相信獨裁會發達？

作為球迷，每逢大賽之前，都會上香港賽馬會睇睇賠率。對賭波興趣極低，點解仲要睇賠率呢？因為賠率反映民意：

自細都經常聽到賭徒講，要去澳門賭贏何生，要入馬場賭贏馬會，到中學年代，我算術成績極差，校內考試一向全軍覆沒，代數公式完全白痴，公開試能夠僅僅合格，全靠仲識答三角幾何以及或然率；事實上從或然率，我明白賭徒其實並非同莊家（何生或者馬會）賭，賭徒其實一直同其他賭徒賭，莊家正正透過賠率，令到少部份勝出賭徒即使贏錢，其實只不過將眾多落敗賭徒注碼贏走，莊家就從來未有賭過，只不過負責安排賭局，從中抽取「收服務費」。大家愈賭得多，莊家愈賺得多；真心要何生馬會輸到貼地，賭徒唯一方法：戒賭。

今屆歐洲國家盃即將揭幕，上馬會睇賠率，發現A組四隊國家隊之中，竟然將匈牙利列做最大冷門？比蘇格蘭更加冷門？睇返A組四隊，德國即使近十年成績今非昔比，始終屬於傳統名牌，又身為主辦國，大家視之為A組出線大熱門，而馬會賠率亦清晰反映出，雖然愚昧，不過合理。然後瑞士被列為A組次熱門，亦屬正常，畢竟球隊守強攻弱，入球甚少，但勝在失波更少，難以被擊倒。

不過如果上屆歐洲國家盃有睇匈牙利（快速回帶：身處死亡之組，1比1和法國，2比2和德國，誇張吧？連葡萄牙有C朗，都只能夠以小組第三名出線），甚至有留意歐洲國家盃以及世界盃外圍賽，近年匈牙利實在突飛猛進，有打不死精神，球員身體對抗性高，意大利教練Rossi亦有料到，能夠令球隊發揮超過應有水平，而隊中愈來愈多球員能夠躋身歐洲頂級聯賽大球會（隊長Szoboszlai效力英超利物浦），所以絕對比蘇格蘭（實力可以視為英格蘭三隊甚至四隊）好，同瑞士非常接近，而德國再換教練，結果會煥然一新抑或持續不振？如果持續不振，就同瑞士以至匈牙利相差無幾。

要知道屆屆大賽，總有黑馬跑出，不過黑馬之所以叫黑馬，正正賽前無人預料得到，今屆黑馬，最終會由匈牙利跑出？能夠於A組以第二名甚至第一名出線？

其實匈牙利於上世紀50年代，屬於歐洲甚至全球足球強國，一代球王Puskas大名你聽過未？52年奧運冠軍，54年世界盃亞軍，五屆匈牙利聯賽冠軍，五屆西班牙聯賽冠軍，代表皇馬馬德里上陣180場入156球（好癲），國際足協年度金球大獎，就以Puskas命名。上維基睇睇匈牙利國家隊歷史，問題出現：

原來匈牙利自從86年世界盃之後，就進入黑暗時期，30年來未試過再打入歐洲國家盃或者世界盃決賽周，好似從國際球壇消失一樣；然後，失驚無神，匈牙利原來又已經連續三屆（16、20、24今屆）打入歐洲國家盃決賽周，世界邊會有免費午餐呢？匈牙利足球回歸國際舞台，背後一定有原因，我畢竟人到中年，年青人應該會問ChatGPT，而我仲慣性問一問Google先。

只不過幾秒鐘，答案就出現：Viktor Orban。

Orban正正現任匈牙利總理，63年出生，已經在任超過14年，任內大力投資足球（國內最受歡迎運動，必然啦），有報導指出（利申：我只能夠靠英文做二手資料搜集）今日匈牙利國內頂級足球聯賽，12間球會之中，有11間班主，都屬於Orban親密盟友，成功令匈牙利足球重回正軌。

睇返國家隊教練Rossi，雖然意大利出生，年齡同Orban只差一年，球員高峰於布雷西亞渡過，踢到36歲先退休，掛靴之前，曾經短暫去過墨西哥以及德國踢波，04年開始教波，12年（Orban上台後兩年）開始去匈牙利教波，17年去斯洛伐克教另一隊波，隊波有極強當地匈牙利少數族裔背景，然後18年就第一次教國家隊，成為匈牙利主帥，直到今年，已經在位六年。

匈牙利二次大戰之後成為共產國家，加入蘇聯陣營，89年柏林圍牆倒下，匈牙利變返民主國家，Orban當時身為學生領袖，公開要求蘇聯軍隊離開匈牙利，四年後就當選國會議員。由計劃經濟轉型市場經濟，當然困難有陣痛，所以匈牙利足球從此消失，都算有充分理由（題外話：同一歷史背景，90年代克羅地亞，以至匈牙利鄰居兼死敵羅馬尼亞，點解又可以出現足球黃金一代呢？）。

時至今時今日，匈牙利作為內陸國家，零海岸線，外貿一定要靠外人，經濟始終一般，以國際貨幣基金會數字、國民生產總值計，於歐洲只排名28，比葡萄牙以及希臘更加低，經濟差過希臘，大家應該立即想像到情況如何；而Orban近年一直被批評搞獨裁（好諷刺？其實古今中外，同類例子比比皆是，在野就搞民主革命，在位就搞一黨專政，好平常），控制國內九成媒體，搞右翼民族主義，反移民，反同性小眾權益，反對援助烏克蘭，立場親俄親中，被認定為歐盟以及北約陣營之中，頭號壞孩子，專同左膠大愛唱反調，甚至用木馬屠城記隻木馬，形容Orban政府。

如果有人識抄Orban，香港隊有可能打入世界盃決賽周？以上可能性，或然率有幾多？馬會開盤賠率又有幾多？