想做新導演？

出席電影答問環節或者座談會，總會有人問如何入行，問如何成為導演。

一般人以至狂熱份子甚至不少半個行內人，都誤以為寫好一個故事大綱甚至完整劇本，想做導演想開戲，就要找老闆投資。其實，你需要先找一位監製，相信閣下那個故事大綱甚至完整劇本，然後再由監製找資金。其實，你講一句說話，你問一個問題，快至十秒鐘時間，就知道你有幾行內，有幾專業。

香港，今時今日，有好故事好劇本，甚至有好監製，想做新導演，想成功開拍第一部戲，又非富二代，又非資深電影副導演，要搏取到老闆又或者任何投資者信任，其實不外乎你個人履歷，之前拍過甚麼：如果你作為導演，曾經拍過鮮浪潮，短片作品曾經入圍 IFVA，甚至已經拍過港台（香港電台電視部）外判節目，基本上已經非常接近，成功開戲指日可待。

我真心忠告：如果你連鮮浪潮、IFVA 甚至港台外判都未聽過，那就先了解以上三個東西是甚麼，其他甚麼甚麼微電影比賽，完全沒有用。

今日去聽港台外判劇集申請講座，唯一得著，大概就只有證實，原來競爭果然好大，現場超過一百人，一到答問環節，就知問問題那一班同業朋友，從來未申請過外判，甚至從來未成功申請過港台外判合約。

原來連新導演單元，官方證實，上季都有過百份申請，引證個人一貫睇法：

以前只有很少大學有電影課程、政府零資助、器材昂貴以及發行播放渠道狹窄，不過勝在競爭非常少；今日差不多所有大學都有電影課程，有政府資助、器材價錢大跌，又有大量比賽，又可以隨時放上網，不過弊在競爭超級大。

先後自編自導過超過十個港台外判製作，紀錄片、單元劇各佔一半，每個拍攝都屬於一次學習，從來都多謝港台外判，將我養大。即使今日繼續申請拍港台外判，只不過一為興趣，二為貼錢買履歷，三為培育下一代班底，因為根本只有蝕本風險，絕無謀利可能。

大家努力。