日本に行きたい — Day 1 日本到了我帶路

前言:其實數下手指先發現已經過咗五個月，雖然本身諗住去完就即刻寫感想，但係我太懶，拖下拖下到而家開咗Medium先有返啲動力去寫，所以你哋每禁一下follow、clap幾下，睇晒成篇文都係我繼續寫嘅主因！

好啦，其實我出發呢就係6月4號，但係3號就已經到咗機場(坐凌晨機係咁架啦)，一點機十點未到就已經check晒in，過埋海關。咁早就唯有沿著機場咁多個閘口行一圈(真係好無聊)，搭下旅客捷運系統(得個一個站)，買杯Starbuck飲下，用住華碩機上網，打發下啲時間(果時未有入lounge嘅信用咭)，去到得返半個鐘先係閘口附近坐下。

上到架機都起飛都delay咗三四個字，無耐空姐就派簡便飛機餐(真係好簡便，唔信你睇)。

本來係好想訓，但係唔知係咪坐着窗口位，唔睇啲風景對唔住自己(雖然出邊黑蚊蚊，飛過台灣個陣啲雲比較薄，見到下面的街燈光)，頂多淺睡3個字，起碼去咗四次厠所(洗下個面，屙屎屙尿)(同埋學精咗:檻過隔離訓到死豬條友，下次唔鬼坐窗口位)，聽下歌，睇下戲就話咁快嚟到日本空域。

大部份人第一次去日本都係去東京先，我都唔例外。平時咪打直飛嘅，今次反而變到M字咁飛(有冇人可以解答到我？)，但係不斷期待緊落機嘅一刻(btw落去果陣時隻耳仔真係好撚痛，飲咗幾杯水、掩住隻耳狂吞口水都唔得掂)。一話落機嘅時候就即刻行快兩步(that’s why要坐前排)，9秒9過海關(好彩今早冇乜人)(但之後都要係鳩等自己件行李)，仲可以搭到比自己預計早一班京急電車，食個靚早餐(去到印旛日本医大就好多人返工，完全體驗咗「通勤地獄」)。

落到去日本橋果時都係日本時間8點鬆啲，就諗下食乜。本身諗住係八重洲地下街食吉野家，但係淆底走去隔離東京駅間McDonald食。食完就搭新幹線去三島。

第一站:沼津

沼津，距離東京大約1個鐘車程(新幹線先係，坐東海道本線要兩個幾鐘)，係LoveLive! SunShine!!嘅聖地(唔係都唔會嚟)。擺低啲行李係locker到，就開始行程。但係頭先唔係話係三島咩？其實就要喺三島開始行程。搭住架劇場版列車(伊豆箱根鐵路駿豆線)，第一站就去大仁駅，果度有筆者主推角色国木田花丸嘅紙牌。

之後就搭返一個站轉頭到伊豆長岡駅。本身諗住去panorama park，但係咁啱第一日維修，要過幾日先維修完，唯有行去另外一個景點:韮山反射爐。

為了保護江戶幕府末年的日本，韮山代官於1857年建成了韮山反射爐。反射爐是為了熔化含有大量雜質的生鐵，製造優良的鋼鐵。反射爐的爐身和煙囪至今依然留存，亦是日本唯一遺存的反射爐。作為日本的國家指定史跡，2015年以「明治日本產業革命遺產 製鐵、製鋼、造船、煤炭工業」的構成部分登上了世界文化遺產名錄。

參觀完之後就返去伊豆長岡駅，點知發現另外一架主題電車「Happy Party Train」未到(日本啲電車眾所鳩知好鬼準時)，唯有喺隔離間舖頭買下周邊，等下一班車。真係比我估中咗，下架車真係Happy Party Train嚟，於是乎搭車返番去三島。

但係返到去巴士總站果時發現啱啱好走咗架巴士(一日卷唔好晒)，又要on99等過半個鐘。熬多半個鐘車程，終於真正嚟到沼津，一落車就即刻狗衝去酒店(因為真係好撚攰)，擺低晒行李就沖個涼，去食嘢。

第一間餐廳就係沼津バーガー。佢嘅名物就係深海魚柳漢堡，係用隔離全日本最深嘅海灣駿河灣沼津港啲魚整，脆到三日喉嚨痛(唔係講笑)。之但係隔離間沼津港深海水族館就收五點，無去到。

唔緊要嘅，附近都仲有其他好嘢睇，例如隔離(又係隔離)沼津港大型展望水門 びゅうお係幾好嘅觀光景點，仲可以見到富士山添。

之後就行下Animate、Gamers，再去埋沼津駅北口BiVi機鋪夾公仔，玩AC。落返去廣場就影下坑渠蓋。無錯，而家就連啲坑渠蓋都有動漫人物喺架度。但係全市分佈得好平均，一日只能影到幾個。

好啦太攰啦，早啲返酒店瞓啦。就咁，係日本嘅第一日就完喇。

<參考資料>
住宿:三交イン 沼津駅前
交通:京成アクセス特急 | JR 東海道新幹線 | 伊豆箱根鉄道駿豆線 | 伊豆箱根バス
早餐:マクドナルド 東京駅
下午茶/晚餐:沼津バーガー
韮山反射炉: 静岡県伊豆の国市中字鳴滝入268
沼津港大型展望水門 びゅうお: 静岡県沼津市本字千本1905番地の27
沼津バーガー: 静岡県沼津市千本港町83–1
BiVi: 静岡県沼津市大手町1丁目1番5号

由於整理資料需時，預計本主題每月更新一次，敬請留意。

1/11突發: 喺上晝打完篇文，禁埋scheduled publish之後，同日下晝發現儲存旅行相嘅sd card斷撚咗，加上好似搵唔到backup，嚟緊進度將大幅受到影響，有機會成為純文字討論(so9sad)。