何洛瑤(Sica)命格初探

唔係Sica fan，但呢幾年我覺得佢係最impressive同entertaining嘅演藝界新晉。佢真係歌如其人，「跳脫如每粒細碎微塵，散發曾有的八歲天真」，平時好hyper好跳掣，但正經唱歌／演戲時又畀人覺得佢好努力進取，可塑性高。

近排突然好奇究竟Sica嘅命格係點，就上網搵咗佢嘅出生年月日(2000-05-24)，開晒12個時辰嘅斗數命盤check下。結果我認定有兩個鐘數(時辰)最近磅：巳時(09:00-11:00)或亥時(21:00-23:00)。

兩個都係紫府盤(即紫微天府在寅或在申) ，都係破軍星守命宮(在子或在午)。背景資料唔夠，未敢肯定Sica係邊個鐘數出世，但不妨用兩個盤嘅共同特徵去討論下佢嘅性格。

Sica嗰種衝衝子(一往直前)、草根(言行麻甩)、親民(鍾意玩直播／busking)嘅性格，的確幾吻合破軍星嘅本質。紫府盤嘅破軍星緊密六合天機星，令佢嘅機靈程度提升(睇佢喺《造星III》嘅執生能力就知)。天機星亦坐落Sica嘅父母宮，可能解釋到佢同阿媽「榴槤洪」點解咁「性相近」。

另外佢係庚年生人，原局嘅天機會合天魁同天龯，呢世人一定不乏機遇，難怪出道短短幾年已經有咁多人幫佢(例如最近林家謙都寫歌畀佢)。

佢嘅天同星化忌，係冇時停攪到自己好攰嘅人，配以同宮文曲造就佢赤子般嘅才藝同表演慾。貪狼星配以同宮地劫，表達方式進取而別樹一格。

巨門星配以同宮文昌，佢絕對唔係玩玩下嘅人，背後有潛心下苦功鑽研，所以我睇到呢兩年佢唱歌同演戲都大有進步。

命宮對面嘅遷移宮係廉貞天相，面向外界時起初係難免有啲拘謹，但偏偏同宮有粒地空而又緊密六合一粒火星，又令佢比較破格同跳掣(唔跟足程序，sidetrack)。

福德宮(有關思維)係紫微天府，天府星仲要化科，代表Sica心頭幾高，係期望自己有日可以大紅大紫嗰隻。但佢之後可以有幾勁，就要睇佢嘅際遇同努力啦(我知係廢話，不過未定到盤，都係唔好講咁多住)。

(聲明：以上分析嘅理論根據係葉漢良先生嘅《斗數卷》叢書，但小弟領悟力低，講中咗係葉生嘅credit，講錯咗絕對係我學藝不精。寫呢篇短文純粹自娛，請勿認真。)