榮華臘腸係咪想恐嚇年輕人？

今日睇咗榮華臘腸條廣告片，真係心都寒埋，堪稱本年度香港最佳恐怖短片！

https://www.youtube.com/watch?v=KWcQM0HZyG4

條片本來係打感動，sell年輕人(麥兜)辭咗份工追求理想(玩滑浪風帆)，然後…佢死咗！

Sorry快得滯，回一回帶先。條片本來一路冇乜問題，後段麥兜同愛人去滑雪，然後雙雙躺平響雪地上，最後竟然變咗白飯上面嘅一pair臘腸！就係呢個shot，一秒間令呢條溫馨廣告片變成恐怖片。

此片一出，網民馬上認為係廣告界嚴重炒車事件。有人記起麥兜廿年前講過「香港運動員唔係臘鴨」…但原來係臘腸！甚至有人將「雪地孖腸」聯想到十年前港劇《天與地》被人食咗嘅家明！我唔知而家有幾多小朋友仲鍾意麥兜，如果佢地第日食臘腸的時候想起原來係食咗麥兜落肚，心理陰影面積唔知有幾大呢？

究竟係邊個廣告界天才度條咁嘅蹺出嚟，係咪同個客有仇？但由於條片嘅storyline同個ending太違和，我又想到會唔會「人變腸」呢個idea其實係個客夾硬要加落去嘅呢？我想等廣告界中人畢明爆下料。

我相信而家榮華已經知炒晒車，所以條廣告片響Youtube已經關閉留言，遲啲可能會下埋架，大家有得睇好快啲睇。

咁成條片究竟想帶出咩訊息？係咪即係話一個為咗追求理想嘅年輕人，最後會變成一條臘腸，下場仲慘過一棵韭菜？韭菜都係被割啫，割完可以再生返(跟著再被割)，臘腸係被人成條食咗永不超生。榮華臘腸係咪想出呢條片恐嚇年輕人，叫佢地快快快離開香港？講到咁白會唔會從而危害國家安全呢？呢個時代真係太多靈異事件，冇乜事我返出去先。