節能減班、送披頭回港、做隻角落生物的11月下半

周末，提着水桶進到新居清潔。午後太陽曬進房間裡，感覺真好。我喜歡西曬的房間，熱是熱了一些，開冷氣就好，房間比較乾爽，東西不會發霉。前陣子短租的房間真的是……幸好照相機和鏡頭相安無事。也幸好在入冬天找到新居，不然就痛苦了。

台灣租房很好的地方是附家具，「拎包入住」，遷移的成本相對較低。記得十年前回港，租了炮仗坊，當時心裡常想着明天我就走了，明天我就離開香港了，不喜歡這個地方呀呀呀！！結果一住五年。已想不起那五年是怎麼熬過來的。不知道日子怎麼就這麼過去了。

拆塵封的箱子

搬到新地方後，拆兩塵封兩年的箱子。全是兩年前從香港運來的行李，80%是書，65%博客來買的，結果全部運回台灣。離港前花了一個多月精挑細選︰那些書該留那些不該留，最後選剩⅓。

留住，純粹情感因素。有些真捨不得，例如董啟章絕版的香港三部曲，作者最近把書放在NFT賣，十分前衛。一直想重讀卻一頁未讀的七集Harry Potter。書還可以繼續囤，只不過紙箱也兩年，怕生蟲，先清理。

不翻則已，一翻是滿滿的回憶。留住的讀書時死慳死抵買來的舊書，每一本大概何時購買，依稀還記得。比方說Harry potter初中開始讀，第一集98元港幣，讀到第七集經已大學了，跟學長們在學校書店一同訂書，讀完聚集大學路的漫畫咖聊劇情。接着去地下室書庫，經已有二手書第七集出售，不到48小時呢。

在那個時間點，遇到興趣相同的人，話題不絕。快樂時光也就一兩年過去了。

留一點間給自己

十月開始實習，主因是我不敢貿貿然一條友出job，找個地方補充一下case量不足的經濟狀況 。這兩個月工時排太滿了，一個月只休兩日。而且也發現很多東西可以調整，就又是那種，不同時間點會有不同的人跟你講不同的規定和規矩，當你實行之後，他們又會搬出一套新規矩去修改你的東西而不通知你。當你有急事要作出調整請求幫忙，他們突然又冒出一套沒聽過的說法來約束。

我不管，只問一句︰「那要怎麼辦？」

「沒怎麼辦呀。」

也是一種文化差異，還在適應中，也許適應不了。只能夠說，這種情況只是恰巧此時此地遇上，不代表別的地方或原來的地方就不是這樣。12月想多留一點時間給自己，一個多月沒出門拍照了，下班忙着搬家忙着整理，假日出門實習，模型也沒組多少。想要去找一些地方組織拓展人脈，也沒能夠實現。

拓展人脈，TMD我的硬傷。

輕責任打工仔

縮減工時最直接影響是預計收入減少，那當然僱主一方是不大爽，他們希望全部假日都留給他們，再由他們選取上班日子。不過，很坦白講，一天下來的薪資還不及我拍一小時照。另一個現實是，下半年真的job量大減(可能我太串)，以及追數都追到OK煩燥。

台灣打工CP值比香港低好多，所以責任心好似都無以前咁重。任務就一定會達成，但唔太會好似以前咁，為咗解決工作上問題，投放好多私人時間同精力……仲有情緒。

CP值低另一個原因係做既野好雜，台資企業有個特徵，責任重權力小。舉個例子，以前台資書店底層員工係要管理書區進退貨，mon實條數。係港式連鎖店，呢個係店長或副店職務，前線主要負責上書陳列執貨就OK，當然會俾意見，會落單，僅此而已。

好啦，你要mon實條數，自然對進退貨好敏感，下個月有咩優惠呀、折扣呀、節日促銷都要好上心。但係……全部野都唔到你話事。上頭要求你賣100本書，然而全間鋪stock得80本，咁不如再入多40本書啦。但係入貨既話事權係另一個部門手上，佢地話唔得，唔比入貨。結果會點呢？你要我賣100本，但存貨得80喎？唔到數，扣人工。

兩睇囉，如果對行業好感興趣，例如以前做書，以為自己「接觸到核心」，短期內會有滿足感。無興趣只會煩燥，人工好低既打雜。

扣人工都係一個硬傷，原本以為係行業問題，回想到以前係台資書店，應該真係習慣問題。呢一年嚟經常收到HR上個月出錯糧，下個月扣返，一個月可以錯兩次。我有位朋友係診所返工，8月份颱風假扣糧，直到11月尾都未搞掂……我聽到都O曬嘴，總數計埋都唔夠100蚊港紙。

之前短暫在一間系統公司工作，個間公司就精彩。星期一至五OT，星期六要出活動(OT)，星期日搞啲咩團建活動，全公司同事去種樹。最正係其實平日都唔洗OT既理論上，但公司要求同事要維護自己工作環境，輪值打掃清潔，打一打掃又一個鐘。

公司無司機，咩節能減碳。老細要出差，通常係自己揸車返到公司泊好，再安排同事揸自己車，載老細去南投呀、苗栗呀開會，來回四個鐘。同事返到公司要做O返4個鐘T，做返曬啲嘢……不過啲同事又OK，一做十幾年……

七點後的角落生物

我依家準時返工，準時放工，有時留多陣，同同事吹下水。工作地方同居住地15分鐘巴士，大埔墟火車站去大埔超級城既上下距離，買個飯，每晚7:00就返到居所。7:00仲未返到去就覺得好夜，條街無乜特點，火車站附近8:00啲鋪頭收曬工。都幾蕭條……係香港呢，9:00鐘先返到屋企都仲覺得好早。

收工後有job就做野，無job咪縮埋一堆，做角落裡的生物。睇下動漫，砌砌模型，睇下放假去邊到影相，唸下之後有咩出路，下一步既人生要點樣繼續生存等等等等。一個唔小心，會得閒到覺得無聊。

查實做咗咁多年人，經歷過咁多間公司，唔通仲唔明白，使命感同責任心只係自己自對己既交待。好比心機做，好上心，老細依然郁你；假度hea做賠笑，依然可以升職加人工。暫時，暫時啦都睇得比較開，完成任務又唔拖累同事，有飯開，有瓦遮頭，就算鳩數。

送走披頭

披頭要返香港。我真係三個大字︰O撚曬嘴。

披頭外號三聖麥浚龍，係好爺髮小，響南部讀書。都幾有緣，佢幫過我幾次。今次搬屋手推車都係佢專登拎落高雄俾我，好唔話得。我知道佢要返香港既時候，佢已經做曬決定。咁大個人，都無謂勸，約佢食餐飯，傾下計。理解下原因，咁我都明，只能夠講決定做得太遲，以及，又係一個放唔低香港價值同標準導致水土不服既結果。

去披頭租既房收拾細軟，執下執下居然成三十幾箱。3C產品有，大型家電有、曬衣架乜乜柒柒都有，拖版起馬都有六個。我想像唔到呢三年半佢既生活到底有幾咁歎，我全部家當夾埋都只係11個紙箱加一個喼及一個相機背嚢，10年喎。

人比人比死人，當我返13休1，煩緊下個月點交租，佢唔洗做仲可以出入搭高鐵，環島住香格里拉(N次)，三個月去一次日本，半年去一次法國，仲有公屋住(一世)。同埋我最近發現，身邊朋友都唔洗唸點樣謀生。幫披頭善後時我係到唸，佢一箱雜物應該等於我一個月人工了，剩係耳機都起碼2000HKD。

調返轉頭，依家返香港一樣會水土不服。咁……遊戲規則變咗好多，未必仲可以好似以前咁瀟遙自在。有啲朋友問我做乜要返台灣，陌生既我會話︰「我鐘意台灣既生活。」熟悉既我會答︰「因為香港愈嚟愈台灣。」

判刑當日跑去買了特價的憂鬱之島DVD，記得兩年前入戲院時寒流來襲，發行商和導演有到戲院分享。那個場境，魔幻寫實，一個香港導演在台灣講述一部香港不能上映的香港紀錄片。

看到判刑結果其實都有心理準備了，他們是罪犯，不是罪人。他們犯了法，有罪的是囚禁他們的人。

不過好像也沒差，大家早忘了，嘉年華會結束很久了。現在很多人已開啟新生活，身邊朋友，遠既嘲笑時政局勢，近既討論返大灣區買樓香港返工。討論緊品客梅菜乾味薯片，大陸版維檸澀得起，點樣考公務員。

我就無乜特別，記得每日準時返工，得閒寫啲無乜人睇既飛機稿，日子繼續下去就算啦。

每周一則城巿故事
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】