緊急警示系統係乜東東？

OFCA：政府推出緊急警示系統發送重要實時信息
RTHK：政府推緊急警示系統　向流動電話用戶發送重要實時信息

早幾日政府公佈緊急警示系統 emergency alert system 啟用，呢壇嘢喺業內其實都已經醞釀咗一段日子。究竟係乜嘢嚟？

為乜要搞？

香港年年都有颱風㗎啦，政府一直都無積極研究 emergency alert，頂籠係做個樣叫啲手機台交吓測試報告咁。舊年有抗爭運動之後就忽然好積極，要所有手機台必需俾個 solution 出嚟，又要求香港正式發售嘅行貨手機一定要 support。學法官大人話齋，箇中原因都幾「瓜田李下」啦啩。

同以前嗰啲 police alert 有乜唔同？

以前嗰啲係用短訊SMS嚟send，SMS嘅機制只能夠逐個send，就算自動化咗都要好耐，所以舊年有啲人朝早收到，有啲人就夜晚先收到。而且搵公司send要逐次逐個收錢，長期咁做好唔化算。

而緊急警示系統係用 CBS (cell broadcast system) ，好處係一次過廣播俾所有手機，理論上全香港可以幾乎一齊收到。但唔好處係世界上有用呢個功能嘅地區極少，以往好多手機都唔support，又者 default 係熄嘅，要特登去 settings 度開返先收到。架構上係政府起一部 CBS server，有嘢要send就由佢send俾各間台然後廣播出去，政府淨係俾 server cost，平好多。

政府今次硬性規定要做，最大難度就係手機係咪support CBS。據聞政府今次強烈要求所有新近正式喺香港發售嘅行貨手機要support，舊機就下一次出 software update 時要補返，兼且 by default 一定要開咗佢。亦因為唔係部部機都收到，政府又搞咗個 database 俾人 check：

OFCA：搜尋可支援接收緊急警示系統訊息的流動裝置

政府 database 都係作為參考啦，佢哋都未必會試哂市面上所有電話，尤其係無街貨嘅電話。例如我用緊 Google Pixel 4A 係 support 嘅，不過佢個 list 無。去 Settings ➡️ Apps & Notification ➡️ Wireless emergency alerts ➡️ Emergency alerts 度 check。（部部電話都唔同，有啲放喺 SMS app 嘅 settings 入面，有啲無得 disable，大家自己 search 吓）

對我哋有乜影響？

根據 OFCA 個 FAQ，而家香港嘅 3G 4G 5G network 開咗 CBS 。一般嚟講，對於一般人嚟講除咗有陣時個電話會狂震，都無乜大影響。不過如果你仲用緊3G電話，又或者你住嗰度淨係叫到3G，又或者有時你覺得4G逼爆而揀咗落3G，就要留意吓。

Emergency alert 喺 3G 年代搞唔起，係因為喺 3G 架構下開 CBS，手機要長期收多一條額外嘅 channel，無 alert 要長期聽住，令部手機會食電食得快咗。4G 喺呢方面改良咗，理論上耗電量唔會覺得有咩分別。5G 現階段 NSA 都係用 4G 做餅底，所以都係一樣。

後話

最近唔少網上媒體寫嘅流動網絡報導都比以前深入咗，多咗少少技術上嘅描述及分析。如果大家有咩嘢想知多少少，或者睇唔明某啲術語，不妨話我知，我可以嘗試解答一下。

流動通訊相關文章：
英國華為5G禁令：電訊商與約翰遜的雙贏方案
流動無線通訊起革命：Open RAN
5G for dummies 之搞清楚那些「G」
流動網絡無線工程的困局
望向5G（上）：5G並不是甚麼
望向5G（下）：5G究竟是甚麼

Original link: 死火手記