《金錢心理學》讀後感

我哋日日都離唔開點樣用「錢」，經濟學會假設人係「理性」，但我哋用「錢」嘅時候係咪真係咁理性？本書就係去探討我哋生活中消費決策從中揭露我哋常見思維同錯誤，再提供具體實用嘅建議。

本書分三大部：

1. 錢為何物
   「錢就是貨幣，貨幣代表價值，但貨幣本身没有價值，只代表我們可以用來換取事物的價值，它是價值的信差。」而成為合適嘅信差，貨幣係通常可以有四大特性：通用、可分割、可替代、可儲存。

   因為喺現代，「錢」近乎做到所有嘢，涉及錢嘅決策嘅難處就係因為錢有得「計」機會成本。所以：「這項東西價值多少？我願意為它放棄什麼？購買言項東西的機會成本是什麼？這才是我實際要付出的。」你係咪會咁理性諗？

2. 我們評估價值一的方式經常與價值無關
   知道「錢」係咩後就去反省我哋平時用「錢」嘅盲點，價值轉做「錢」嚟量化其實唔係咁易。點解大眾相對係會買「$200 50% off」唔係「正價 $100」？因為消費只能拎「錢」量化，我哋大多只能拎數字對比先易揀，依章有講嘅相信你都會「係喎屌」，

   例如大家都有唔同嘅心理帳戶，明明都係同一張一百蚊，先跌咗一百再買一百蚊飛嘅可能性係高過你先買一百蚊飛跟住跌咗，你未必會拎另外嗰一百蚊買返同一張飛，明明都係冇咗二百蚊。拎十三個月糧都可能仲會好好儲存，但如果嗰筆係花紅？或者獎金？會唔會拎咗去旅行或者開心使？

   除咗唔同嘅心理帳戶，我哋仲會逃避使錢嘅痛苦，「由於我們聚焦在購買過程中感受到的花錢之痛，而非聚焦在消費本身的價值，這會導致我們做出錯誤的決策。」例如買無限上網定每100mb咁買會吸引啲？可能你本來用唔盡但就係唔想每次比，自助餐都係差唔多，有幾多人真係可以食到所謂「回本」？開始覺得咁我應該點「定價」嘅時候商家就一定舉手幫你「定錨」。一件嘢幾錢好？有建議零售後你就可以由嗰粒「錨」嚟對比抵唔抵，咖啡店嘅貴樽裝水都係差唔多道理，餐牌係會有啲唔預你叫嘅嘢嚟比你做心理對比。再者我哋會偏向高估自己有嘅嘢，所以對得失嘅感覺係好大差別，簡單講就係失去嘅痛感係強過獲得的快樂約莫兩倍，賺到廿蚊嘅開心先抵消到失去十蚊嘅痛。

   另外仲有文字、儀式、期望等等都會影響到我哋嘅決策，依度唔詳講。

   依章最後就開始當頭棒喝吓大家，唔好太睇重錢。金錢是手段不是目的，佢存在係為咗方便大家交換價值，記得佢本來係冇價值。

3. 從錯誤思維汲取教訓
   第二章睇到自己對錢有幾多心理盲點後就當然要去避免再錯落去:

   • 免費係一定有代價，有時候比錢先係最低成本，成本唔只得錢。

   • 重點的話，記得只計對你嘅機會成本，重複，係機會成本。有啲FIRE嘅由其一開始，見到$1,000會見到佢係1年後嘅$1,100十年後嘅$2,600。

   • 自制力係有限，跟系統係最好，（好似啲投資教學廣告）例如一收錢就放去投資存戶，愈少錢要諗點使你就唔需要再浪費腦力去決定。

最後拎第二章嘅兩句嚟總結：
「不論生活境況如何， 我們都相信，不該總是從錢的角度，來思考生活中的決策，應該從人生的角度來思考。」「我們只是希望， 重新思考你對金錢的思考方式。」

（本書當然仲有好多嘢但嚟緊都想寫短，一本書學到用到三樣嘢好過對一百樣嘢得個知字。）

作者：Dan Ariely, Jeff Kreisler （台譯：丹·艾瑞利、𠎀夫·克萊斯勒）
譯者：李芳齡
英文書名：Dollars and Sense: How we misthink money and how to spend smarter
出版社：遠見天下出版股份有限公司