寫在六百萬之前

咁另一個初衷係乜呢？就好似杜汶澤做《香港企硬》個騷一樣，想香港人可以笑吓、輕鬆吓，有力量再繼續行落去囉。事實上，日日都唔開心，係會有情緒病精神病嘅。呢三個禮拜謝票，好間唔中，會遇到觀眾雙眼通紅，話好感動。通常我會非常緊張，同佢講：「我想你輕輕鬆鬆笑吓，完全唔係想你喊喎，香港人已經喊得太多。」好彩，對方通常會講，只係咁啱部戲有啲情節，通佢個人經歷一樣啫。

要用 270 萬同 12 日拍完一部電影，以便更加容易做到收支平衡，其實係一個製作實驗。呢個實驗嘅小型版，我喺同林子穎拍攝 18 分鐘短片《4x4 四段四分鐘》已經成功咗，兩晚拍攝冇 OT 就搞惦，一組拍到 10 分鐘，咁照計九組就拍到 90 分鐘啦。今次將同一個實驗，放落一部長片度試，結果都算成功咗，只係超時兩組以及超支 20 萬，不過當然有副作用。

最明顯嘅副作用，其實係數學問題，比較難解決，例如你用 90 分鐘拍五個故仔五條短片，咁呢五個故仔五條短片嘅篇幅同深入程度，一定比你用 90 分鐘去拍一個故事一條長片，嚟得零碎同片面。好多人以為 12 日拍完一部戲，係因為拍得快，其實我哋現場拍攝只係正常速度，甚至九成時間都只係單機拍攝。令我 12 日拍好《緣路山旮旯》嘅原因，其實係劇本結構，換言之，我俾個劇本你拍，你都可以 12 日拍完。

咁當然，副作用就一定有，但係可摸耳減輕呢？一定可以啦，我諗劇本對白幾時都可以再精啲，場與場之間預設嘅 intercut 可以再多啲，呢個對於抗衡劇本結構為咗拍得快而傾向場口少兼場口好長，係有幫助。當然，設計多啲好似 Hanna 同 Kaki 嗰幕「床戲」，俾畫面講多啲故仔，用少啲對白，就幾時都有用嘅。

由創作、籌備、拍攝、後期、宣傳到上畫，我今次學咗好多嘢，亦史無前例地得到好多人幫我手，可惜今次經驗，未必能夠樣樣都擺到落我下一部戲，亦即係我第四部戲，因為我六月至七月期間，已經拍完第四部戲，剪接亦已經開始，今次經驗，唯有放落我第五部戲，如果一切順利，希望可以下年農曆新年後開拍，劇本已經寫好，不過仲有排改，初步集資已經開始，各位朋友（只接受朋友）如果有興趣，歡迎私底下聯絡我啦。

2022 年 8 月 22 號朝早