我有一個唔洗送頭，但又可以展示二百萬民意嘅方法

香港人喺國安法嘅恐懼下，各個抗爭戰線都好似無以為繼。民主派初選係重燃抗爭嘅契機，我哋必須要好好珍惜每一個反抗機會。

振奮士氣

國安法下嘅香港進入政治寒冬，抗爭陣營士氣低落，慢慢失去抗爭意志同希望。假如初選有好多人投票，即代表香港人仍然會堅定抗爭，排隊投票嘅靚畫面將會大大提升士氣。

展示民意

短期內我哋好難再走上街頭聚人，初選就係最安全、最有認受性，而能夠展現民意嘅方法。假如初選有好多人投票，就相當於大遊行，向國際展示香港人面對國安法都寸步不讓。

國際求援

即使會有DQ、35+係海市蜃樓，亦唔代表初選毫無意義，初選嘅意義在於民意授權。假如港共大規模DQ喺初選取得民意授權嘅參選人，將會引起新一波國際輿論壓力，加快國際制裁。

抗爭籌碼

被DQ嘅參選人即使冇辦法參與九月大選，但佢哋仍可帶住民意授權去代表港人進行制度外抗爭。相反，如果初選好少人投票，被DQ嘅參選人就會進退失據，錯失抗爭契機。

初選承諾

如果初選嘅投票人數太少，其中落敗嘅參選人有可能以選舉結果缺乏認受性為由，繼續報名參選。我哋一定投票展示民意，以免有人藉機違背初選承諾。

議會換血

初選投票率低意味住只有傳統泛民嘅鐵票／地區票去投，對本土派選情極為不利。初選可能係香港人最後一次公平公正嘅選舉，我哋一定要踢走守舊、妥協嘅泛民。

本土派要嬴

我哋要按選情進行配票，目標係最多嘅本土抗爭派勝出初選。用選票話畀全世界聽，本土派已經成為主流。

今個星期六日，11號至12號

帶同身份證同住址證明，到所屬選區票站投票

唔洗冒住風險、身水身汗行成日，只需你嘅一票彰顯抗爭意志。

香港人，請珍惜每一個反抗機會。