經過一些秋與冬

從前從前

有一隻熊啤同兔仔相愛

好似《愛很簡單》歌詞第一句：忘了是怎樣開始…

有別於一般童話故事

《從此開心喺一齊》唔係一個結局，而係一個開始

熊啤每日每日打好多魚返黎俾小白兔食

但係小白兔只係喜歡食蘿蔔

熊仔唔明，選擇同兔仔一齊生活簡直係顛覆佢人生嘅三觀。

懷疑人生嘅日子內，佢地都冇放棄到眼前所愛嘅對方。熊仔成為一個勇於踩地雷嘅勇者，一次次咁盡所能地俾兔仔雞脾、火腿、羊架、龍蝦、阿拉斯加長腳蟹…. 一千日之後，雙方搵到舒服嘅相處之道。

兔仔可以去紋身、可以自己去旅行、可以著短裙唔使入面著多條褲、可以想笑就笑要嗌就嗌。

當然上面嘅故事只係一個比喻，nana唔係食齋嘅。

黎到今日，正如故事嘅開頭，呢個結局只係另一個開始。勇者成就解鎖，並「獲得太太一名」。

大家都知道我叫nana 做老婆

一句「老婆」背後，唔係跟住：幫我洗衫煮飯執屋相夫教子一堆世俗裡女人要符合嘅四字詞語

一句「老婆」背後意思係：我可以為你做決定，而呢個決定係你都會高興嘅。

呢個係我地雙方稱呼對方老婆嘅意思。

希望所有叫我老婆做老婆嘅人，都係咁嘅意思。願雙方都可以過自己想過嘅日子，可以做自己，獲得對方支持，同成長。