做出版嘅＜１＞藍紙

做出版嘅，一定知道咩係藍紙。 冇掂藍紙兩三年，最近又掂番，你話係咪犯賤吖。 未做過出版嘅，等我解釋吓咩係藍紙。

「藍紙」係做實體出版中重要嘅一環，亦係出版前最後Confirm嘅機會。

當書刊稿件送到印廠，印廠會按紙張大細，將唔同嘅頁數拼版，然後就會「出藍紙」，即係提供一份打稿，喺印刷前俾出版社做最終確認。當藍紙通過，就可以正式印刷，調番轉講，檢查藍紙就如同守尾門，有規模嘅出版社一般會由執行編輯Final Check，發現去到藍紙呢個程序仲有問題，就係修改嘅最後機會。而當藍紙OK，印廠就會正式開機印製。

其實入稿［*1］之前，份稿應該都睇過Ｎ次，去到藍紙階段，正路都唔會Check錯字呢種低級Mistake（雖然我成日犯呢啲錯），而係睇吓啲頁面有冇調錯、出血位夠唔夠之類。

以前藍紙嘅最大問題，可能係只可以反映一種顏色（藍色囉），所以如果係四色印刷，之後仲要睇彩色打稿。

咦唔係喎，藍紙嘅最大問題，應該係甩色同埋陣味！

因為以前藍紙真係藍色㗎！因為以前出版係用曬菲林呢個喺江湖失傳已久嘅技術，需要用「氨水」曬版，令打稿呈現藍色，所以份打稿稱為「藍紙」。而且氨水搞到份藍紙濕𣲷𣲷，又有好大陣阿摩尼亞咁嘅化學品氣味，睇得耐真係有少少上腦，睇完又成手藍色要去洗手，好多編輯都唔鍾意睇藍紙。我以前一路睇藍紙一路食嘢，唔覺唔覺可能都食咗唔少氨水落肚……。

我自己就好鍾意睇藍紙喇，因為代表距離出書只差一步。

今時今日已經用電腦出稿，唔會再曬菲林，藍紙唔再係藍色，但係依然保留呢個叫法，提醒啲老餅編輯那些年有過的青春歲月。

除咗出版社編輯要聞啲藍紙味，印廠師傅都日日係咁聞，所以聽講以前印廠啲師傅做唔長，好後生就要逼住轉行。出書真係搵命摶㗎。

一諗到呢度，係咪會更加愛惜手上嘅一本書？

以前TVB有套劇集係講出版時裝雜誌（唔記得套劇叫咩名，不過叫咩名都一樣），偶然睇過一集，係汪明荃做總編輯，因為唔知邊個編輯整唔見咗份藍紙而發晒脾氣大吵大鬧，大叫「我份藍紙去咗邊呀～」。

望到呢幕真係笑出聲。明明嗰陣TVB自己有出版《TVB週刊》（前身係《香港電視》），搵番自己同事攞料參考吓有幾難？唔見咗份藍紙唔駛死嘅。

一次過睇兩本書嘅藍紙，high到爆炸。

係咁，藍紙嘅日文係咩呢？

一般會叫「ゲラ（gera）」，字源來自英文嘅「Gallery Proof」，可以代表打稿校對（ゲラチェック），以前日本都係曬版出藍紙（製版フィルムの青焼き）嘅年代，就係叫做ゲラ。而家嘅ゲラ已經唔係藍紙，而係入稿前最後檢查。突發諗起想紀錄低一啲出版嘅嘢，於是由就手嘅嘢開始。最近最就手就係藍紙。「做出版嘅」呢個系列唔知會唔會寫落去，睇吓我做緊咩啦。

多謝你睇到呢度，SORRY又係業配文。

買書呢度：（開放預訂）

[版權消息]漫讀文化取得《Levius》版權 : 漫讀文化

［*1］入稿（にゅうこう）

香港係冇呢個術語嘅，日文「入稿」嘅意思，就係「發稿落印廠」。睇《爆漫》日文版經常會出現呢個術語。