【香港歷史】精神啲！臨時立法會都係立法會！

港共喺大規模DQ後將選舉推遲一年，由人大委任嘅「臨時立法會2.0」即將來臨。中共容許全數議員續任，現屆議員面對去留兩難，或者回顧 #香港歷史 可以帶俾我哋一啲啟示。

大局已定

1990年代，中英已經簽署咗聯合聲明，基本法亦起草完畢，即使經過六四屠城，亦無改香港前途嘅去向。面對九七主權移交嘅大限，香港人對民主同未來感到非常悲觀。

民主直通車

末任港督彭定康於1992年上任後提出 #改革立法局，取消委任議席，並新增九個功能組別議席（新九組），令所有在職人士都有資格投票。政改方案變相增加九個直選議席，#加快民主步伐，並會喺1995年立法局選舉落實。

另起爐灶

中共對政改方案大為不滿，最後拒絕1995年當選嘅立法局議員過渡到特區立法會。為免主權移交前嘅香港有兩個「立法會」，以及填補立法會空窗期，中共成立喺深圳開會嘅 #臨時立法會。

臨立會組成

臨立會由親中派 組成嘅「香港特區第一屆政府推選委員會」（共400人）投票產生，嚴重缺乏民主元素同認受性。民主派當時決定 #集體杯葛選舉，只有民協四人堅持出選，表示要議會內反映民主派聲音。

還原惡法

臨立會喺唔夠兩年任期內通過咗63項法案，喺四名民主派議員見證下制訂惡法，其中包括：重新制訂《#公安條例》，設立不反對通知書制度，限制遊行集會自由。廢除《#集體談判權條例》，漠視勞工權益，削弱工會制度內抗爭手段。臨立會作為政權嘅 #橡皮圖章，四名民主派議員喺議會內毫無作用，淪為制訂惡法嘅幫兇。

無險可守

縱觀歷史同現今形勢，全面杯葛臨時立法會係 #唯一出路。有人認為留任可保住 1/3否決權，但事實上1/3否決權只有兩個作用：一，否決政改方案、二，否決解除議員職務議案。當《國安法》都可以直接繞過立法會立法，所謂1/3否決權只係空談。修改《議事規則》後拉布已經唔可行，議會內肢體抗爭 亦有其限制，守住議會嘅講法只係 自欺欺人。

拒絕妥協

如今國際制裁勢在必行，中共強推臨立會只會增加制裁嘅正當性同籌碼。如果泛民議員選擇委曲求全，甚至接受條件（如原則上唔反對國安法、唔行使議案否決權）向政權妥協，承認由中共僭建嘅議會，恐怕會向國際發出錯誤訊息，最後得不償失。此外，香港作為 #中美角力 嘅戰場，應該盡可能尋找 #破局可能，積極製造政治危機，而唔係跟隨中共劇本。

香港正面對生死存亡，懇請現任議員放下私利，尊重香港人嘅集體意志，#全面杯葛臨立會，展示香港人嘅抗爭決心。真正與港人同行，以免成為歷史罪人。