2022年1月选购Router 记录

讲明先，我完全无任何人或者厂商赞助（我亦都希望有Www） ，除咗所有Router品牌之外，其他品牌都会作轻微处理；而最后我亦都系实际使用真金白银买下来的。

话说自从我写完上一篇评论之后，正当我我系住满腔热诚谂紧下一篇文章系写咩慨时候，突然我屋企人同我讲世界末日。需要明白，对于现代慨都市人来讲，世界末日就系断Wi-Fi慨时候。虽然我未系一个过度成瘾慨网络使用者，但系如果缺乏了Wi-Fi，肯定会带来很多的不便。咁你可能会话，依家手机网络咁方便，咁绝对可以用自己部电话share出嚟用。系你讲得无错，但系我自己一部iPad，一部PC，一部MacBook，加上屋企人一人一部电话同埋加上大量慨唔同装置，例如电视同Apple TV等等，同埋两部NAS，自己用自己慨电话share出嚟绝对系唔可行，咁所以唯有都真系走去买部新慨Router。

首先讲吓我旧慨Router，我依家用紧慨系Linksys WRT1900ACS，我记得系2017年年头买慨，买嗰阵好似出咗都无几个月，嗰阵我记得系仲送咗$500超市礼券，所以好似都系～＄1000左右，嗰阵时买落其实就有少少后悔，因为嗰个年代呢一部算系比较高级少少慨Router，但系好似因为隔咗无几耐就出咗新版本，不过既然买咗就继续用落去。本身头三年都无乜问题，但去到2020年8月左右开始出现唔稳定，咁反正都唔谂住拎返去原厂维修，所以就刷第三方软件（好孩子应先考虑是不是刷第三方软件，因为有机会牵涉保养问题，或者引致官方拒绝保养，同埋系需要有一定知识基础才可以顺利进行）。开头选择用DD-WRT，但几日之后发热问题更加严重，所以改用OpenWrt，减低Wi-Fi功率输出后，勉强都可以继续使用，幸好一直过热情况也只是偶有出现，尚未至于影响日常使用。但是一踏入2022年，正当我准备上一篇文章慨时候，开始发现Wi-Fi经常断线，而且5Hz的Wi-Fi更加经常无故消失，本应打算过年后先至买新慨Router，但系谂唔到竟然情况快速恶化，虽然未去到不能使用慨地步，但系因为经常断线严重影响日常使用，即使使用有线连接也如此，所以迫于无奈之下只好打开Google，查看合适的替代品。

首先我拣咗牌子先，如果唔系咁样做肯定唔使收窄范围。乜link 同乜乜link呢一类牌子根本就唔会考虑，一来就系品牌问题，二来就系主要都系用Intel CPU。如果喺电脑入边，我绝对建议用Intel CPU；但如果系Router，除非系商业级使用或者在机房使用，否则我不太想考虑Intel，因为为咗有更好慨散热效果，好多时会CPU会主动降频，而且能够调校慨范围也不大（Wi-Fi频率），而且将来过咗保养之后，如果我想再一次刷第三方软件，Intel的选择少之又少，而且可以刷的机种实在不多，所以根本不会考虑。至于二手，如果系电脑用慨CPU，我绝对赞成你去买二手，因为会坏慨机率实在唔多，虽然唔系话无，但正常用真系好少会听到坏CPU；但如果系Router，因为Router长期处于高热状态，如果上一手用家使用时候没有提供足够慨散热或者经常没有重新开机，绝对系会影响表现，加上科技日新月异，呢啲梗系有新买新比较好，反正仲有一日家里慨设备都会逐渐升级，所以长远计都系买新慨比较好。至于买行货定水货，亦都正如我头先咁讲，始终Router同雪柜一样，都系一样长期会开启慨电器，而且会产生大量热量，虽然买水货可以平接近一半，但系为咗安全同埋将来售后保养，所以我都系宁愿俾贵啲买行货，买个安心，同埋有咩事真系要换都可以直接拎去香港指定慨地方维修或者更换，相比起寄返去原产地一定快同方便好多。

咁样筛选完之后，突然之间发现自己慨List入边得返几个牌子选择。我同大家一样，都系住喺啲2、300尺豆腐润咁细慨屋入边，所以Mesh 呢样嘢可以唔使谂。经过千挑万选之后，最后剩返ASUS 、Netgear同Linksys比我自己拣。本来我都谂住继续用Linksys，但系发现介面始终十年如一日，唔系话唔好用慨，只系我用过之后，觉得有少少唔人性化，简单啲讲即系唔User-friendly，所以又可以唔使考虑。 （呢个原因亦都系点解我会咁努力钻研刷第三方软件慨原因，因为好多其他牌子本身就有慨功能渠系完全都无）

牌子之后先继续拣，而家拣咗第二个重要慨嘢先，就系Wi-Fi 5、6定6E。正如我上面咁讲，科技日新月异，有新慨梗系买新野啦，但可惜慨系，Wi-Fi 6E香港好似都仲正式未批准使用，咁所以净系得返Wi-Fi 5同W-Fi 6拣。 Wi-Fi 5 即系大家熟悉慨802.11ac，而Wi-Fi 6就系目前最新慨802.11ax。其实呢就好尴尬，如果我用相同价钱，都系大约$1500内，如果买Wi-Fi 5慨设备，就绝对可以买到接近旗舰级慨设备，毕竟已经系2013年推出；但如果买Wi-Fi 6，最多只可以买到高阶慨设备，不过既然我都用紧iPhone 13，咁不如真系唔好虐待自己，都系买Wi-Fi 6慨设备，感觉上可以用多几年，比较化算。

可能对于好多人来讲，Wi-Fi 慨速度都好重要，所以绝对希望可以买更加高级同更加靓慨Router从而提升速度，但对于我自己来讲，稳定先系最重要。不过话说惭愧，我虽然系用最新慨iPhone 13 Pro，但系我自己慨电话月费计划就系用最平慨LTE网络，反而我屋企人系用收唔到5G慨电话用5G网络，所以我比较着重于稳定方面，因为就算你比到一个几快慨速度我都好，但系如果唔稳定，成日断线，咁对我反而系一个影响。咁当然啦，呢个世界边有咁大只蛤乸随街跳，又想平又想靓慨选择其实真系唔多，加上对我自己来讲，Router始终都算系消耗品，我又唔舍得买太贵，同埋呢啲用几年就会换，所以对我来讲只要唔好太贵，表现中规中矩已经可以接受。经过咗一轮慨筛选之后，其实我心目中已经得返ASUS AX58U／AX3000同NETGEAR RAX50选择。首先呢我想讲ASUS AX58U 同AX3000 规格、重量、制式等等完全一样，我当初为去咗搵佢地分别真系搵咗好耐，结果最后发现只系喺美国销售都系全球销售慨版本名称唔一样，但更加神奇慨系两个版本喺香港都系完全可以买到，唔单止价钱一样，而且优惠都是一样，咁点解唔可以同消费者讲明就系一模一样慨产品，系都要专登整多个型号出嚟令到人觉得好似有多一个选择。不过点样都好，我始终都系要作出选择，所以无谓再纠结系呢啲细节上面。

其实如果以价钱黎选择，其实真系好难分出高低，因为综合各大销售地方慨价钱，两个型号相差其实真系唔超过$100，有啲地方甚至乎只系差几十蚊，嗰一下真系令到我选择困难症发作。既然价钱都差唔多，咁不如就比较大家唔同。其实我搵到最唔同慨地方就系两个输出频率唔同。 NETGEAR Wi-Fi输出最高速度理论上可以达到4800 Mb/s，但ASUS 最高速度理论值只有2402 Mb/s，明显相差了超过2300Mb/s。虽然如果从数字上来讲，NETGEAR绝对系优胜，但系亦都代表我长期宅喺屋企慨我长时间都会接收到好强劲慨Wi-Fi，我虽然之后我都会调校到最弱慨输出模式，减低辐射接收（？），加上我屋企拥有智能家具慨设备系零，而且将来亦都唔打算购入，所以感觉用唔尽好似有啲浪费；加上自己本身持有NETGEAR M1（旅行用慨Router），虽然唔可以话NETGEAR果个介面唔好用，相比起我用紧慨Linksys已经多好多功能，但系有我好多想要慨功能唔可以即刻搵到出嚟，加上好多人都话ASUS个介面唔错，咁所以其实我自己心入边都已经打算买ASUS。

不过亦都要咁讲，如果到时真系无货或者价钱相差太远，要我考虑返另一个牌子绝对无问题，不过可惜结果……

如果你睇到呢度都仲未咁上一页离开慨，真系衷心感谢你，因为我谂啱啱先过一半。亦都希望你可以先喺下面拍咗5下手先，作为继续支持我给原动力，ありがとう！

好啦，我终于比较完终于可以出去买啦。但下一个问题就系去边度买。虽然我屋企去高登同黄金都只系大约15分钟左右车程，但系始终我手头上无咁多现金，同埋我唔想比现金Www，咁所以就转去屋企附近慨大型电器铺睇吓先，如果价钱相差太远就出去买，反正都只系差程车。我屋企附近慨大型电器铺就系凶宅，咁所以就走咗入去睇。应该点讲，唔系无选择慨，只系太多嗰啲乜乜Link同埋贵到飞起，超过$3000嗰啲Router。正当我心灰意冷之际，我眼尾见到有AX3000呢个价钱牌，而且个价俾我谂慨仲平，嗰刻真系以为自己好好彩，但系睇真啲，原来前面仲有＂TUF＂三个字，即系代表系电竞慨产物。我要讲一讲先，我个人对于电竞不持有好感态度，但系亦都未去到反感慨地步，我唯一一个有兴趣睇慨电竞就系F1 E-sport，不过前提当然系要我有时间先会走去睇吓，如果无时间真系唔会走去睇；不过我净系会留意F1，啲咩LOL同FIFA真系一啲兴趣都无。好啦咁返去正题，＄999慨售价绝对系吸引，但系因为突然杀出一个程咬金，搞到我要专登搵个地方去了解吓有咩唔同先。

一系唔睇，一睇真系吓死。呢一个型号最先推出慨就系大陆，之后先至推出国际版。果一刻其实我真系谂咗好耐，一来就系唔想买到大陆版，因为好多功能用唔到同埋会有好多不知名慨加速器；二来原因就系你懂的；三来就系上网睇到如果真系买咗大陆版，香港系唔会认保养呢个问题，如果真系有咩事，保养真系一个好大问题。不过既然呢个价钱令到我真系心郁郁，咁心动不如行动，最多都系买多个。不过好彩系咁短时间之内我都可以顺利搵到不同文章话点样分辨国际版同大陆版，就系如果国际版个公司地址会系台北，同埋个外盒包装主要系用英文，同大陆版使用简体中文完全不同，单凭外盒已经分到，而且我亦都相信，凶宅应该唔会将大陆版慨Router专登放入国际版慨外盒入面，毕竟渠都系打开门做生意，有咩冬瓜豆腐真系可以告到渠甩裤，咁所以我都系决定走返去买。讲开又讲，经过咗我超过一个钟慨比较之后，发现规格、输出功率等等全部一样，唯一唔同慨地方就系TUF版本比原本版本比较高、比较重同埋Router外壳Logo变咗一个有翅膀慨标志之外，基本上系完全一模一样。

购买之前亦都询问咗店员究竟系咩版本，咁佢都答我系国际版，因为睇外盒都睇到，咁所以买完之后都快快脆脆行返屋企安装。返屋企之后怀着担心慨心情打开，好彩一开就见到英文慨说明书同埋官方保养证，即刻放松咗。咁安装呢其实就冇咩问题慨（硬件方面），净系将啲线插黎插去就搞掂，之后就开机搞软件方面。虽然而家好多新Router都可以用手机或者App安装，但记得以前工作慨时候有个前辈话呢啲最好都系用电脑装，而且最好系插住LAN线，咁样安装就一定唔会出现问题，咁所以我都系乖乖地走去开埋部电脑搞埋剩低啲手未。

打完IP，一进入设定个版面，真系令我眼前一亮。虽然近呢五、六年Router慨初次设定已经越嚟越简单，就算系一个电脑白痴都识得搞，但对于我来讲，因为要搞好多唔同慨嘢，例如固定DNS，设定DHCP等等，咁我都系揿咗去进阶模式嗰度搞。终于搞到可以无缝连接返屋企慨所有设备之后，我亦都顺利咁入到Router慨主画面。一入到去其实都几眼前一亮，虽然之前已经上网睇过好多人评论或者介绍嗰个介面，但系当真系自己亲身经历到慨时候就发现自己无买错。相比起其他牌子，渠介面提供慨资讯好容易就可以睇到或者搵到我要搵慨嘢，而且有啲系要刷第三方软件先至有慨功能渠亦都有，虽然可能只系好简约慨版本，但系已经好过无，加上系保养期内我应该唔会走去刷第三方软件影响保养问题。

～～使用一星期后心得～～

经历咗一个星期之后，一路都运作正常，咁当然亦都相比起旧慨Router相差好远，而且发热量亦都比预期低。而过咗第一日之后我亦都调低Wi-Fi输出频率去到最低慨水平，但好彩我屋企真系好细，校到最高同校到最底，其实我真系感觉唔到有咩分别，因为都仲系好快。至于我之前成日面对慨断线问题，好遗憾慨就系我都仲有遇到，就算系唔系插着LAN线或者用Wi-Fi都有呢个问题，不过只系发生过两次，而且都系喺深夜时分，大约零时到一点三左右呢啲时间出现，而且只系断线大约10秒左右，所以嗰阵时对我慨影响就唔系真系咁大，完全系可接受慨范围。不过我反而谂唔明点解会喺深夜咁少人用慨时间会断线，但系我睇返log，完全唔似系供应商断线，而系自己Router出现问题，但系我又记得我系网搞到自动重新开机呢一类功能，所以我都有少少谂唔明，不过既然都唔影响我日常慨使用，所以就唔谂住理渠。

不过用咗几日其实都唔系无缺点，首先黑色机身真系好吸尘，有少少尘喺上面都好碍眼，搞到我成日要攞只手扫走啲尘。第二就系Router慨天线系不可拆式，其实我上星期一开嗰阵，我以为佢咁好心帮我装埋，但系后尾先至发现原来系唔可以拆，虽然可以减少安装慨失误，但如果真系想换更加大输出慨天线（虽然我都一定唔会咁做），或者天线坏咗要换（虽然呢个机会好少，但绝对唔系代表无）会变得好困难或者要拎去原厂维修或者要买一个新慨，咁样所以其实虽然系方便，咬返直渠，校啱天线方向就可以用，但另一方面就系将来维修或者改装会变得好麻烦。

至于你问我会唔会走去刷第三方软件？咁我既然买得ASUS，可玩性当然亦都系包括其中，不过未过保养期我当然唔会咁做啦，因为我唔想有咩事要买一个新慨，不过只过咗保养期之后会唔会咁做，就真系要睇吓到时情况，希望唔好好似变到上一部机咁要刷第三方软件咁样先可以勉强运作。

最后速度方面，正如我喺上面咁讲，相比起快速，我更加希望系可以稳定，经过咗几日慨使用，速度方面绝对冇问题，虽然我已经将个Wi-Fi输出校到最弱，或多或少都有影响，但可以长期都可以保持大约300-500Mb/s，绝对系一个可接受慨范围。不过又咁讲，呢个价钱有咁慨质素，其实已经算执到。虽然我唔知道系买贵咗定买平咗，但最少各方面都方便到我，咁所以我亦都希望可以用返三四年时间左右。

最后，再一次衷心多谢你又睇完一篇完全毫无营养价值慨文章，之后应该都会keep住喺星期六更新，下星期六再见。走之前希望大家可以慷慨解囊系下面拍五吓手，作为继续支持我创作慨原动力，にふぇーでーびる