筆記：楊姓血統之謎

揚雄，根據維基中文，西漢哲學家、文學家、語言學家，「漢族」。但根據《漢書》所講：

揚雄字子雲，蜀郡成都人也。其先出自有周伯僑者，以支庶初食采於晉之楊

揚雄祖先係周人伯僑，姬姓，係春秋晉武公個仔。

神奇嘅事發生了。伯僑個孫突然變成羊舌大夫羊舌突，羊舌突個仔羊舌職。羊舌職又有五個仔，其中一個就係春秋後期嘅叔向。叔向個仔「楊食我」，據講就係楊姓嘅始祖。

有睇我之前講晉嘅文都知，古時晉地係外族大本營，乜人都有。而單係睇「羊舌」、「楊食我」，點睇都係外族姓名譯音，甚至可能係古羌人或翟人。

點解喺晉地嘅楊姓人，會去咗蜀呢？《漢書》話揚係晉六卿之一，同韓、魏、趙分晉，結果爭輸咗，流亡咗去楚。楚漢興起，大幅擴張領土，所以沿長江而上去咗巴。

但漢書講嘅，只係其中一個可能。古時西北方產鹽，例如青海就有「茶卡鹽池」，「茶卡」即係羌人講嘅「擦」，就係「鹽」嘅意思。而西北方係巴人同羌人地盤，巴人更係出名嘅鹽販，活動範圍曾去到長江中游，但秦楚爭鹽池，結果迫咗巴人入蜀地。假如係呢個原因，噉姓楊嘅人就係羌或巴人[1]。

第三個可能亦係常見，就係西漢征服西南夷後，本來係雲貴川土著嘅楊姓人，同周人拉關係提升族群地位，所以有漢書嘅故事出咗來。

無論如何，喺一個未有漢族嘅年代，揚雄又被「漢族」了。

後記：結束五胡十六國、南北朝嘅楊堅，其父楊忠喺今內蒙古武川縣出身，有可能係三家分晉時，楊氏爭輸後向北遷嘅其中一支。到隋朝，楊氏肯定有東胡血統。人類傳宗接代，本來就不停混血，如漢族般以血統建構國族認同，正確嗎？係唔係非洲南猿都可以係漢族？假如稍後東亞變成Z系血統主導，唔通Z又變成「漢族」？

寫於二〇二一年十一月九日
二〇二二年六月十一日第一次修訂

1. 據吳銳喺《你不可能是漢族》所講，巴人即而家嘅土家族人。