從電視天線中得到教訓

搬去村屋之後，屋企天線有問題，我一直睇唔到電視。我整咗好多次，不斷去精益求精，肯定啲接線無問題，甚至換最好嘅面版接線接頭，但都係唔能夠好好睇電視。

足球、籃球甚至奧運，我都要用上網去睇直播。一嚟會有Delay，二嚟其他屋企人一上網，我個直播又睇唔到。如此一來，我每次有波睇，我就會好焦慮，好怕睇唔到。屋企人又擔心，怕掂吓部電話都令到我睇唔到。

突然去到尋日，我去咗宅男天堂深水埗Hea，點知無意之中見到個天線連放大器。我覺得無得搞㗎啦其實，但係又好想試下，見百零蚊就買返去啦。

老婆問我，呢舊乜嚟㗎，我話「希望」囉。吓？咩希望啊？我指一指，係 TV Antenna，天線，我突然間好想再試試，我唔服。

尋晚，試吓插天線連放大器，唔得。用返屋企天線，加放大器，得唔得之間，但好多Noise唔知做乜，不過晚上見至少收到99台，咁就算了。

到今朝，再試吓港台同TVB，又係唔得。我唔服，無理由時得時唔得，有啲得又有啲唔得，谷鬼氣拆晒所有嘢，直接將入牆天線接落去放大器出電視。

突然間，一天都光了，通通都收爆了，好穩定，好清晰，只係，道牆有個窿，畀人見到，唔好睇。

不過，其實佢喺部電話後面，邊個得閒去睇你呢？成日擔心人哋指指點點，根本人哋見到睇到就得啦，邊個得閒理每一個細節啫！？

諗諗吓，我浪費咗年幾時間，就係想佢「又靚又睇到」，結果Miss咗好多英超歐國盃NBA甚至奧運。雖然而家遲咗少少，但係，遲到總好過無到！至少，有返天線，一陣睇NBA，唔使擔心佢窒吓窒吓，成個人鬆晒！

其實，諗諗吓，育兒、做人、好多嘢咪又係咁！

又得到一個教訓。

#行了很多冤枉路
#最尾唔理人哋點睇
#件事就解決了
#至少自己覺得好好
#睇到Mirror
#一家大細都開心