Rainbow Gala 26：好好珍惜尚餘的時光

過咗八個月之後，九龍灣國際展貿中心再一次舉辦Rainbow Gala，今次繼續因應防疫要求，入場人數有限制，而且繼續推行時間籌政策，今次呢篇文章可能會文字比較多，因為一些大人的理由，大會不太希望大家在場內拍攝全景，所以我只可以乖乖跟從。（講個題外話，今次RG Staff 嗰件T恤設計真係好似F1車隊設計 Www

以下內容，經由本人親身經歷、個別攤檔負責人、個別工作人員同大會主辦交談後得出結論，內容可能不夠全面，敬請見諒。

首先就講吓今年嘅人流，真係只可以用恐怖來形容。根據現場所得知，最早抵達的人士在早上5:50左右，應該已經破了歷屆紀錄，而且早上9時前已經有超過一千人排隊輪候，實屬難得一見，或者應該話係恐怖。根據部份工作人員口述得知，負責收錢的工作人員由早上8:30開始工作，一直不停不休工作到下午1:30左右，中途連一個人去洗手間都無，可見今次活動嘅魅力已經達到巔峰嘅程度，最高峰時候好像有數千人在九展6樓同5樓排隊等買票。雖然今次已經提早在網上更新即時資訊，但可惜仍然有好多人買唔到飛，好似話大約朝早10點左右就已經截龍，但引致有黃牛票情況出現。亦都要再次提醒各位，千祈唔好鼓吹黃牛票，真係令到好多有心想來嘅人焗住要幫襯佢哋，但更加多嘅係見到好多好想入場嘅人比拒於門外嗰種心情。雖然我已經一早訂咗VIP門票，都見到好多人同我一樣訂咗飛，但更多嘅係，見到好多失落嘅人。之後同一名工作人員聊天，發現去到最後，即使是在下午5:50之後才入場的門票，仍然有不少人購買，他們明白那個時候進場不少檔攤已經會開始收拾，甚至可能已經什麼也沒有，但係佢哋都唔介意，甚至乎好多都係我淨係想入場感受個氣氛。作為一個多次在日本幫朋友在CM擺攤檔的人（當然係指疫情前），我真係無諗過我竟然可以係香港嘅同人活動聽到呢一句，而且仲要唔止一個人咁講，果一刻我聽到之後其實係有啲異想唔到。但遺憾嘅係，即使係可見將來，防疫措施都唔會一時三刻鬆懈，所以我相信下一次仍然會係人山人海，買唔到飛嘅人仍然大有人在。

講完人流就不如講吓場內，其實我都唔同時間都有做過入去搵朋友、搵相熟攤檔打牙骹等等。至於攤檔其實都係果一類嘢，寫真、周邊同本。相比起幾年前嘅淘寶散貨場，而家我今次見到比較多嘅係自己創作嘅作品，雖然當中唔少嘅作品都唔平，但購買嘅人都唔少，可以睇得出其實就算係本地創作嘅同人創作亦都不會輸蝕比日本同台灣（當然風林山火依然大排長龍）。不過相比起上一屆，中間大部分時間兩個展場內嘅人流都比較鬆動，在人流中穿插雖然不是暢通無阻，但不至於完全停下來，整體感覺是十分舒服的。之後有幸跟個別攤主交談，他們表示人流雖然和上屆差不多，但係都係果句俗語：王丁又旺財，今次嘅購買意欲相比起過往幾屆其實係高咗好多，以前都可能仲有啲人講價，但依家好多係見到啱就諗都唔諗即刻買，對於喺香港同人發展呢一方面竟然可以有咁成功嘅步伐，我諗真係都無人會估到。咁當然啦，我都有購買了一本講述香港同人繪師嘅《香港同人繪師選集1》作為支持。不過話說慚愧，香港同人繪師我淨係識得角館秋月老師，其他一概唔識；不過，如果有幸可以參與支持創作香港同人創展方面嘅發展，其實我覺得少少今錢又算係啲咩。

其實我要講嘅差唔多都講晒，因為都無乜好講。不過最印象深刻嘅係，絕對係晚上7:30分完結嘅時候大會宣佈嘅內容。雖然大家都知道九展即將面臨清拆，而且下一屆亦都可能係最後一屆，大會仍然希望可以舉辦到Rainbow Gala 30才結束。係大會主辦講嘅時候，好多人，唔同攤檔嘅負責人，所有Staff，甚至乎在場人士，包括我自己，都係同時給予無限量嘅掌聲支持同感謝大會同一路以來嘅籌備等等，雖然只是短短的幾句說話，但都已經令到人眼泛淚光。我諗最好笑都係有工作人員即刻上前遞紙巾給正在宣布的大會主辦，但另一方面咁講，如果九展清拆後，Rainbow Gala應該真的是會走進歷史舞台。因為最主要是香港嚴重缺乏中型的展覽場地，從聲音得知，大會應該是希望可以一直辦下去，但可惜土地問題，如果找不到合適的場地，只好宣布停辦。這毋庸置疑對香港同人發展絕對係大倒退，因為一個被譽為香港最好嘅同人活動消失係大家眼前，之後大家就會缺乏了一個交流的地方。所以，好好珍惜眼前尚餘的Rainbow Gala，守護香港同人創作的最後一顆種子（不過如果真係宣布停辦，我相信會入場嘅人應該會幾何級數上升，到時應該又係一次恐怖嘅經歷，如果有機會到時再同大家交流啦。

再一次衷心多謝你睇晒成篇文章，希望大家可以慷慨解囊係下面拍五吓手，作為繼續支持我創作嘅原動力（土下座 當然亦都歡迎大家喺下面留言討論