點止係廣告咁簡單

呢年零以嚟，Mirror同Error真係爆紅得好緊要，很多人試圖解讀呢個現象，亦眾說紛紜。就算有人講到好似好有理由，但係唔表示將理論放响另一班人度，係可以確保成功嘅。而且今次嘅現象同以往好唔同，追星，喪買偶像產品，邊個時代冇？但一向係某個年齡層嘅，尤其係青少年。今次啲粉絲年齡係跨世代，有啲重係母女一齊拍住上，又有一班老公，因為老婆迷上Mirror同Error而受冷落，要响社交媒體尋求同病相憐的人傾訴，真係好難解釋。不過簡單咁講，即使有人對佢地冇太大感覺，但都不至於討厭佢地。

所以搵佢地做廣告，做代言，係一個接一個，响街頭，廣告牌呀，燈箱呀，地鐵巴士電車呀，社交媒體呀，真係鋪天蓋地。好彩佢地人多，輪住上，都冇咁易睇到厭，而且人紅咗，樣都靚啲，而Error四子又真係幾盞鬼！咁有啲冇乜畢直（Budget）嘅商戶，請唔到佢地真身上陣啫，都識得掹車邊，撘吓順風車，見得最多就係用「自肥」呢個字眼！但係識玩梗係用「Secured!」添啦，而且我已經見到有，唔知幾時出埋「死亡行星」，電視台應該考慮註冊，攞返個版權，幫補吓。所以佢地走紅，唔單止係佢地人嘅問題，幕後團隊策劃都好大功勞，係一個Package咁嚟。

有人紅，自然有人黑。之前咪有人都有好多代言嘅，餅舖，即食麵及其他產品，真係週街都係佢個樣，見到都唔開胃，唯一好處就係認住個樣，唔買嗰隻產品！唔記得幾時，都有一排，行過間餅舖見唔到佢個樣，重懷疑係咪自己同另一間撈亂咗。後來證實，兩間近名嘅餅舖都再冇佢個樣，Yeah咗一下。後來留意到連即食麵包裝都唔駛再見到佢，真係謝天謝地。就係咁，無聲無息地，消失咗。當然，人地另有高就，但完全唔關我事，唔駛成日篤口篤面，行街步伐都輕鬆咗。不過唔表示我會馬上選購呢啲商品，都已經習慣咗冇食咁耐，就暫時觀望住先啦。

呢幾年，週不時大家會杯葛某啲舖頭，唔幫襯佢。而且不分背景，你有你杯葛呢啲店，佢又有佢杯葛另外啲不同顏色嘅店。個人覺得有小小無謂，但係政府不同部門經常以不同標準去攪佢地認為係反對派嘅店，實在令人氣憤，所以都只好努力盡量堅持。但最近有忠誠廢物因為麥記一個廣告用語，竟然呼籲大家罷食，甚至叫埋內地人一齊參與。藍人罷食藍店，都算千古奇聞。呢啲郁吓就罷食杯葛，尤其係內地，真係層出不窮，而且往往係錯重點，跟車太貼。

之前有公安在銅鑼灣被刺傷，襲擊者自殺身亡事件，後來知道係維他飲品公司員工，公司發咗通告，慰問家屬，竟然被連番追擊，又有杯葛聲音出現，但係內地反應重激，攪到超市都將所有產品下架，又關佢地事？呢樣又唔買，嗰樣又唔用，不如閉關鎖國啦。而呢頭熱烈歡迎華為太子女勝利回國，跟手湧去買唉瘋十三，佢哋真係能夠將工作同生活，分得清淸楚楚㗎。

維他係香港老字號品牌，陪伴唔少香港人成長，一句「點止汽水咁簡單」嘅廣告口號，就勾起好多回憶。而家市場競爭大，有好多其他選擇，大家可能少飲咗。自從事件之後，自己出街需要買支嘢飲，都盡量買維他，咁先至知道原來佢哋嘅選擇係非常之多，正好有排試，你哋又有幾耐冇飲過麥精？

廣告，到頭來重係提醒大家，唔好比一啲嘢不明不白咁消失咗！