東區-2(新城A區)詳規 -- 跨區交通建設

新城A區的交通，可能是最多人擔心的議題.

點解?因為A區預計會住9.6萬人,而其中2.4萬戶經屋(約7.2萬人),4千戶社屋(1.2萬人).

社屋預計主要的居住年齡層較高,要注意公園綠地、社會設施的設置,同埋社區性慢行系統的規劃.

而經屋,因為佢的收入條件限制,可以預計會係青壯年為主的中或中低層收入市民,小家庭形式為主.而呢種小家庭會引伸好多交通需求.

最基本的係因應生活需求而產生的衣、食、住、行、育、樂,呢啲如果有個好的生活社區規劃,應該係可以基本解決的.

其中育(受教育),區內係有個學校村,預計有8-10間學校進駐,會解決一大部份的需求,但因為澳門跨區甚至跨境返學十分普遍,相信依然會產生好多跨區交通,尤其是返澳門半島返學放學的交通.

而另一個最重要的交通需求,就會係返工,澳門主要的工作區係氹仔的博彩娛樂區,即金光大道周邊賭場酒店,以及皇朝區、南灣區的賭場酒店區以及辦公區.從友誼大橋,可以發現每日的早、晚高峰上下班的普遍現像,係朝早塞死往氹仔方向晚上塞死往澳門方向,說明左因為跨區返工引伸的交通擁塞情況十分嚴重.

而從規劃上點解決呢個問題?職住平衡係一個方法,但可以睇到A區的商業模式,可能會分2種,第一種係生活社區性的商業(零售、餐飲),另一種係假日人流聚集的文化旅遊性的商業(結合大型文化設施以及周邊商業區形成聚集經濟),但就缺少左真正可以提供到大量就業的產業用地,即辦公大樓、酒店商場(mall)、工業場所(總規已明訂冇可能出現係A區).而少左呢啲用地,基本上大部份的及業人口(唔計仲有4千戶的其他住宅同埋社屋,只計經屋2.4萬戶中假設有7成的雙職家庭,即係大約會有4.1萬個工作出行需求).好粗略而且保守咁估計,就當佢有4成係可以原區返工,6成要跨區返工,即係有2.46萬個跨區出行需求.

跨區中計佢4成係利用巴士(輕軌起好再計過佢),一次載20個人,即係有492架巴士.另外4成汽車,其中1/2係2人共乘,即係有7380部汽車,有2成電單車,同樣其中1/2係2人共乘,即係有3690部電單車.

咁交通上到底搞唔搞得掂?可以話A區的慢行系統+真係起好的東線,係完全搞得掂A區內的交通需求.

不過,跨境交通方面,首先往氹仔的第4條大橋,同埋往皇朝區的AB通道,係一定要起的,而且最好快過第一批基經屋入住前起好,如果唔係真係會難以想像黑沙灣區同友誼橋的盛況.但同時,相信呢2條跨區通道起好,就會引伸好多原本澳門半島的交通需求,即係澳門中北區同埋皇朝區住的人會路經A區去氹仔返放工.再加上往關閘方向的交通量基本需求,

而另外3條連接澳門半島的橋都係好有需要,但急切性來講,真係冇第4條大橋,同埋AB通道咁急.而

唔知幾時起好同埋唔知有冇關閘站的輕軌東線,唔計會唔會起的內港區果段,將會係輕軌同民生最密切相關的一段,係美好的遠期建設,起好左A區內部交通會好方便(先唔討論商業),而且會解決部分(小部分吧)來往關閘、氹仔的交通量.

講開第4通道,不得不提,原本新城規劃階段,唔理係咩方案,都係同輕軌合建的,點解而家又分開來起??有想傾下的可以留言...