一擺得人驚个風搓（客語文）

台灣个所在係風搓會來个位所，［亻厓］兜從小就知六、七月開始到九、十月就會聽著風搓愛來个消息。有一擺［亻厓］在巴黎聽到外國人講：「台灣有風搓、地動恁得人驚，［亻厓］毋敢去喔。」［亻厓］還笑佢哪有恁嚴重，［亻厓］兜台灣人都盡慣勢咧。

無想到過ㄧ年，［亻厓］就堵著得人驚个風搓，這隻經驗實在難忘。該係2001年个納莉風搓，前一日大家就知這擺風搓盡大，第二日毋使上班。隔日早晨䟘床，阿爸在樓下喊愛［亻厓］𢯭手，原來係水蔭到屋肚啦。慘个事情毋單淨這件，早晨䟘床［亻厓］目珠擘啊開就感覺當痛，不得已愛出門看先生。一出門，水落當大，不得了，路項滿那都蔭水，該河壩个水淰出來勒。尤其係有污水溝个所在，水看起來當深，看毋清楚哪位係路，哪位係溝仔。［亻厓］無辦法過去，無奈何先行店亭下，到有一位看得著路个所在正做得過馬路。行過去正知，水深蔭到［亻厓］个大腳髀，實在盡得人驚。

看煞先生，先生載［亻厓］轉屋家（人當好个先生），［亻厓］歸身濕濕緊去換衫。換好衫，還愛清蔭水，拖地泥，無閒到下晝，實在當悿。

這實在係一擺得人驚个風搓經驗啊。