廿年人事幾艱辛？

20 年前，2001 年，先講一個題外話，911 事件發生之後，我原本想立即去紐約一轉，最後未能成行，因為自香港演藝學院畢業八年以來，我終於有機會做導演，仲要自編自導，而且幾年未發市，一發市就拍兩條片，一條紀錄片，一條劇情片，同樣 22 分鐘，同屬當年香港電台電視部外判計劃第二年製作。兩個製作都已經埋班，我難以為個人理由而放低，走去美國一轉。

香港電台電視部外判計劃，我先後攞過 10 份製作合約左右，可以講將我養大，令我捱過清貧生活，亦令我獲得大量拍攝經驗；可惜 20 年後，香港電台已經被政府行政手段，整頓到面目全非，外判計劃其實已經早在 2020 年春天曲終人散，不過有關方面時至今日，差不多一年半之後，都未對外正式宣佈，外判計劃已經壽終正寢。

題外話講完，到 2002 年，兩個外判製作我都拍完，進入後期製作，完成剪接之後，視訊效果以至調色，我交到中學同學 J 手上。想當年，中學同學 J 已經全職做電影視覺特效，效力當時香港甚至全亞洲 No. 1 視覺特效公司，日本、南韓、泰國、台灣以至印度，甚至新加坡，當時都未起步，20 年後 ？

同學 J 早午返工，晚就同女友於家中幫我做後期，而我亦經常開車到元朗睇片，睇完半夜開車返銅鑼灣，當年我住希雲街。因為電腦 rendering 需時，我同 J 有大把時間天南地北，其中亦發展出一個劇本大綱，當年叫《2018》，幻想 16 年後新世界：

「 到時亞洲有位科學家 F，一方面成功研究出新一代火箭動力，理論概念沿自核能 Fusion Power，將太空船速度提升幾十至過百倍；另一方面，科學家 F 又成功搵到一個星球，同地球 10 萬年前環境極之類似，位於銀河系之外，姑且叫做 A 星。

科學家手持兩大發現，成功集資，得到大量亞洲品牌財團支持，成立集團，開發出新一代太空船，只需要七年時間，就可以去到 A 星，乘客可以各自圈地，勇闖新世界。一時之間，連西方社會都有人要以天價買位，争相上船。

透過駐船記者 D 記錄，當一號船升空一年之後，科學家 F 病逝，集團由 F 天才獨生女 B 接手，並且宣佈火箭動力技術再有革命性突破。一號船升空兩周年，乘客慶祝之際，船上最有影響力之人物，年青才俊 E 先生宣佈，發現同一航道，另有太空船超越一號船，要求集團公開真相，解釋清楚。

獨生女 B 安撫一號船上乘客，此乃二號船，採用革命性新技術，由地球去 A 星只需一年，不過其實無人駕駛，志有試飛，所以一號船上各位乘客，以至其背後代表之單位，依然將會成為第一批人登陸 A 星，可以繼續飲頭啖湯，繼續優先圈地發展。

不過一號船上好快出現變化，E 先生要求回航，認為先花兩年重返地球，再用一年坐三號船去 A 星，都比繼續航程快兩年到埗；不過船長 W 代表集團，當然反對，堅持繼續行程。 E 先生好快就同船長 W 形成對抗狀態，雙方於一號船各有支持者，結果發生叛變，E 先生成功奪得武器倉控制權，而一號船亦迅即同地球失去聯絡。

二號船試飛成功，三號船座位有限，自然奇貨可居，集團躍升為地球最值錢企業。三號船上，駐船醫生 T 有個心願，希望搵到一號船駐船醫生兼前妻 Z 下落，而集團亦希望三號船可以搵到一號船下落，以便向外公佈調查報告。升空四個月後，三號船果然搵到一號船殘骸，T 與其他船員登上一號船後發現，果然曾經發生暴力事件，屍骸遍野，包括船長 W 以及 E 先生，不過船頭維生倉有幾個人進入冬眠狀態，似乎是僅存生環者，包括 D 與 Z，地球以至集團都視為重大發現。

將幾個冬眠囊先由一號船急急送去三號船，T 與其他船員繼續向一號船尾搜索，希望仲有奇蹟，可以搵到其他生環者。豈料三號船成功將幾個冬眠囊接駁好，啟動解凍程序之後，船上操作系統即被病毒入侵騎劫，立即繼續行程，將 T 以及其他船員，遺棄於一號船殘骸等死，而憑藉全船氧氣分佈被控制，三號船所有人都面臨呼吸困難，失去活動能力。

解凍程序完成，幾位一號船生還者甦醒，當中包括記者 D 、醫生 Z、廚師 O 以及電腦奇才 Q，幾位原來屬於一號船內沉默第三勢力，認為一號船繼續航程又好，立即回航也好，都並非上策，騎劫三號船方為上策，保證可以最先抵達 A 星，建立勢力，將來根本可以脫離地球獨立，所以叛亂期間置身事外，任由雙方互相消耗，以便漁人得利。

餘下八個月航程，幾位生還者繼續利用控制氧氣與飲食，總之用人類最原始最基本方法，成功將一部人類科技最尖端之太空船完全控制，間中捉幾個人質上主控台捉棋鬥智，全船直播，成為解悶娛樂。

終於，A 星進入目測範圍，奇怪事開始出現，有類似小昆蟲不定期飛近三號船，究竟其實生物抑或機械，都難以估計。總之三號船飛得愈近 A 星，類似昆蟲愈多，結果，三號船被昆蟲包圍，外殼以至操作系統被入侵，情況一如當初以散播病毒而奪船一樣，幾位生環者束手無策。當三號船衝入 A 星大氣層，畫面就更加壯觀，因為地面已經有城市建設，船上幾位生還者又好，眾多人質又好，全部優先圈地夢碎，開始進入瘋狂狀態……

原來集團獨生女 B 果然天才，早在老父病逝之前，已經成功研究時空穿梭系統，功能就如隨意門，又似生物傳真機，可以將地球任何物質物件分解傳送再合成，直接送去 A 星，連坐太空船都慳返，大至火箭動力推進系統，小至交通工具，統統成為歷史陳跡，地球不再需要興建道路，而當日二號船試飛，B 已經將隨意門出入口終端送上 A 星，以便同地球連線。能夠將發明變成真實，B 全靠一號船與三號船先後兩次瘋狂賣位集資，而獲得充足研發經費。她亦一早身在 A 星，展開外星統治。」

以上一個故事大綱，之後曾經有一位影評人參與過發展，又有另一位導演想發展另一個方向，15 年前亦曾經報名參加香港亞洲電影投資會 (HAF) 不過未能入選，10 年前甚至有行內朋友於北京推銷過，而當我同 J 將個故事大綱交到一個相熟動作大片監製手上，換來一句評語：「好好笑，我真心覺得好好笑。」

兩年前，當大陸市場都拍完《流浪地球》，而 Elon Musk 亦已經憑電動車 Tesla 起家，宣佈 名下 SpaceX 要登陸以至殖民火星，我同 J 終於決定要將戲名由《2018》改為《2028》，仲相信有一日可以拍成電影，始終認為可以用低成本做得到，就好似荷里活舊作《追擊赤色十月》，全片採用廠景拍攝潛艇船艙，其實貴極有限。

點解我會到今時今日，突然想將整個過程報告一次，公諸同好？因為上個星期，我睇到一段外國新聞報導：

時速 123,000 英里

核動力火箭 一個月可達火星

NASA 表示 比傳統火箭 快六個月

如果美國長大，你竟然話想上火星，大家會鼓勵，會心微笑。

如果香港長大，你不過話想拍火星，大家會反眼，真心恥笑。