【黎明前嘅黑暗】最好嘅準備，最壞嘅打算。

「一國兩制」嘅喪鐘已經敲響，冇人可以獨善其身。二零二零年嘅下半年，香港政局勢必風雲色變。面對時代嘅洪流，我哋唔可以俾恐懼同絕望吞噬。香港民族要絕處逢生，需要嘅係最好嘅準備，最壞嘅打算。

最好嘅準備

七一立法會義士、《香港民族論》作者梁繼平認為，要破局，街頭抗爭、國際戰線、體制空間，三者缺一不可。[1]極權降臨，人民需要嘅係求生，唔好放過任何生存嘅機會，各種抗爭手段都要盡做。

街頭抗爭定必再起，除咗強身健體、改良戰術之外，更重要嘅係全民嘅互助同參與，例如全民報哨、文宣動員、後勤支援。我哋必須承認同政權硬碰只係權宜之計，喺武力未準備好全面開戰前，唯有盡可能減少每次街頭抗爭嘅消耗。

要抗衡中共嘅全面打壓，國際戰線可能係絕境中嘅救命稻草。我哋要多了解國際局勢、全民Twitter、連結國際盟友。將每次抗爭都化作國際遊說所需要嘅道義同遠景，寄望我哋能夠喺國際制衡下渡過政治寒冬。

體制空間雖然腐朽，卻係爭取國際支援嘅重要槓杆。立會過半當然唔會造就民主，但35+攬炒對制度公信力嘅傷害、全數民主派議員被DQ造成嘅國際輿論，或者係可遇不可求嘅反擊機會。我哋必須要準備全面鬥爭，盡可能增加極權管治嘅代價，喺黑暗中堅守各個陣地，寸土不讓。

最壞嘅打算

對好多香港人嚟講，接近一年嘅流水革命，已經係非常漫長。台灣經歷過長達三十八年嘅戒嚴時期、波蘭喺蘇共統治下掙扎咗近半世紀、愛爾蘭解殖獨立用咗過百年，真正嘅革命係至少用十年計。可能我哋有生之年都未必睇到曙光，但前人所承受的苦難，將會化為養分，讓後人實現未完嘅願望。

全面清算、以言入罪、流亡海外，通通都係革命嘅必經階段，係必須要承受嘅痛。我哋要有抗爭地下化嘅打算，可能再冇機會明目張膽咁做文宣、搞遊行。對自由嘅渴求同民族意識已經植根喺我哋心中，只要一息尚存，我哋都會戰鬥到底。

革命路雖漫長，但請勿懷憂喪志，因為真正嘅絕望並唔係「一國一制」，而係失去抗爭意志。我哋必須要做好期望管理，免得喺黑夜來臨嘅時候，被恐懼同絕望吞噬。

民族自強

無論情況幾壞都好，只要民族不滅，他朝仍能東山再起。香港本土文化、語言、歷史就好似城牆一樣，保護我哋免受共匪同化，所以本土論述同民族意識尤其重要。

民族自強要從生活各個小事做起。搵多兩個錢，建立人際網絡，必要時支援手足；睇多兩本書，學下唔同技能，將來貢獻革命；飲多兩杯水，好好照顧自己，要親眼睇到光復香港嘅一日。

一個民族值唔值得擁有自由、民主、獨立，就視乎民族喺苦難中嘅堅毅同不屈。當我哋每個人都願意為共同體不斷精進自己，過去手足嘅犧牲先唔會白費，「煲底見」呢個莊嚴嘅約定先有可能實現。

破舊立新

「光復香港」唔係要返舊年六月前嗰個表面歌舞昇平，但內裡腐敗不堪嘅香港，而係要徹底嘅改變，由下而上重新建立理想嘅香港。所以「時代革命」必須經過時代巨變，先「破舊」，然後再「立新」。過去大半年抗爭，香港人展現咗敢於顛覆舊有秩序嘅勇氣，即使面對強大嘅國家機器，仍然抱住「寧為玉碎，不作瓦全」嘅攬炒精神與政權對賭。我哋要有置於死地而後生嘅覺悟。

如今政權張牙舞爪，「攬炒」與否已經唔到我哋決定。與其消極咁被恐懼支配，不如積極迎接時代挑戰，將黎明前嘅黑暗，視之為浴火重生嘅歷史必然進程。

光復香港 時代革命

民族自強 香港獨立

願萬代 仍堅守這要塞

讓願望 能歸依這家邦