真·三國無雙 (電影)

三國演義，三國志，三國無雙，相信是不少人的童年回憶。雖然三國題材早已拍到爛，難得今次光榮正式授權，好唔好睇點都要支持，就算只看打鬥動作場面，看看角色跟遊戲的還原度如何也好。電影只講三國早期的故事，上半場黃巾之亂先打一場，然後曹操刺殺董卓失敗逃亡，寧教天下人負我。下半場戲肉十八路諸候討董，前菜溫酒斬華雄，主菜三英戰呂布，最後一幕無厘頭skip幾年以煮酒論英雄作結束。要講劉備和曹操兩個主角，這幾場戲是基本必盤，雖然沒有人不識三國的歷史，不過如果真係未睇過三國，恐怕會看得一頭霧水。反正這套電影也沒有人入場為了看文戲，過場拖時間得啖笑爾，完全不值一提。評價這套電影的好壞，只有兩個標準，打得好不好看，有沒有對得住《三國無雙》這塊招牌。

這套電影的特效以合拍片來說不錯，當然與荷里活頂級製作仲差一大截。開場黃巾之亂打得最好看，第一次在戲中見真人開無雙，關羽把大刀一揮畫圈，所有雜兵爆飛上天彈開，真係幾似打機。張角施法令黃巾士兵點喪屍，成堆喪屍拉住董卓隻馬，跨張到好離譜但勁似《甲鐵城》。呂布追捕曹操變頭文字馬，騎到隻馬甩尾掟彎又扮電單車片低跣過去，算是另類爆笑經典。最後一戰千軍萬馬，但全部都係電腦特效，真係同睇打機差不多。去到這時候再開無雙，雖然更多人飛天更跨張，但新鮮感已過有點視感疲勞。三英戰呂布就名乎其實打飛起，那已經不是三國無雙的打法，變成了龍珠Z的打法，呂布劈刀放閃電炮，元氣彈半空互撞大爆炸。明明三國演義是呂布敗走，電影卻變成呂布贏緊，但係趕住返屋企放過三英，有冇搞錯。

論角色還原度，林雪演董卓，古天樂演呂布，呂良偉演袁紹，足足一百分，可以去ComicCon參加cosplay大賽，贏梗，尤其是呂布件盔甲，跟足遊戲的造型。其他角色是不知名大陸演員，張飛和關羽都算幾似，初初嫌關羽不過高大威猛，不過結局關羽爆衫騷肌肉，原來佢到幾大隻，OK收貨。曹操是跟遊戲著紫色甲，硬是覺得睇佢唔順眼，去到片尾曹操留翻小小鬚跟遊戲，當堂成個人醒目晒，原來佢之前漏左撇鬚。套戲第二個最唔似樣係劉備，唔好以為著件綠色衫就係劉皇叔。最唔似樣梗係貂蟬，唔係話個女仔唔夠靚，但係三國無雙中嘅貂蟬明明著晒甲好打得，點會係戲中病弱尋死的女子呢。很多人批評劉嘉玲的鑄劍堡主，我反而覺得沒有問題，玩遊戲也有說書人同過場字幕，鑄劍堡主出鏡又不多不佔時間，反正總要有把畫面外的聲音去擔當解說。

我認為反正成套電影個故事冇頭冇尾，不如索性cut晒D文戲，淨係拍一場繄接一場的打鬥，仲好睇。好難講這套電影會唔會拍續集，至少要應該要至少拍到董章死了嘛。

Original link: 哲子戲 Philosophist’s Camp