抗爭一年,香港人其實都有好多得著
兩年前嘅今日,梁天琦因暴動罪被重判六年監禁。一年前嘅今日,好多人喺煲底通宵留守,準備迎戰送中惡法。一年改變咗好多,我哋失去咗好多,同時又得到咗好多。
![](https://assets.matters.news/embed/ae83af86-faa1-4e57-967a-5ff0e6750945.png)
![](https://assets.matters.news/embed/25b7c62e-360c-4ca3-afe4-11bd3fd2820e.jpeg)
一種改變
以前會覺得香港人係自私自利,對政治漠不關心。過去一年,數以百萬嘅香港人走上街頭,不計較個人犧牲,但求用血汗改寫香港嘅未來。香港人已經脫胎換骨,唔再係飲喜茶、食海底撈嘅港豬。我哋唔單止推倒咗送中惡法,更改變咗每一個香港人。
![](https://assets.matters.news/embed/fed725b2-acf5-4fd6-aecc-173b6e2e2fde.png)
一套理念
香港人唔再依賴政黨政客,能夠自行組織抗爭,令到抗爭可以遍地開花。我哋每個人都搵到心中所相信嘅價值,每晚10點鐘好有自信咁嗌出自己嘅信念,並喺生活各個細節中實踐,例如罷鐵、支持黃色經濟圈。我哋為著自己相信嘅理念,用行動決定自己嘅命運。
![](https://assets.matters.news/embed/b492cdc1-e6a4-4d63-928d-f364599dda60.jpeg)
一個身份
香港人向全世界展現咗無比嘅創意、毅力同勇氣,以及追求民主自由嘅決心,創造咗無數奇蹟,例如全球登報、「香港之路」,通通都係感動世界。Hong Kong is not China成為咗國際共識,香港人就係比中國人優秀嘅民族。作為香港人,我哋覺得好撚自豪。
![](https://assets.matters.news/embed/9f53037a-0db6-4c67-a5a0-5b7895f23766.jpeg)
一個突破
政權對和平訴求視而不見,教識我哋「和平示威是沒有用的」。一個又一個年輕生命嘅犧牲,提醒我哋「香港需要嘅係革命」。於是,我哋打破咗和理非嘅枷鎖,明白勇武抗爭係必須,革命係一種義務。我哋和勇不分,唔再乞求政權憐憫,決心要革命推翻政權。
![](https://assets.matters.news/embed/11c3bd74-9411-460e-81e6-246f1ddad5a4.jpeg)
一班手足
我哋認識咗一班志同道合嘅手足,一段段共同經歷連繫住二百萬人嘅共同體。即使素未謀面,但都喺各個戰場上守望相助,你我不分彼此。因為有手足喺度,所以「和你抗爭,我很愉快」。我哋齊上齊落、同喜同悲,代表住香港民族嘅誕生。
![](https://assets.matters.news/embed/f033904f-2b54-4ad0-85d5-7991e4d7a0e8.jpeg)
一個夢想
時代革命賦予咗我哋繼續生存嘅意義,比起返工買樓,我哋更想追求民主自由、釋放義士,實現煲底之約。好多平平無奇嘅人都搵返人生目標,甘願為光復香港而不斷奮鬥。我哋分享同一個夢想,光復香港成為咗人生計劃嘅一部份。
![](https://assets.matters.news/embed/8087c220-60ce-4936-a917-389bb0ccea46.jpeg)
一首國歌
以前唔明點解外國人聽到國歌會流淚,但當聽到《願榮光歸香港》,嗰份由心底而發嘅感動、忍唔住流下嘅眼淚,令我哋明白愛國就係咁簡單。旋律同歌詞連繫住我哋香港人嘅共同苦難,並將會一代代咁傳承落去。因為一首歌,我哋知道自己真係好愛香港。
![](https://assets.matters.news/embed/ab000387-3db2-4838-b557-ec9f283c2818.jpeg)
一個方向
由「香港人加油」到「香港人建國」,我哋親手撕破咗「一國兩制」嘅謊言,認清咗喺中共統治下唔可能擁有民主,香港獨立係唯一出路。如今香港獨立嘅呼聲響遍全港,將會成為社會主流。為咗下一代,我哋要民族自強,香港獨立!
![](https://assets.matters.news/embed/92db4959-f58b-4a5d-95a2-c781d6aaf1b5.jpeg)
一個開始
兩年前,梁天琦喺判刑前寫咗以下一番話:
//去或留,固然是許多人面臨的抉擇。但假使香港人,特別是年輕一代,都不再留戀香港,退居其他地方,香港的未來就從此有了定數。相反,我們只有紮根這片土地,這裏才有改變的可能,香港也不再是座浮城。//
如今好多人面對國安法嘅恐懼,又會想移民一走了之。一年抗爭過後,我哋到底有冇紮根呢片土地,決心以光復香港作為畢生志業?一年嘅抗爭只係時代革命嘅開始,香港民族仍有路要繼續行,我哋回顧完過去、搵返初衷之後,就要繼續上路。為咗曾經流下嘅熱淚同鮮血,香港人,不降也不退。
光復香港 時代革命
民族自強 香港獨立
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!