我回來了&近況報告

潮乜春
·
·
IPFS
·
雖然今日係4月1號愚人節,但請放心呢個唔係愚人節嘅特備節目。而係真係當係比自己一個返嚟嘅宣言。另外亦都會有少少自己嘅近況報告~

相隔差唔多年半,我終於返嚟。大家好我係潮乜春。自從上一篇文章發佈,啱啱好相隔450日。相信好多人都想知我到底去咗邊。簡單啲講就係我開始咗一份724365的工作(一星期7天,每天24小時,一年365日的工作)

時間回到2022年12月初,一個電話在早上響起,然後同我講有一份工想邀請我去做。當時我喺度諗我沒有發出任何求職信,點解會有公司主動搵我?雖然到咗依家都唔知道點解,但係我真係好想多謝當初嘅自己肯踏出呢一步。

踏入12月下旬正式開始工作,工作公司是一間跨國大型的IT公司。仲記得第一日返工,第一樣派俾我嘅物品,竟然唔係手提電腦,而係已經逐漸式微嘅call機。我當初我收到嘅時候真係完全唔知道應該點樣使用。但從那一天開始,我就正式開始踏入無限OT的工作生活。

基本上只要call機一響,就代表我有緊急工作要出動。記得當初我問點解依家仲會用call機,只係記得老細講咗一幾句:如果用電話send SMS俾你,如果你教咗震機就會睇唔到;Call機就唔同,點樣都會響到你醒為止。

你可能會問:點解要揀啲咁辛苦又要無得瞓覺嘅工作?老實講我到而家都唔知道點解當初會揀呢一條路,但係好現實嘅係真係為咗錢。相比起其他公司,呢度嘅人工其實已經算係業界巨頭。我相信我出緊嘅人工唔係好多公司可以比到呢一個金額。

本來只係喺香港工作就沒有問題,但係因為始終係一間跨國公司工作,所以都會有出外工作嘅時候。最初就係香港澳門兩邊工作,但係一次偶然嘅機會下俾公司發現我識日文,所以就改為澳門台灣日本三地工作。睇到呢度,你應該會覺得可以成日去唔同地方工作係一件好開心嘅事,而且可以去唔同地方旅遊,已經係賺咗。但事與願違,事實係非常非常之痛苦。打呢一段文章嘅時候,我啱啱喺台北工作完,下一站要去邊度都仲未知(我希望可以返屋企),而且最重要嘅係,我由今年1月2號離開屋企門口,到而家我都未返過屋企一次。香港國際機場就已經經過無數次,真正嘅經過家門而不入。

在C航空公司上看S航空公司的廣告

老實講我最初真係完全唔習慣呢一種非人類嘅生活,唔好話創作任何文章,連晚飯都唔想食,每日返到屋企最想就係瞓覺。時移世易去到今日,雖然都係唔太適應呢一種生活,但係每一次旅程都令到我對呢一份工作有唔同嘅滿足感,完全唔係可以用金錢衡量。雖然我都係為咗錢而工作,但係經驗永遠都是無價的。

咁就大約講完我消失嘅原因,咁之後都要講吓之後呢度會點樣發展。簡單啲講就係文章會繼續出,但係日子就隨緣啦,始終工作要緊~

當然因為我之前不斷飛行,可以有大量嘅飛行體驗報告,不過喺下一篇文章出現之前,希望我可以返屋企休息和好想食家人煮的食物,下一篇文章其實已經喺構思階段,咁就期待吓啦~

再一次多謝大家願意睇一個消失咗450日嘅人嘅廢話,咁我哋下次見啦~

CC BY-NC-ND 4.0

Like my work? Don't forget to support and clap, let me know that you are with me on the road of creation. Keep this enthusiasm together!

潮乜春一個喜歡創作嘅宅人,希望可以用宅人眼光出發,講解日常的生活的大小事? 更新時間?隨緣~
  • Author
  • More
日本風俗店系列
3 articles
ACG雜談
16 articles

日本風俗店迷思ー三