東區-2(新城A區)詳規 -- 綠化系統

根據2021年8月的人口統計資料，澳門總人口共682,070人，人口密度為每平方公里20,620人，係全球人口密度最高的城市(至2021年)，大家熟悉的新加玻（每平方公里約８千６百人）、香港（每平方公里約６千６百人），則位於第３同第４。而鄰近A區的黑沙環及祐漢區每平方公里更達到153,104人，又係澳門人口密度最高的地區。

從百度地圖的航空照片，可以睇到，在澳門原有的望廈山、螺絲山，同埋用水目的的水塘、經濟目的的狗場以北的黑沙環及祐漢區，只留左條黑沙灣公園附近的綠帶作為小小的發展緩衝區，其他的土地上建築物立林，而目前仲係空地的Ｐ地段（原海一居），都會繼續開發，力保黑沙環及祐漢區全界人口密度最高的生活社區呢個標籤。

建築林立，其實大家係條路度行，好難感受到，但係呢區啲樓佢仲要係貼住條街起到滿哂，尤其一般15米以下的群樓層起到full,密不透風。而為左滿足澳門建築條例留下的僅有空間，全部留係建築內部或屬於私人範圍。

A區又點？土地面積約1.74 平方公里，預計人口共9.6 萬，人口密度大約每平方公里5.5萬人,高於澳門平均標準,講真真係太多人了,但面對住澳門的公共房屋壓力(雖然筆者其實唔係好認同呢種房屋政策,有機會再同大家傾傾),相對於鄰近的黑沙環及祐漢區已經相當怡人。

A區的綠地網分成左幾個層次,對於空氣流通、生活的感受都會有一定的提升

1.首先係最重要的新增填海公園,佢位於A區同黑沙環及祐漢區中間,如果真係可以做得成,會好大程度咁減輕呢區的綠化同休閒壓力。但係最重要的都係改黑沙環及祐漢區區現有的土地使用、各地段本身的覆蓋率,令公園綠地社區化,先可以改善綠化不均的現象。

2.繼續講返A區的綠地系統,第2層係由環島濱海、南北貫通以及幾條東西向廊道組成的綠廊系統。成個澳門,比較有規模的公園綠地係新口岸皇朝果邊從生鏽鐡到觀音像的宋玉生公園綠化帶,同埋氹仔市中心區的中央公園。但真正能成為系統的公園、綠化帶,A區呢個應該算係第一個。要稱之為系統,就應該可以係適當的步行距離串連區內大部分土地,而且係可環循。可以想像,係呢區的社屋同經屋居民從最北的屋企落樓,可以行到最南的大型文化設施;傍晚可以沿住海邊行一圈再落新填的大公園打下波或者睇下雀;因為學校村集中而且有各種綠廊、地下通道串連,學生哥可以舒適安全的返學放學,或者去附近的體育用地、公園球場做運動。

3.仲有更深層次的,係設計係地段中間綠地空間(中北面較多)或者街角綠化空間(南面較多),因為要將地段內的綠化空間同市民大眾分享,可能要好似A區咁基本上都係公家地先可以做到,或者好似南面直接從地塊中切割出來。咁樣的設計應該會一定程度改善上面提到的建華、東華、廣華、金海山等建築群圍合式設計帶來的壓迫感。

目前來講,先天條件唔錯,再來,公共房屋、公園、綠地的規劃、設計、建造,會決定左A區的成敗