【攬炒論】當壓迫成為事實 攬炒就係義務
面對極權降臨,我哋會迷失、恐懼,甚至想放棄。但你有冇諗過極權比我哋更加驚,所以先要出盡方法打壓?「攬炒」係香港2020年嘅關鍵詞,亦係重要嘅抗爭方向,但有幾多人真係明白「攬炒」嘅意思?
![](https://assets.matters.news/embed/a967d9d8-5214-4c3d-858c-f460e36a2cda.png)
攬炒嘅原意
「攬炒」一詞興起全因為連登用戶「我要攬炒」。喺反送中初期,攬炒巴加入國際戰線,爭取取消港共官員同奶共派嘅外國護照,要賣港賊永世留喺大灣區。佢喺每個連登帖文最底都會引用電影《飢餓遊戲》嘅對白: “If we burn, you burn with us.”作結,呢句話代表咗攬炒嘅精神。
![](https://assets.matters.news/embed/9a1df0ac-c297-4f65-a429-b3ba5b1c4571.gif)
「一國兩制」本來就係中共精心策劃嘅計時炸彈,而送中條例係導火線,一旦被點燃就一發不可收拾。當我哋睇住心愛嘅家園將被摧毀,卻未能阻止大火蔓延,就唯有攬住敵人同歸於盡,要中共為惡行付出沉重代價。
![](https://assets.matters.news/embed/f1f4f075-fef8-47a6-a9fe-406fad5e327e.jpeg)
攬炒係別無他選
攬炒嘅前題係敵方要炒我哋,而我哋阻止唔到情況變壞,別無他選嘅情況下,先要攬住一齊炒。唔係事事都要攬炒,但好多人錯誤引用攬炒嘅概念。
![](https://assets.matters.news/embed/08a1b374-ee9f-4300-bb52-bc6df06bcdf2.jpeg)
例如唔戴口罩唔算攬炒,因為戴咗就可以阻止情況變壞;自己貿貿然罷工唔算攬炒,因為一個人嘅罷工傷唔到敵人。攬炒唔係任意嘅自殘行為,而係經過理性思考嘅抗爭策略。攬炒需要因時制宜,有得揀冇人想自殘,但如果冇得揀,就要確保敵人為此付上代價。
![](https://assets.matters.news/embed/881bc610-aac4-4c59-8790-b5c7cb794118.jpeg)
被扭曲嘅攬炒
近日中共喉舌日日提「攬炒」,背後係搶奪緊對詞語嘅詮釋權同話語權。將「攬炒」定義為一種純粹嘅破壞,配以片面嘅描述,例如經濟差、冇飯開、世界大亂,其實係「搞亂香港」嘅變種。文宣對象係淺藍淺黃嘅基層或中產,睇中佢哋追求安穩、物質生活嘅心態,令佢哋對「攬炒」產生恐懼同反感,從而達致維穩同統戰。
![](https://assets.matters.news/embed/081084e6-c985-41fb-b17d-6157ace016ac.jpeg)
港共過去一直打經濟民生牌做維穩,但今次巧炒之處係採用咗我方嘅語言,加以扭曲同詮釋,再全力用國家機器去搶奪話語權。一旦我哋對「攬炒」失去詮釋權,再講「攬炒」就會和應敵人嘅定義,幫敵人嘅文宣助攻,所以「攬炒」係要由我哋去定義。
![](https://assets.matters.news/embed/66eb5135-d63f-4269-8b83-4c7f3dcec045.jpeg)
攬炒係積極建設
過去接近一年嘅抗爭,我哋只係撕開咗政權嘅遮醜布。喺中共殖民下,體制內外上下早已腐敗不堪,香港已經病入膏肓。期望小修小補嘅改變就可以拯救香港,只係痴心妄想,自己呃自己。香港需要全面嘅革新,而攬炒就係推倒重來嘅過程。
![](https://assets.matters.news/embed/03a592ab-5d2e-4902-9daf-8e7514673642.png)
面對不可逆轉嘅沉淪,如果香港要再出發,就必須要先破後立。即使攬炒嘅過程中會經歷陣痛,但最終目標係為咗建設更美好嘅將來,係排毒嘅必經過程。攬炒唔係純粹嘅破壞,而係破舊立新嘅決心、浴火重生嘅覺悟。
![](https://assets.matters.news/embed/6c901aaf-2c3c-4039-a005-6446af89eabe.jpeg)
攬炒係以弱勝強
面對廿一世紀最強大嘅獨裁政權,正面對抗只係以卵擊石,難以撼動政權。我哋必須承認敵人嘅強大,再反思自身嘅優勢。香港作為全球最大離岸人民幣中心、外資流入中國嘅主要渠道、中西之間接駁嘅窗口,有不可取代嘅地位。
![](https://assets.matters.news/embed/614a8e75-9936-4e77-b117-fff1a5ee98b6.png)
正因為香港係中共嘅要害,攬炒就係令政權恐懼嘅叫價。如果我哋表現出不惜以烈火洗滌自身嘅攬炒意志,中共將會害怕被烈火吞噬嘅可能。攬炒就係一種脅迫嘅手段、雞蛋挑戰高牆嘅最強武器。因為雞蛋唔怕犧牲自我,但高牆非常懼怕倒塌嘅一日。
![](https://assets.matters.news/embed/60468e75-675c-4ea3-8a59-69d1b7df19ca.jpeg)
攬炒係一種精神
以前嘅「獅子山精神」著重拚搏,追求安穩同物質生活,係舊時代嘅共同價值。歷經時代革命後,香港民族嘅共同價值已經昇華到另一層次。「攬炒精神」不但承傳咗舊時代嘅拚搏,更展現咗逆境中嘅堅毅,以及爭取自由民主等精神價值嘅決心。
![](https://assets.matters.news/embed/a60f321e-30c2-4227-b758-2be7d8b17b20.jpeg)
「攬炒」唔係特定嘅破壞行為,而係一種高尚精操。正如攬炒巴所言,「攬炒」唔係”Burnism”,而係”Phoenixism”。我哋唔甘願香港被燃燒殆盡,淪為只剩下空穀嘅中國城市,所以先要以攬炒精神與政權對撼。即使暫時未見成果,但革命嘅火焰已經燎原。香港定必會如鳳凰般浴火重生,回復昔日嘅光采。
(鳴謝Mr. Carlos Albertosi借出封面素材,佢啲相影得好靚,大家可以支持下)
光復香港 時代革命
民族自強 香港獨立
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!