海賊 獨眼龍

彼工早起拄起床，發現一蕊目睭挺袂開

照鏡一看驚一抖，倒手爿的目睭腫佮像麵龜

藥洗罨好猶原豉豉刺刺

看起來袂輸一个海賊獨眼龍

敢那用正蕊目睭看世界

連佇平平路行路攏歪格歧差

厝邊彼陣猴囝仔 一直剾洗講是偷看人洗身軀才會生目針

只好咒詛怹 另工麻生目針時 一蕊目睭生兩粒 腫做一隻那胡蠅

原來海賊 獨眼龍

正手邊的眼界比平常時明

倒手邊的聲音比以早卡清

莫怪行路會悾跤顛

黑仁目鏡掛牢牢 不管日時也暗暝

毋那家己愛媠驚歹勢 麻驚人閣笑我是不三不四鬼

等到孵膿才去看眼科

醫生罵我烏亂來險險出代誌

無講半聲伸手得對目睭皮捻落去

擋不著 共人兜祖公仔十八代攏打過一擺招呼

護理師毋敢笑出聲 佇邊仔罨嘴捻大腿

好家在人醫生大量毋計較

交代轉起愛注意逐工抹藥膏點藥水

獨眼龍啊 獨眼龍 一點仔也無飄撇

目針拜託毋通閣再生