必係想搵韓國錢，反而係追韓劇，追星，聽韓國音樂。但係冇人會因為學另一種語言，而完全放棄自己嘅母語嘅，喺咪？更重要一點係，絕大多數人係因為自己想去學而自發去做，如果係有人，特別係長輩，建議你去做，效果肯定相反。教育局一直以來，唔多唔少都想推普通話教學，好多抗拒，就係因為太Hard Sell，唔係自願去做。

所以今次事件之所以令人反感，就係佢太過硬銷，而且重要貶低廣東話嚟抬高普通話，食相之難看，令人嘔心。佢重話希望今次係佢最後一次用廣東話發表講話，好明顯係一個錯誤，佢應該今次已經就用普通話講，反正佢只係想講比主子聽，佢用廣東話講，主子聽唔明，咪好嘥料？至於將來用普通話發表，希望到時有人請有人想聽啦。不過，都不妨未雨綢繆開始準備訓練，由而家開始，全用普通話溝通。所以出門時同下人講：「阿邊個，同我安排（或準備）（唔可以用叫啦）一架計程車（或出租汽車）（唔好講的士），我唔可以同人逼公共汽車（唔好叫巴士）。」當然，去到酒樓，唔好叫人部長，伙記，侍應生之類，全部叫服務員啦！嗱，千祈唔好叫人同你落個Order，或者Book張枱聽晚，全部都係廣東話嚟㗎，重有一系列嘅，乜嘢「同我check下個Schedule」，「update咗啲data未呀」，「有冇得Claim㗎？」，「約Uncle Sam去食Lunch」等等，一講出嚟就露底㗎！

你可能覺得我好煩，想炳我呢，小心啲，因為廣東話粗口好就口，一唔小心就一串咁出嚟，咁就前功盡廢，鬼拍後尾枕㗎啦。

記住用「媽你個B！」啦，祝你好運！