【心態武裝】你覺唔覺得有時個罪疚感好重？

「唔啱聽嘅說話你想唔想聽？抗爭咗成年我發現咗啲嘢，你唔覺得有啲人好似買贖罪券嘅咩？雖然佢壓力大不過罪疚感好重，見到咁多手足受苦你就一定急住贖罪，尤其係宜家咁無助嘅時候，好多人都搵唔到方向。除非你改善到呢個現象，如果唔係你冇得同我中共鬥...中共鬥....」

第二集Gear噏想同大家講下「贖罪券心態」。

何謂贖罪券

「贖罪券」一詞來自中世紀羅馬教會，神職人員聲稱用金錢購買贖罪券就可以免去罪孽。對香港抗爭而言，「贖罪券」就係某啲人希望透過金錢捐獻畀政治組織或抗爭者，搵人代理抗爭，從而免去自己嘅抗爭責任。

唔係淨係捐錢先會有「贖罪券心態」，任何以罪疚感主導嘅抗爭都會有：只係想做完心安理得，忽略行動成效同目的。

共同體嘅罪惡感

基督或天主教徒認為自己有罪係出於教義，咁點解人哋抗爭會為你帶來罪惡感？你睇到細路被扑爆頭、好多香港人前仆後繼咁去抗爭，你會覺得自己「欠咗佢哋」。因為你覺得香港人係一個共同體，面對同樣命運，爭取民主自由係「共業」。抗爭者唔係為一己私利，而係為咗香港而犧牲。

抗爭者代替你犧牲咁多，但你又好似無以為報，所以你想像自己係有罪。事實上每個人都係自願出嚟抗爭，冇話邊個欠邊個，但你都覺得有所虧欠就係香港民族嘅體現。

贖罪唔等於贖罪券

天主教相信人犯罪後需向神父告解懺悔，承認同反省自身不足，再用行動去彌補過錯，罪先會得到赦免。我哋成日會諗自己對唔對得住手足，將前人嘅付出同犧牲，化為抗爭嘅源動力，用行動彌補過往嘅不足，務求完成手足嘅心願，就係「贖罪」嘅過程。

為手足「贖罪」本身冇問題，重點在於心態要正確。「贖罪心態」係甘願承擔前人所托，認為只有贏先係真正贖罪，但「贖罪券心態」係為求心安，贏輸並唔重要。如果我哋用「贖罪券心態」抗爭，好多時會原地踏步，甚至會有反效果。

藥石亂投

抱住「贖罪券心態」嘅人一般嚟講好被動，依賴其他人提供行動方向，對抗爭冇咩認識同睇法。因為對佢哋而言行動對抗爭有冇效並唔重要，重要嘅係贖罪嘅感覺。正因為行動時缺乏理性判斷，好容易就會藥石亂投，有時好心做壞事。

例如見到網絡瘋傳某個消息，冇諗清楚就幫手傳開，可能助長咗未經證實嘅假資訊；上街抗爭搵唔到角色，又覺得出到嚟點都要做啲嘢，於是就亂咁set路障、亂咁掘磚，搞到條路塞死晒走唔到；見到有手足被捕覺得內疚，就是但搵個地方話要開花，冇宣傳冇計劃冇目標，可能會造成不必要嘅犧牲。

部份「贖罪券心態」嘅人樂於捐獻，希望從捐獻中得到心靈慰藉，情緒主導嘅判斷有可能助長各種歪風。例如會有人「鬥慘」，係因為只要夠慘夠煽情，就容易得到捐獻同支持；會有人「呃錢」，係因為售賣嘅係贖罪嘅感覺，而唔係實際對抗爭嘅幫助。「贖罪券」心態只係呢啲歪風嘅其中一個成因，如果係為做而做，冇諗過成效，資源就會用喺唔合適嘅地方。

抗爭設限

「贖罪券心態」嘅人容易預先為自己抗爭設限，缺乏抗爭想像，思想僵化，停留喺固有行動方式，唔願意走出舒適圈。自己覺得做咗某樣嘢就已經贖咗罪，可能會誇大自身條件限制，作為留喺舒適圈嘅藉口。

例如可能你覺得食咗黃店就夠，唔可能全職抗爭，但其實你仲可以得閒出街貼下文宣；可能你覺得去咗大遊行就夠，唔可能要求你去衝，但其實你仲可以幫手做下哨兵；可能你覺得都捐咗錢買物資，唔可能捐晒佢，但其實你仲可以幫手帶物資去現場。

我哋必須要時刻反省，檢視自己有冇誇大自身條件限制。如果每一個人都為抗爭設限，唔嘗試主動求變，固步自封，但求做完減輕罪疚感，抗爭就會原地踏步。

贖罪係為咗未來

抗爭真係好攰好無力，但當你每次諗起身陷囹圄、已去逝嘅手足，一切痛苦同辛酸，相比起嚟都顯得微不足道。「對唔對得住手足」唔需要掛喺口邊，唔需要道德或情緒勒索同路人，我哋當初都係自願去承擔呢份責任。「贖罪」唔係為咗過去嘅悔疚，而係為咗一個更好嘅未來。

「香港人報仇」就係一個贖罪嘅過程，只有報仇成功嘅時候，罪先會得到赦免。正所謂「自己香港自己救」，冇人一出世就注定成為拯救香港嘅英雄。與其消極咁買贖罪券，將抗爭假手於人，不如喺自己最擅長領域入面，積極咁為呢個共同體付出。

光復香港 時代革命

民族自強 香港獨立