Godzilla vs Kong 哥斯拉大戰金剛

看這部《哥斯拉大戰金剛》，大部份時間都是用快速播放略過，反正這套戲冇劇情，冇故事，冇任何合理性可言，就是看兩頭大怪獸打架的爽片，總之見到人類的戲份跳過就對了，反正人類角色全部都是路人甲乙丙。我沒有特別追看傳奇電影的怪獸系列，之前三套都是看看怪獸打架場面，看完就算，故事呀，世界觀呀，who cares？

不計開頭哥斯拉係咁兒打爆Apex美國基地果兩分鐘，第一場動作要等到開場後四十分鐘，人類大軍把金剛運送去南極途中，哥斯拉半路殺出來挑戰金剛。首先哥斯拉單方面屠殺人類軍艦，然後金剛解鎖由水面打到水底，兩頭大怪獸站在航空母艦甲板上擺pose扮打，明明哥斯拉炮射爆隻空母，等金剛跌落水更有地利。打到人類差不多全滅，人類才想起可以詐死認輸，早知一早麻醉金剛全船熄機，咪唔洗同哥斯拉打囉。戰鬥機寫飛彈打哥斯拉，為什麼不飛高些才射呢，係要低飛給哥斯拉條尾打中，又是人類另一腦殘的證明。

金剛去到南極，變成地心探險記，落去地心世界唔知做乜，不過執到把新武器，可以upgrade同哥斯拉再打過。。沿途金剛殺幾隻小怪獸，人類又跟埋落去，話搵地心能源。最搞笑係找到地心能源不用帶回地面，scan咗咁就隻機械哥斯拉可以用。機械哥斯拉的秘密基地在香港，試驗啟動就引來哥斯拉襲擊。哥斯拉不知何解掛住金剛，而金剛的王座同地心能源又剛剛在香港地底，於是哥斯拉一炮把地球開洞，打出一條通路讓金剛爬上來會愛人。

成套電影的戲肉就是打爛晒成個香港，完場前半小時開打，中間只有少許人類劇情的冷場，打得夠過癮非常好看，高樓大廈全部撞爛晒。金剛係唔夠打哥斯拉打，哥斯拉又唔夠機械哥斯拉打，兩隻怪獸加埋都唔夠打。要靠三傻破壞了機械哥斯拉部電腦，金剛才有機會乘虛而入，將機械哥斯拉斬開九碌。如果不是有《怪物物語》的十一號女孩客串，三傻的戲份可以完全無視。

睇完套戲，我其實睇左D乜，唔係好知道。我只是知道機械哥斯拉是地球最強，之後的傳奇怪獸系列不用拍了，把機械哥斯拉換過人型外殼，整多十台八台，咁咪變成《捍戰太平洋》囉。

Original link: 哲子戲 Philosophist’s Camp