割安法

眾所鳩知，偉大嘅中華人民共和國人民代表大會旗下嘅常務委員會終於係今日全票通過咗適用於香港特別行政區嘅國家安全(套)法，會係七月一日正式實施。估唔到喺我有生之年同廣大七百幾萬市民一齊熱烈慶祝收返(子華神都話過得最尾嗰兩隻字先係真)，見證一國兩制依個歷史喺一半壽命都冇嘅時候就壽終正寢。

依家國安法俾我嘅感覺，就好似打十號風球之前，天雖然黑晒，但係風力唔算好強，雨都仲未有一滴，個個返屋企痴十字膠紙，不過都總係有人願意犧牲自己嚟應對依一場暴風，務求一打完風就做好準備迎接光明。睇番成日發生過嘅事，同我嘅諗法不謀而合，眾志停止運作、黃店拆牆、更多嘅沉默陸續出現，甚至乎某啲已經被中共釘上眼嘅人開始逃亡，尋求政治庇護。而我相信，依一條惡法會損害香港嘅法治(雖然不溜都係無架喇，藏毒都可以撤銷控罪，之不過由負一百去到負一千噉解)，令到香港本身嘅營商環境變得更加差，外資企業離開人才流失唔再講，甚至乎令到香港喺國際金融中心上嘅名被摘下，曾經成日攞嚟打飛機嘅「紐倫港」雅稱不再復見。

啲藍絲成日話民主派，本土派係「攬炒派」，搞亂香港就最安樂。但係唔好忘記香港仲有一個由攬炒之母領導嘅無能政府，如果佢唔借啲意整個逃犯條例，香港人可能就喺度溫水煮蛙緊，死左都唔知(再勁啲嘅例子，如果佳仔唔隊冧佢條女，話時話佢幾時先至有心情去下台灣？)，當然佢冇咁做，令到更多嘅真相被埋沒，甚至不分是非黑白，強攻大學，屠殺所謂嘅「曱甴」，跟住成班藍絲信到十足十，年輕人就為咗爭取公義而不斷被判監，告暴動。因此香港唔再係以前嘅香港，已經正式地成為中國嘅一個普通南方小城市。但係出生得喺香港，我哋就注定喺香港人，依個身份永遠都無可能會改變，上一代人為咗逃避共產黨而逃走到香港，到而家新移民(我唔理佢哋係為咗香港民主少少嘅優點定r走晒本身屬於香港人嘅福利)不斷咁湧入香港，但係而家就同你講香港就係共產黨嘅地方，係人都會嬲。唯一可取之法就係改變香港，因為正常你嚟講世界上任何一塊地都已經有人要咗，你唔會好似哥倫布咁又發現新大陸，所以話要喺海外建立真正屬於香港人嘅香港嘅可行性其實唔大，咁當然做到依一樣嘢就好啦，起碼可以唔洗依靠外國資源(過程中或多或少都要外國協助嘅)。

無架喇，雖然睇落我好似喺講緊廢話，不過嚟嚟去去都係嗰啲嘢，我唔想呀。但願依家發生緊嘅只是係一場夢，真正屬於香港人嘅香港會係場夢發完之後，喺旭日初升嘅時候正式甦醒。