我的创作之路

首先系开始之前，请容许我用少少篇幅特别感谢一个人。虽然我系Matters 上面遇见好多人，亦都希望有机会多谢大家一直都支持我，例如： @志工爷爷、 @阅读笔耕、 @Sunline等等（人数太多，不能尽录，不过当然系系多谢各位支持）。但系相比起以上各位，我更加想特别多谢一个人，就系推我入坑慨@阿唯。阿唯，如果唔系你当初系Facebook定唔知系边度讲话创作可以换成加密货币，令到创作有价值，我绝对唔会加入创作呢一个行列。我虽然到依家都仲系一个无乜人识慨人，但系如果唔系你当初介绍Matters、Medium同Likecoin，我绝对唔会认识呢一类创作平台同加密货币慨关系，甚至更加唔会有机会系呢度认识到大家。所以真系好多谢你，请容许我依家先用文字上讲一声多谢。 5月28、29号，如果RG成功举办，请容许我到时亲口同你讲声多谢，因为你带俾我慨获益绝对唔系可以用文字上表达，真系好多谢你。请原谅我系一个唔识得点样表达多谢慨人，但系我系发自内心衷心感谢你。请容许我夸张啲咁讲，如果唔系你慨介绍，绝对唔会有今日慨成就，多谢。

其实对于我自己来讲，究竟咩系创作？其实创作同作文我觉得最大慨分别系：创作我系可以对于我自己有兴趣慨题材发挥；而作文比我慨感觉就系为了交功课同考试而作文。回想DSE，虽然我中文卷五写作同卷五综合能力都有最高级慨5**（呀系，我仲系考五份卷慨年代，大约可以估到我几多岁），但系现实就系，如果你要我坐定定揸支笔写几千字慨文章，我绝对无兴趣，虽然我平均一个钟可以写到千二至千五字左右，但系始终如果要为考试而作文，咁样都只系迫于无奈慨选择。但系依家来讲，创作对我完全系截然不同慨事。既没有古板乏味慨评分制度，亦都唔需要同人斗快，我可以对自己有兴趣慨题目进行唔同慨创作同见解，绝对系一件开心好多慨事，所以创作对我来讲系一件我可以对自己钟意慨事情畅所欲谈慨事。

其实系最初慨时候，我系Matters同Medium两个平台都有用，不过依家就全力集中系Matters上面，Medium基本上就已经系一个放弃状态，甚至乎有冲动想铲除帐户。其实我会主力使用Matters慨原因其实好简单，就系相比起Medium，Matters最少比我感觉到系有人同你互动，而唔系好似Medium咁样又无人Like，又无人回覆，同写比空气睇无分别。虽然曾经听人讲过，Medium只有好少中文创作者使用，但因为相对上竞争比较少，所以较容易吸引的人阅读。但系对于我呢种完全无人认识慨人来讲，唔好话吸引读者，连有无人睇过都唔知，所以之后我就正式全面转投Matters 慨怀抱。虽然好笑慨系我依家系Matters 都仲系一个唔起眼慨作者，但系相比起Medium，起码系呢度我认识到唔同慨创作者，甚至乎可以有好多唔同类型慨互动，更有不同机会参与唔同慨活动，除了令到我获益良多，而且也可以认识到世界各地唔同慨朋友，起码比我自己知道我付出慨努力系有人睇到，而唔系写比空气睇。

唔知大家有无发现，虽然我一直都将动画放系自我介绍慨第一位，但系有无发现已经逐渐变成每月一篇，唔系大家细个时候熟悉慨每日一篇，系真系每月一篇。其实虽然我自己喜欢动漫，要我写唔同作品慨评论我绝对系乐于其中，但系毕竟我始终都要向现实低头。正如我一直都系度讲，ACG呢一种文化其实已经开始逐渐融入大众慨生活，甚至乎开始越来越多人接受，但系大众慨认识可能只有大热慨作品，例如《鬼灭之刃》、《进击之巨人》等等，相比起每一季4、50套慨作品来讲，绝对只系冰山一角；但系大众往往对于其他作品一闻不晓，甚至乎可能觉得一年剩系得一、两套作品。但系对于我自己来讲，对于上面呢一种极度大热慨作品，我绝对系唔钟意。唔系话我唔钟意呢种作品，只系题材完全唔啱我，我更加钟意可爱慨萌妹子，例如「芳文社」、「主妇与生活社」出品等等。但现实慨遗憾就系，如果唔系呢一类大热慨作品，观看慨人数绝对系小众，甚至乎可能只有真爱慨人会留意唔同慨作品，更何况我呢种写评论慨人？观看慨人数只会少之有少。但系即使系咁，我相信创作系自由慨，就算只系好少人会睇呢一类慨文章，那怕只系一个都好，只要有一个人透过唔同人慨评论，从而睇多一套唔同慨作品，其实已经系对整个产业最大慨支持。始终现实就系周边商品慨销量往往决定一切，多一个人买周边产品，对整个行业绝对系一件好事。近年来虽然呢个市场扩大了，但系始终一季有成4、50套作品，基本上我都唔会选择全部睇晒，所以我谂我净系会拣自己有兴趣慨睇，当然啦如果真系有兴趣慨，那怕无人睇都好，我都系会继续创作唔同慨动画评论。

另外一样我每半年左右会讲一次慨就系F1，我相信大部份人都应该有个疑问，点解咁多体育赛事唔讲，偏偏要讲咁小众慨F1？我谂呢个都系属于一个我自己慨问题，因为如果你要我坐定定睇一场最少90分钟慨足球比赛或者篮球比赛，我系绝对顶唔顺，我可能睇完开波头1、2分钟左右就会转台或者熄电视。又或者咁讲，我对球类运动慨认识少之又少，例如对我来讲，我觉得英格兰超级联赛系福冈软件银行鹰对皇家马德里？种种原因亦都导致我对呢种世界上最多人欣赏慨体育赛事无兴趣。但系唔知点解，由细细个开始，我对于充满噪音慨F1同埋MotoGP产生浓厚慨兴趣（需要知道以前慨F1同MotoGP制造慨噪音相比现在系大声唔知几多倍），加上可能因为细个钟意睇撞车片段？我知道咁样讲好衰，但系以前细个真系唔识野，所以自细就对汽车运动产生浓厚兴趣。大个之后，而且网络急速发展，令到我接触唔同汽车运动慨资讯大幅增加，但系始终令到我念念不忘慨都仲系F1同MotoGP，所以亦都开始主动浏览唔同慨资讯。我绝对唔会称自己系达人，只系觉得既然无人在Matters 上面介绍汽车运动，咁不如就等我做。因为始终我自己觉得，汽车运动都系运动慨一种，但系点解唔可以好似足球或者篮球运动咁样咁多人接纳。不过遗憾慨系，华文地区专门对于汽车运动慨报道或者评述人员少之又少，可能比稀有生物更加稀有，所以我希望可以透过我唔同慨介绍，令到更多人可以留意呢一项支出同广告费可以媲美甚至乎超越足球同篮球慨比赛项目。

大家见到我每篇文章都咁多字，可能好多人都以为我系一个好勤力慨人。但系大家千祈唔好误会，我真系唔系一个好勤力慨人。正如我系上面咁讲，虽然我绝对唔系讨厌创作，但系绝对唔会得上极度钟意创作。我对文字绝对称唔唔极度喜欢，但可能因为我性格问题，我唔系咁叻用语言表达自己任何感受，但系相反地我系钟意用文字表达自己，所以可能亦都系导致到点解我会开始创作慨原因。系已经结束举办慨CP同人祭，当中每年慨口号其实真系一句好好慨句子：由业余到专业之路，守护创作种子，由同人爱出发。我自己亦都曾经有创作过同人本子，虽然总支出唔系好多钱，甚至乎大部分本子都仲系在我屋企封尘中，但系其实我真系好享受成个创作过程。虽然已经系隔咗好多年慨事，但系我仍然好记得第一位购买我创作慨本子慨人，甚至乎当晚系Facebook某一个post 竟然可以见到有人介绍我自己创作慨本了，果一刻我见到自己慨努力得到别人认同，我记得睇到慨时候我同朋友食紧饭，果一刻我真系即刻喊咗出黎。可能亦都系因为果一刻慨感动，令到我自己内心对于创作慨呢粒种子慢慢发芽，或者唔系当初慨感动，就唔会有今日慨我。不过回归现实，目前以我慨人气或者各方面，每一篇文章唔好话买个午餐食，甚至乎去无良印品买支笔都唔够，但系又如何？那怕只系一个Like都好，起码都比我知道我慨努力系有人欣赏，而唔系写比空气睇。正如阿唯咁讲，唔理一个Like定一千个Like都好，每一个创作都有属于自己慨价值。

呢个礼拜唔经唔觉出咗三篇文章，真系觉得自己应该系痴咗条筋，我个肝都开始罢工，希望下星期六见啦，如果我个肝好返慨话。临走之前，衷心希望你可以系下面拍5下手，作为继续支持我慨原动力，多谢。