面對極權，香港性／別小眾運動仲可以做啲乜？｜Louis Lee

撰文：Louis Lee

編按：原文刊於作者facebook，寫於國際不再恐同日，題為編輯所擬。

建議睇之前先睇咗以下兩篇專題。
https://bit.ly/3eSpfSp
https://bit.ly/2S2hjoZ

作為2013年起開始搞同志運動嘅人，其實對而家嘅局面好唏噓，因為邊個估到而家同運領袖如慢必、Jimmy、Cyd Ho會坐監？（2020年同志遊行彩虹大使Figo都似乎就快會坐……）而而家搞遊行嘅風險大大增加，搞遊行後後續有任何事發生，都會入埋主辦單位數，所以必須講，我係非常尊敬同志遊行主辦單位，表明「但香港同志遊行一定會留守到最後一刻，不會審查自己、退場不做，一定會留到最後一步」。

以往同志運動唔少時間都擺咗喺議會戰線上，如Cyd Ho所言「見縫插針」，早年喺立法會有「研究性傾向歧視問題小組」，而近年有《私營骨灰安置所條例》修訂包括同居2年者可以喺非法私營骨灰安置所倒閉時領取另一半嘅骨灰、電子醫療名冊為同志爭取到可以替伴侶下醫療決定等，但呢啲光景喺2016、2017年大批進步派被DQ後都不再出現，而且議會戰線受限於政制下，議員難以提出私人草案，大部分時間只可以針對政府提案作回應。喺「愛國者治港」嘅今日，相信喺議會推動同志平權只會更難。

而司法戰線亦都慢慢展開，由Leung TC William Roy v. Secretary for Justice司法覆核刑事罪行條例有關21歲先可以同性肛交開始，到W小姐案、MK案、Angus案……（詳情可以睇G點電視嘅《香港性／別小眾司法覆核案件整理》），基本上自W小姐案起，每年都有有關性小眾嘅 JR，但差唔多每一單都要搞到上終審法院，而且如我訪問中所言，並不是每一個人都有咁嘅心力應付法援署、應付傳媒，甚至應付政府一次又一次嘅上訴覆核，法官亦喺岑子杰案講明唔會批准全面承認海外同性婚姻，只可以case by case就每一條法例司法覆核，真正嘅平權遙遙無期，遑論而家法官愈來愈信唔過。

<script async src="https://pagead2.googlesyndication.com/pagead/js/adsbygoogle.js"></script> <script> (adsbygoogle = window.adsbygoogle || []).push({}); </script>

Follow GDotTV Telegram Channel，
緊貼Ｇ點電視最新消息！

至於區議會戰線，2019年區議會有大量民主派當選，慶幸當中有唔少當選者都係同志友善，17區由民主派主導嘅區議會成為香港同志遊行支持團體；南區區議會、葵青區議會等都有性小眾權益相關小組；東區區議會同葵青區議會有撥款予性小眾團體舉行性教育活動；灣仔區議會、南區區議會、油尖旺區議會都有修訂撥款表格，不再強制以「先生／女士」稱呼申請撥款者；各區區議會都有提同志議題，例如同志圖書閉架、性傾向歧視條例、性別友善廁所等，但反噬亦隨之而來，政府不斷強調區議會只係地區諮詢架構，屯門區議會討論性小眾議題時全體政府官員離席，秘書處唔支援會議。而區議員亦要面對宣誓，去留成為更大嘅抉擇。

喺呢個時候，我哋仲可以有咩做呢？坦白講我都係見步行步，但我認為以下嘢係要繼續去做：

1. 支持 JR 嘅同路人

雖然我講到司法戰線唔可靠，亦都要費好多心力，但並不代表做呢樣嘢嘅人唔需要支持，我仍然好respect每一個繼續做嘅同路人。Henry正就居屋聯名、遺產同《死因裁判官條例》等作 JR，而跨性別權益、海外同性婚姻伴侶申請公屋等亦會陸續有上訴case上庭，作為 JR過嘅人，我好明白司法覆核戰線係一場註定好孤單、好個人嘅戰事，要一個人面對政府同司法機關係一件非常chur嘅事，希望大家關心每一單case，要記得每一單 JR並唔只影響佢哋自己，更加係影響每一個性小眾；

2. 相信自己嘅重要

隨著國安法殺到，加上政府各種所謂嘅防疫措施，基本上有大型同志活動如pinkdot、同志遊行等都愈來愈難，但大型活動搞唔成，同志影展默默地搞緊社區放映、G點電視同PrideLab仍然謹守作為性小眾媒體嘅崗位透過唔同媒介講同志平權……

其實好多嘢仍然繼續做到，甚至大家仲記唔記得「個人就是政治」？一條仔都可以係一場運動，唔好睇少自己，其實自己comeout都可以影響到人，令身邊嘅人更加認識同志。各個公民團體被打散嘅時候，個人力量就變得重要，即使無咗團體無咗大型活動，仍然要捉緊每個能夠影響其他人嘅機會；

3. 文化戰線

如第2所講，政治活動喺今時今日嘅香港愈來愈難做，但唔代表唔可以透過其他方式去做。呢2年唔少歌曲都同同志相關，例如《E先生連環不幸事件》、《兩種人》、《我在流浮山滴眼水.jpg》、《陰陽道具》、《致明日的舞》、《It’s OK to be sad》……；周耀輝歌詞班亦有「雌雄同歌」project；大館剛剛上完《有你故我在》；有唔少藝人亦都表態支持同志甚至出櫃（MIRROR初出道就上pinkdot，其實睇返pinkdot表演藝人名單就知而家好多一線嘅歌手都支持同志）；ViuTV都翻拍《大叔的愛》。呢堆例子其實都講，文化戰線仍然可以打，但講到幾多嘢同點帶出同志議題就要睇大家努力；

Ｇ點需要營運資金，
按此了解支持我們的Ｎ種方法

4. 拒絕同建制同流合污

呢個係最想講嘅嘢：幾想同志平權都好，都唔好同殺人政權行埋一齊。知道自以前開始，拉唔拉攏建制派支持一直係同志團體嘅重大課題，確實同志議題並唔係民主派專利，葉劉多次表態支持同志議題，甚至出席同志活動，但2019年發生咁多事，我真係唔見得同殺人政權有幾大溝通空間。

係呀，政府肯借場畀你搞Gay Games，然後呢？啲配套去晒邊？性傾向歧視條例話研究海外司法管轄區法例落實情況份報告去咗邊？性別承認法第一階段公眾諮詢後3年有多而家做成點？政府起咗幾多個「暢通易達洗手間」？而家跨性別入境係咪仲會畀入境處抽秤？係呀，香港需要同志友善，但唔係去脈絡去政治化，「非對抗性」、「商業主導」地抽空晒context搞一個同志活動就做到，如果一切性小眾友善政策同措施都無做到，我只預見到時衝突只會更大－講到起碼幾千個性小眾嚟香港，無性教育下人哋畀人笑點處理？反同團體列隊「歡迎」點解釋？

<script async src="https://pagead2.googlesyndication.com/pagead/js/adsbygoogle.js"></script> <script> (adsbygoogle = window.adsbygoogle || []).push({}); </script>

只恐怕逐漸會變成以色列咁建立另類同志國族主義，係呀，對同志好友善，so what？零成本，同志婚姻都唔做就可以令同志友善成為美名，然後無人理以色列對巴勒斯坦幾仆街，可能香港都一樣，到時外國係咁講喺香港同志酒吧玩得幾開心，但無人知而家香港面對幾殘酷嘅嘢。

知道香港愈來愈難搞同志運動，相信唔同議題都一樣，但我仍然相信，只要有人仲喺到，運動就唔會完，唔好否定自己覺得運動就咁完，更加要保持批判同思考，不斷去望下仲有咩可以做。保持運動之火，就係我哋而家做到嘅嘢。

原文連結Ｇ點電視