大拿移 - 票已投

喺鄉下成日嗌要一人一票普選，今日投票我就可以最多投三票。原來之前盎人之地搞咗個重劃選區工程，結果本自治市鎮議會嘅議席全部都要選過哂。每個選區都喺議會有三席，每位選民都可以對每個議席投一票（依然喺一人一票），所以就有三票嘞。

投票過程同鄉下區議會或者立法會選舉差唔多，去到票站登記，攞到選票埋去填選票嘅間隔揀候選人，揀完將張選票對摺，放入投票箱，咁就走得。唔同嘅地方係：

• 登記嘅時候只需要講地址同埋名，唔需要核對證件。（咁點知會唔會畀人冒名投票呢？🤔）
• 揀候選人唔係扱印仔，而係用筆喺候選人嗰格度打交叉（咁就唔怕印仔啲墨未乾整花選票）。票站係提供鉛筆畀人用嘅，我就自己帶咗原子筆填嘞。（用鉛筆會唔會畀人用擦膠擦咗改選擇㗎？🤔）

講返個選區，八個候選人，代表四個黨派，爭三個議席。其實我都仲算係初蒞甫到，真係唔識呢幾位人兄人姐係乜水。不過噚晚我都有上網睇咗每個黨派嘅政綱，今日起碼係揀咗我表面上認同嘅候選人。

望返鄉下進行中嗰個「只有一個候選人但係唔會令選擇減少」嘅所謂選舉，我今日可以投呢三票可以話得來不易，亦更有意義。希望鄉下都早日有真係有得揀嘅真普選喇…