足運分水嶺？

俄羅斯世界盃今晚開始八強大戰，事實上亦只剩低八場比賽，不過今屆賽事即使未完成，已經被公認為歷屆最精彩，因為戰情戰果往往都出人意表，強隊球王紛紛落馬，而當中令賽事出現革命性變化，當然首推 VAR（Video Assistant Referee 錄像輔助球證）。

其實好多體育運動項目，例如欖球、曲棍球、網球等等等等，一早已經用視像科技協助裁判，偏偏足球一直拒絕，即使明知三十年後，其實所有比賽都會用。結果當一整代國際足協高層都因為貪污而先後下台，VAR 不出幾年就通行無阻，當年反對聲音離不開要翻睇錄影帶會打斷球賽節奏，其實球員犯規詐傷對比賽節奏影響更加大。

設有 VAR 之後，足球比賽變得更公平、更透明，因為最常見之球證人為誤判（是否入球？是否十二碼？是否越位？），今屆大幅減少；而球證是否要勞動到 VAR 系統介入，以及介入之後結果會否被推翻，往往令比賽更加戲劇性。當然，包括丹麥國家隊教練在內，亦有人覺得，當足球比賽太公平、太透明，甚至太準確，趣味就會消失。

其實當 VAR 時代正式開始，要足球再走回頭路，已經零可能。不過 VAR 確實有副作用：提高入球率，正正今屆賽事被公認為歷屆最精彩原因之一。回顧今屆已完成比賽，0:0 戰果互交白卷只有一場（分組賽法國對丹麥），歷屆絕無僅有；而大量入球之中，十二碼（港式叫法，大陸叫點球，英文叫 penalty）比率大幅提升，已經完全超過歷屆，即使今屆賽事根本未完。因為有 VAR ，以往未判十二碼，今日會判，以往判越位入球作廢，今日會判入球。就以今屆神射手、英格蘭 Harry Kane 為例，六個入球，三個十二碼。

當八十年代運動科學抬頭，足球變得體力化、防守性，以至九十年代足球比賽入球大幅下降，不少人花盡心神研究如何提高入球率，誇張至擴大球門面積都有人提出過。到頭來，原來，只要令比賽變得公平，入球就會上升，球賽就會精彩。其實人類發展都一樣，只要社會公平，經濟自然增長，文明自然昌盛。