love nature, love travel, love drawing, love photographing

My little detour - 《本來諗住跟團就算0既Hierve El Agua同el Arbol del Tule之旅》

2022 年 5 月 21 日

10 Aug 2019, Sat (Day 72 晴, Oaxaca, Mexico )

今日08:00已經出發，一心諗住去返上一次住嗰間hostal報佢個tour, hea hea地咁去Hierve El Agua 同埋el Arbol del Tule再加另外三個搭單景點。去到hostal我表明唔係佢哋住客，但想join團ok唔ok。佢好好，幫我打左好多個電話，但原來10點的團已經出發，雖然我𢱑頭點解咁早出左發，不過我都好多謝佢幫手，佢仲提我其實zocalo有好多大同小異的tour可以參加。

而家呢個情況，我又諗下好無明天跟而家住緊0既hostal嘅 tour, 然後今日睇下有咩方法自己去Tule。

返到hostal食個勁簡單嘅早餐（多士同蕉同咖啡，無食cereal)。諗諗下不如問下reception有無其他建議。好彩呢個receiption識英文，除左比張map我，仲應我要求幫我係張map到mark低邊到搭public bus添。佢話如果我去晒兩個地方最好早的出門口。咁我梗係拿拿林去埋廁所立袋走，點知...同房沖緊涼，最後搞到10點先出門口。我出左hostal轉左再轉左，然後直行到大馬路，見到有collectivo, 但問左又唔係，所以問下途人，大概意思係過對面馬路就有車。我一過對面馬路就聽到有人講Mitla, 咦，咪就係我要去嘅地方？因為reception話要係Mitla轉車去Hierve el Agua, 於是我第一時間就衝左上車。車費20 peso。

其實呢程車都好抵搭，因為成1.5 hrs車程。到站司機會好大聲講 Hierve el Agua, 原來嗰到已經有小型truck仔等緊遊客去Hierve el Agua, 我諗車頭會逼逼地，但貨車尾唔見得好好，我地9個人逼係個細細的空間，如果有肥少少人坐佢就會賺少左，因為只要塞得入佢都會繼續塞人，仲要有個係要坐住唔固定嘅櫈，其實都好危險。呢架車收費每位50 peso, 而我亦終於明白點解，因為山路其實幾崎嶇，可能架車損耗會幾大。而係經過架truck車頭的一剎，有個男人同我揮手，我第一樣諗到嘅係古巴撞到的日本叔叔，但再諗應該係San Cristobal嘅Bill叔叔, 噢! 呢刻我有唔好預感。

到左Hierve El Agua 未落車已被收入場費，好彩25 peso唔算貴。落車後，果然不出預期，阿Bill有等埋我，好彩仲有另一個英國女仔Miss V，如果唔係....

咁一去到當然去個廁所先（5 peso), 之後阿Bill開始問我食唔食fruit cup, 咁無所謂，佢想食咪買囉，咁當然佢係好大方咁請我地食啦。之後落到去個景點，由於太多人，基本上都好難影到相。其實呢到嘅係溫泉水，但又由於覺得的水唔太乾淨，所以基本上完全無落水嘅衝動，咁亦都當然因為...無帶泳衣啦！

咁我同Miss V就行出另一邊的池仔，而Bill就選擇留係infinity pool嗰邊休息。

其實個水池實在令我有點失望，又因人多關係，基本上都無咩心機影相，之後返去會合Bill諗住走，點知佢又話想食的野。ok，其實我無帶lunch都可以食，但無我最愛的tortas, 所以本來諗住食嗰杯fruit agua就算，但佢地又好有誠意咁叫我都一齊食，不過由於佢地點嘅係重芝士食品, 所以我都無咩點食。食食下阿Bill又擺低錢話去排隊等車先，搞到我地都好似趕頭趕命咁，最終呢餐要165 peso, 而明明睇過佢地叫的每碟只係30 peso, 唔通反而嘢飲35 peso一杯。最後夾返50 peso比Bill, 早知我一早話搭車走先唔食呢餐啦！

其實我真係唔太鍾意阿Bill成日夾硬將自己想做嘅嘢加係人地身上，最慘係佢成日叫MissV幫佢問, 聽到都覺得好煩厭, 但我都唔可以一味埋怨, 明明我平時都會拒絕人架, 哈哈！後來有truck到我地上車，我仲懷疑其實我地打左尖添，但算啦，最後個個都上到。上車時阿Bill叫我同Miss V霸前面車頭位，我同Miss V話我同佢可以坐後面，叫Bill坐前面舒服d。點知佢又覺得難落台，陪我地坐後面以示gentleman。 Ok, 咁坐左陣都唔開車，佢又落車走去八下咩事，原來仲有個位未fill。佢就話好無大家spread左個cost等佢快的開車，我真係o左咀，佢心急得嚟係覺得人地都一樣心急，我忍唔住話其實都好快啫！跟住再等一陣有人上車，而最O咀係架車開時，阿Bill選擇企起身，我又抵唔住頸講咁樣好唔安全，叫佢不如坐返低。咁當然佢話有分數啦，仲話唔係好顛簸添！梗係啦，呢段路鋪左架嘛。咁當然之後‘櫈’嘅路佢都有坐返低，由於佢keep住講野同埋keep住叫Miss V幫佢問嘢，我唯有扮瞓聽唔到。

架車去到Mitla後，我真係頂唔順唔想同阿Bill一齊返去，於是我問咁啱頭先係Hierve el Agua撞到一齊搭車的George係咪去Tule, 我可唔可以跟埋車一齊去。好彩我問得早，阿Bill一落車就衝去的士站問有無的士返Oaxaca，佢仲走過嚟話好平， 30 peso/人頭。 Well,如果我同你同的士，我隻耳仔仲得了嘅？於是我話我去Tule唔返去住。係Bill仲撲緊的士時，我問Miss V阿Bill好趕住返去咩？點解樣樣都催住催住咁，當然Miss V表示不明白。

脫離阿Bill後，我同George, Sam同另一個女仔去左搭的左到Tule (30 peso), 原來呢到係一個鎮仔，其實都幾舒服。