【香港文化】對香港人嚟講四月一號唔止係愚人節

四月一號，係愚人節，同時係香港一代巨星張國榮嘅死忌，對香港民族嚟講係個沉重嘅日子。你或者你嘅父母總會聽過佢嘅歌、睇過佢嘅電影，例如《追》、《為你鍾情》、《有心人》、《今生今世》、《左右手》。今日就等我哋一齊懷念下香港人嘅哥哥 – 張國榮。

樂壇天皇 影壇巨星

「小小明星 凡人拍不出的戲 令我沒法忘記」— 張國榮《小明星》

張國榮經歌唱比賽出道入行，以《風繼續吹》一曲嶄露頭角，之後憑著《Monica》一洗香港流行曲以往嘅抒情風格，開創咗快歌勁舞嘅熱潮。佢嘅歌曲橫掃樂壇各大獎項，舉辦嘅演唱會都係座無虛席，同當年另一歌手譚詠麟雙雄並立。哥哥迷人嘅歌聲同高雅嘅氣質不單止得到香港人嘅歡心，喺東南亞地區都係風靡萬千歌迷，係香港粵語流行音樂嘅代表人物。

張國榮喺電影界都係揚威海外，舉世無雙。最初出演《英雄本色》、《倩女幽魂》、《胭脂扣》已經初露鋒芒，之後出演《阿飛正傳》獲封香港影帝，憑著《霸王別姬》揚名國際，榮獲各國影評嘅讚賞同肯定，踏上世界巔峰。哥哥嘅演技精湛，加上角色多變，獨特嘅氣質亦令佢嘅演出別有一番味道。張國榮出演咗唔少港產片經典，係香港電影史上其中一個最偉大嘅演員。

忠於自我 敢於抗爭

「我就是我 是顏色不一樣的煙火。」— 張國榮《我》

張國榮勇於挑戰保守社會嘅道德框架，打破性別嘅規範。佢嘅衣著大膽前衛，不時以相對女性化嘅形象演出。喺九七年復出演唱會入面，佢著上鮮紅色珠片嘅高踭鞋，搽上艷紅嘅唇膏，與男舞者共舞，盡顯高貴艷麗嘅一面。喺電影方面，哥哥都經常出演性別模糊嘅角色，喺《霸王別姬》同《春光乍洩》更出演同志角色，唔怕世俗眼光同批評，演出一幕又一幕經典。

當年香港社會對同性戀、性別等議題非常保守，但身為巨星嘅張國榮卻選擇忠於自己，敢於挑戰主流，對香港同志、性別運動發展有著深遠影響。

高尚情操 芳華絕代

「傾國傾城 是我大名」— 張國榮、梅艷芳《芳華絕代》

世人對張國榮嘅為人都有好高嘅評價。佢為人友善，重情重義，好多香港歌影視明星都曾經得到哥哥嘅提攜同鼓勵。佢行事謙虛低調，熱衷兒童慈善事業，親民嘅形象深入民心，係娛樂圈少有嘅「清泉」。

樂壇天后梅艷芳係哥哥嘅摯友，喺零二年兩人同台合唱《芳華絕代》，表演艷壓眾生，可惜已經成為絕響。喺好多香港人心目中，張國榮係有著不可取代嘅地位。

巨星殞落 永遠懷念

「你離開了卻散落四周」— 張國榮《左右手》

二零零三年四月一號，張國榮喺香港文華酒店墮樓身亡，遺書話係同抑鬱症有關。哥哥逝世嘅消息震驚全港以至全世界，好多人都以為只係愚人節嘅玩笑，唔願意接受事實。當年香港喺中國肺炎–沙士嘅陰霾下，社會已經瀰漫住絕望嘅氣氛，哥哥嘅離世無疑係令香港人倍感悲傷。

喺出殯當日，即使肺炎肆虐，幾萬名群眾依然冒雨聚集喺香港殯儀館周圍，為咗見哥哥嘅最後一面。香港人對張國榮嘅思念從未間斷，每年嘅四月一號都會有人提起同舉辦悼念活動，十七年嚟風雨不改，未敢忘記。無論係張國榮生前留下嘅美好，定係離開時帶來嘅痛悲，都係香港共同體嘅集體回憶。

能延續輝煌 因你尚在場

「春天該很好，你若尚在場」 — 張國榮《春夏秋冬》

唔知張國榮仲在世嘅話香港會係點，但可以肯定嘅係，張國榮代表咗八九十年代香港文化嘅輝煌時代。希望每一位香港人都試下去聽下張國榮嘅歌、睇下佢嘅電影，好好欣賞下香港文化嘅韻味。香港曾經孕育出才華滿溢嘅張國榮，得到世人嘅尊重同認同，香港就係一個會創造無數傳奇嘅地方。立足本土，放眼世界，香港人一定會再創輝煌，香港係會有光復嘅一日。

香港一定會變得很好，只要你願意留低在場。