First thing first: 有冇文友係等緊我星期五早上嘅《中環遊戲》㗎？要喺度講聲唔好意思，是咁的：聖誕夜，當我要準備Boxing Day聚餐嘅清湯腩嗰陣，唔小心淥傷咗隻手。雖然係用藥同食止痛藥後並無大礙，但因為痛以及傷口包紮嘅關係，我用唔到十隻手指打字，所以本週五嘅《中環遊戲》將會暫停一週。不便之處，敬請原諒。

所以呢封夜信都唔會長，因為少緊啲手指打字真係好很煩……

聖誕過咗，又要等十一個月至再有聖誕氣氛。今年算係咁，應做嘅都做晒，又睇咗《Love Actually》、《Home Alone》同埋《Home Alone 2: Lost in New York》，Christmas Ritual其實都算做晒 — 雖然，我堅持《Die Hard》1+2都應該屬於聖誕電影，但唔睇其實又唔係話太大缺失嘅感覺；但係頭嗰三套唔睇完全唔覺過緊聖誕囉。

話咁快又新嘅一年。《夜信》由KW35開始，到而家寫到KW52。下星期數字又會歸零、由KW1再開始上路。我由偶然開始嘅寫作歷程，亦會進入第三個年頭。

我從來冇諗過，我可以咁專心咁做一件事，做足兩年。咁多年嚟，我嘅宿命好似一直阻止我心無旁騖咁去做一件事做太耐。兩年時間，我開始擔心，一直纏繞嘅宿命又再次伸出無形之手，去幫我「搬龍門」……

我只係希望，我可以有多一年半載時間，去完成《都是我們的日子》。之後，俾我寫嘢、唔俾我寫嘢，其實都甘心。

新年新願望，我希望我可以實現呢個微小嘅願望。在此祝大家有個平安順意嘅2020年。

本週文章：

隨想（2019/KW52）老舉過年

……直至今時今日，如果你有觀察一下身邊嘅泛黃朋友喺FB嘅態度，不難發現，其實仲有為數唔少嘅人，心目中嘅「國際戰線」，係自己除咗簽聯署同retweet之外，就乜都唔使做，然後就等美國為首嘅歐美國家，代香港人去同中共打一場proxy war。成功令中共屈服的話，咁香港就有民主自由+五大訴求……

《中環遊戲》係我第一輯完全放喺Medium收費牆之外嘅小說，供讀者文友免費閱讀。作為一個全職作者，我喺寫作上面嘅收入，就只靠LikeCoin嚟支持。所以，希望各位「讚賞公民」能夠喺上面嘅LikeCoin widget拍滿五拍，等我可以維持收入。未加入成為「讚賞公民」嘅朋友，可以喺呢度加入：https://liker.land/Civic?from=herrfung 。

另外，如果你加入得夠早夠快的話，我仲會私人回返第一個月嘅月費、港幣卅八蚊俾你。只要你喺加入之後，去呢度：https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限，先到先得，送完即止。

P.S.: 最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。